الأم التي تتنفس كذبا ..أخلاق الام سيرثها الأبناء "قصة حقيقة "

[راجيه الرضا]

قصه مطلوب مني نشرها

نفسي يا ساره كل الامهات يبقي عندها احساس بالمسئوليه مش بس عن الطريقه اللي يربوا بيها ولادهم

لا كمان عن اخلاقهم الشخصيه

انا امي كانت للاسف بتتنفس كدب وتحوير وتمثيل طول الوقت

للاسف مكنتش بتقول علي اي حد كلمه عدله من وراه
اربعه وعشرين ساعه شتيمه علي كل الناس في العيله ومفيش ريحه الستر علي عيب اي حد

طول الوقت جوز خالتك ده شحات واحنا اللي نضفناه
ابوكي ده اهله ركبينه عشان هو مهزوز
مرات خالك كانت بتعاكس ابوكي
ابن عمتك ده بيجي ياكل ويشرب لانه جعان وتربيه جوع

كنت الاول فاكره انها بتوعيني لحد ما في يوم سمعتها بتقول عليا انا كمان اني منافقه وبتاعت مصلحتي من غير ما يكون في اي خلاف بيني وبينها

لما ركزت علي نفسي لقيت اني بقيت زيها طول الوقت بطلع عيوب في الناس وببخ غل وحقد علي كل اللي حوالليا وفي الاخر اتهمهم انهم هما بيحقدوا عليا ومش بيحبولي الخير

كنت بسجد لربنا وادعيله يسامحني علي الغيبه والخوض في الاعراض اللي كنت بتنفسهم زي ما هي عودتني

والحمد لله مبقاش لساني ينطق بكلمه زي دي

مشكلتي انها لسه زي ما هي ليل ونهار بتمارس هوايتها في تشويه خلق الله ومنهم انا وجوزي وكلنا

وللاسف عيلتنا كلنا ايد واحده وانا منبوذه بذنبها ومحدش بيطيقني وكلهم بيحبوا بعض ونفسيتهم جميله مع بعض الا انا بيخافوا يتكلموا قصادي ومعاهم الف حق

حتي اخواتي واخدين طبعها وبيشوهوا كل الناس والكلام في الاعراض ده عندهم واتهام الناس بالباطل زي شرب الميه

دلوقتي انا بقيت طول الوقت بتعامل معاها ومع اخواتي في اضيق الحدود وبحس بخنقه رهيبه لمجرد وجودهم بس طبعا بعمل نفسي مبسوطه عشان بخاف من العقوق وقطيعه الرحم

كان نفسي في ام اخلاقها حلوه ابقي حاسه ناحيتها بفخر او حتي ود بس حقيقي مفيش اصعب من اني امثل الود وانا من جوايا احتقار وارف وخنقه وبتجنب كلامها عشان مدخلش في دواير نظريات المؤامره والتشويه اللي هي مش بتعرف تعمل غيرهم

اخلاقكم لو حلوه ولادكم هيطلعوا حلوين زيكم بلاش تعملوا حاجات تخليكم تسقطوا من نظر ولادكم ويبقوا بيعصروا علي نفسهم لمونه عشان يبروكم

ارجوكم حسنوا اخلاقكم عشان نفسكم وعشان ولادكم
وادعولي ربنا يعوضني خير لان الوضع علي الواقع مؤلم اوي بجد

د. سارة سيف