افتح شبابيك الشمس وقرر أن .....

[راجيه الرضا]

صباح الخير

افتح شبابيك الشمس ليومك النهاردة بدري ...
قرر إنك هتقلل السكريات ... بلاش التوكتوك .. واتمشى شوية
تأمل في السما .. واتعلم إن يكون علاقتك مع العالم من حواليك مش مرتبطة بالناس فقط
يعني إيه ؟
يعني وانت بتربي نفسك وبتربي اولادك معاك علمهم إن

العلاقات بتترسم بين أربع أشياء
علاقة مع الله ... بتبدأ يومك بالذكر وبالوضوء وبالصلاة وبالتأمل في كونه الفسيح ( يبقى حققت معنى التفكر )
علاقة مع الذات ( النفس ) بمراقبة مشاعرك .. مخاوفك، ردود أفعالك، احاسيسها، وكتابة السلوك لو كان شاذ ..وكتابة معالجته تكون إزاي .. ايه المعاني المسيطرة عليا تجاه ذاتي وتجاه الآخر وهكذا .. على سبيل المثال

فكر نفسك بتقول نعم كام مرة في يومك لأشياء انت م جواك مش عاوز تعملها .. وبتقول لا كام مرة

في علاقة كمان مع الأشياء
الأشياء دي .. جماد ، نبات، حيوان .. ودي هبقى أفردلك فيها مساحة واسعة من الحديث ...

وأخر علاقة .. اللي هي العلاقة مع الناس ... هل هي علاقة اعتمادية.. علاقة نرجسية، علاقة قلق .. علاقة مودة ، خوف، شك، ترقب، إحسان .. إلخ بقى

كمان محتاج تعمل اختبار صغير مع نفسك ومع اولادك يتعلق بمعاني القيم وترتيبها عندك
القيم دي اللي هي = الأسرة ، الصداقة، ، النجاح ، المال ، الحب، الأمان، السلام، الصحة، المسؤولية .. وتسأل نفسك وولادك عن ترتيب هذه الاشياء .. ومن ثم تعالج الرؤية عندهم لو كان فيها مشكلة أو خلل

وصباح الفل عليك

#رحلة_صناعة_إنسان

أ.محمد فضالي​