اعترف بعيبك ..عالجه وكن شجاعا قبل أن تفقد أجمل الأشياء

[راجيه الرضا]

الكلام الصريح مش هيعجب كل اللي علي راسه بطحه بس احسن يا جماعه تعالجوا البطحه لان لو عشتوا عمركم كلها تداروها بصوتكم العالي هتفضل بطحه بتوجعكم جدا كل ما حد يجي عندها وهتمنعكم انكم تعيشوا حياه طبيعيه وصوت صريخكم من وجعها هيمنعكم تسمعوا وجهات نظر الناس اللي بتكلمكم وهتخلي ديما حياتكم وعلاقتكم مش مستقره

اللي عنده عيب وعمال يقاوح ويبرر عيبه ويوجد له اعذار ويقلل جدا من تأثير العيب ويهون منها ويلف ويدور ويشرح ويوضح ويحضر كورسات كمان عشان يلاقي كلام يقوله لنفسه يبرر بيه عيوبه في الاخر

هيتحاسب

هيتحاسب من ربنا
وهيدفع تمن تبعات العيب ده علي حياته

كل ده عشان بس يحافظ علي منظره قصاد نفسه انه شخص مثالي جدا مفيهوش غلطه عشان هو من صغره اتربي انه لازم يمثل ويخبي اخطائه عشان يفضل في امان من الضرب والتهزيق وقله القيمه

فالشجاع بس يا جماعه هو اللي بيقول

انت صح
معاك حق
انا فعلا كده
انا اسف

وبيقدر يتصالح مع نفسه وميجلدهاش ويشجعها علي التغيير للاحسن

لو دخلتوا كل جروبات الستات اللي بتقول نصايح لبعض وكلهم بيوتهم خربانه وقعدتي تسمعيهم العمر كله بيتك مش هيظبط

ولو دخلتوا كل جروبات الامهات اللي بتقولك متجيش علي نفسك وانت ام جميله وولادهم عندهم مشاكل سلوكيه ودراسيه هتتفاقم مشاكلك حتي لو فضلتي منيمه ضميرك

ولو قعدت تقول لنفسك كل يوم ان البلد مفيهاش شغل وكل دول نجحوا بالوسطي هتقف مكانك وتتفرج علي كل الناس وهي بتتطور في شغلها وحياتها تستريح وانت هتفضل كده تفشل وتعيط وتروح لقرايبك يقولولك متزعلش نفسك وحال الناس كلها

ولو فضلت تقول ان مراتك نكديه وزنانه وانت عارف انك مش بتراعي ربنا ومتعرفش حاجه عن بيتك وبتحل مشاكل ولادك بالضرب والزعيق هتفضل مشاكل ولادك وكرههم ليك وهتخسر اسرتك حتي لو كل الناس قالولك ان امهم بتأفور وان كل الستات كده

بلاش يا جماعه الغفله اللي بتغفلوها لنفسكم

ولو لقيت نفسك مش طايق حد يتكلم معاك في حاجه ومستموت انك تطلع نفسك ملاك اقف مع نفسك وراجعها واسئل هو انا فعلا زي ما بيقولوا

كل المشاكل ليها حلول بس ياريت ميبقاش توقيت الحل يكون بعد ما حاجات كتير حلوه تروح منك
ابتدي بدرى ولم ليلتك
عشان هي ليلتك مش ليله اللي بيطبلولك


سارة سيف
#حسها