الأمومة وأنماط التعلق

[راجيه الرضا]

الأمومة فطرة وطبيعى يتعلق الطفل فى سنواته الاولى بأمه، ولكن المفاجأة ان التعلق دة بيحدد نمطه بعد كدة طول عمره فى التعامل مع البشر و علاقاته مع اللى حواليه

ازاى؟?

تعالوا نشوف أنواع التعلق وبتطلَّع علاقات شكلها ايه؟؟

1- تعلق آمن Secure:

هو أكثر الأنماط شيوعًا وأكثرهم صحة، هنا بيحس الطفل بالأمان بالقرب من الأم ويتضايق فى غيابها وبيعيط، ولكنه بيهدى لما ترجع ، هنا الطفل بشكل كبير إحتياجاته العاطفية مشبعة وحاسس بالأمان، لما بيكبر علاقاته برضه بتبقى متزنة ، لا إفراط و لا تفريط،عارف يدى وياخد بدون ما يبجى على نفسه أو يظلم الاخريين،عنده الخزان مليان وعارف ياخد منه و يملاه تانى وتالت ورابع،رصيده كبير وشبعان ?

2- تعلق متردد Resistant:

هو أكثر حدة، هنا الطفل قريب و(لازق) لأمه كثير، وبينزعج جدا لما ما يشوفهاش، ويفضل يعيط حتى بعد أما ترجع ومابيسكتش ???،

النوع دة سببه إن الأم غير متواجدة ،ولو متواجدة فهى بعيدة نفسيا عن طفلها
يعنى ممكن تكون ممتازة فى الرعاية أكل و شرب و نضافة و كله،لكن ما بتتواصلش مع طفلها بشكل مطمئن وآمن ليه

تواصل بصرى ضعيف،عينيها بتهرب منه ومن كل حد،مفيش أحضان،بتزعق وتنهر بدل ما تحتوى وتهدِّى،الطفل دة بيبقى جعان عاطفة وأمان
ماأخدهاش فما يعرفهاش، ولما يكبر ما يديهاش ?

عايز ياخد على طول،مستغل،غير متعاطف ،شكاك وبيغير،بيحب الاشياء والماديات و بيعتبرها مصدر الامان لان البشر خذلوه?‍

3- تعلق تجنبي Avoidant:

هنا الطفل بياخد رد فعل مختلف تماما،بيقفل على نفسه و يتجنب مصدر الألم دة،الأم مهملة أو قاسية ، فبتعبير بسيط كدة،بيرمى طوبتها،ومش هى لوحدها
بيرمى طوبة العالم كله، وبيعيش مع نفسه،لا عايز يتعامل مع بشر و لا يتوجع تانى، شكل علاقاته سطحية جدا وعلى أد المصلحة، فى علاقاته القريبة بيبقى موجود بجسمه لكنه متاخد غياب طول عمره، غير مشارك،غير متفاعل،مفيش ألفة عاطفية،نفسه و بس،مش قسوة منه، دة رد فعل دفاع عن النفس أنها ما تتوجعش تانى

4- تعلق مشوش او غير منتظم Disorganized:

هنا الطفل شوية بيصرخ ومنهار وهى مش موجودة و شوية مش زعلان و كاتم جوة نفسه، الأم قاسية وعنيفة، إدت رد فعل عنيف ناحية أنه بيعيط و عايزها، فما بقاش فاهم هو لما أبقى عايزها وبعيط دة صح و لا غلط؟

فبيبقى مضطرب فى انفعالاته لان الأم نفسها مضطربة و حادة فى شخصيتها وردود أفعالها، غالبا النوع دة بيطلع إضطرابات نفسية تحتاج العلاج

الخلاصة
الطفل طبيعى انه يتعلق بأمه، دى فطرة زى ما الأمومة فطرة
ومالوش أى ذنب إنك بتشتغلى، إنك مضغوطة نفسيا من أى حد حواليكى فبتطلعيه على أضعف مخلوق تلاقيه قدامك…ابنك مع كل الأسف?
وإنك احتياجاتك العاطفية غير مشبعة فبالتالى مش قادرة تشبعيه

حتى لو عندك كل المشاكل دى مجتمعة
هو مالوش ذنب يشيل شيلتك و يكمل حياته تعبان فى علاقاته وتاعب كل اللى حواليه
وجعك بيسمع عنده فى دايرة اكبر و عمر أطول ?زى مافيه صدقة جارية… فيه سيئة جارية

(ومن سَن في الإسلام سنة سيئة كان عليه وزرها ووزر من عمل بها من بعده لا ينقص ذلك من أوزارهم شيئا)

الطفل محتاج طول الوقت …طوووول الوقت(حب بكل اللغات،أمان،تقدير،قبول،مدح)دى زرعتك ومشروعك وشغلانتك وعملك الصالح اللى مكمل بعدك

دعاء أمين