اش اجهز للمولود واش احضر في شنطة المستشفى

[تحت زخات المطر]

السلام عليكم حبوبات

كيفكم ذا اول موضوع لي في هالقسم

حابه اسال عن تجهيزات المولود

شفت مسابقه افضل تجهيز للبيبي واخذت منها بعض الافكار

بالله ابغى اعرف التجهيز كامل من الى
انا ماحطيت ف بالي غير تشريعت النفاس والتفاسير
وفي المسابقه الي مجهزه ملابس واغراض لطفل ولها
في ياليت الي عندها خبره تقولي اش اجهز واجيب والضروريات والكماليات


وسوال ثاني في بعض الحريم لاقربت الولاده تحضر شنطه عشان اذا جاتها الولاده فجاءه تاخذها المستشفى معاها تحط فيها شوية ملابس وملابس داخليه ومنشفه وفوط
مين سوت كذا

واش حضرت في شنطة المستفى


وان شاء الله ماتكون استفساراتي ثقيله لاني اول حمل وماني عارفه اش اسوي

 

[صفوه الكتابي]

وعليكم السلام حبوبه وانا بعد انتظر مولولد واحلى شي لما تروحين وتتسوقي للبيبي وشنطة المستشفى ضروووووري تجهزينا لان يمكن يتولدي فجاه في اي وقت مولازم نفس التاريخ اللي عطوكي اياه في المستشفى واحسن تكون جاهزه عندك من قبل وحطي فيها ملابس للبيبي بس تكون تدفيه وملابس ليكي خفيفه علشان ترتاحين غير الشامبو والصابون والفوط ليكي ولطفك والله يقومنا بالسلامه ويخفف عنا الام الولاده ااااااامين

 

[روح القلوب]

انا بعدني ماحملت يارب ارزقني بالحمل الثابت السليم يارب عاجلا غير اجلا
دخلت استفيد سمحو لي

 

[تحت زخات المطر]

وعليكم السلام حبوبه وانا بعد انتظر مولولد واحلى شي لما تروحين وتتسوقي للبيبي وشنطة المستشفى ضروووووري تجهزينا لان يمكن يتولدي فجاه في اي وقت مولازم نفس التاريخ اللي عطوكي اياه في المستشفى واحسن تكون جاهزه عندك من قبل وحطي فيها ملابس للبيبي بس تكون تدفيه وملابس ليكي خفيفه علشان ترتاحين غير الشامبو والصابون والفوط ليكي ولطفك والله يقومنا بالسلامه ويخفف عنا الام الولاده ااااااامين

امين يارب ويقومنا بالسلامه

اول حمل لك ولا حملتي قبل كذا

اش احط في الشنط بالتفصيل واش جهزتي للبيبي
انا لسه مابديت من اخر ذا الشهر راح ابدا ان شاء الله

 

[تحت زخات المطر]

انا بعدني ماحملت يارب ارزقني بالحمل الثابت السليم يارب عاجلا غير اجلا
دخلت استفيد سمحو لي

الله يرزقك الذريه الصالحه امين
عليك بدعاء رب العالمين ربي لاتذرني فردا وانت خير الوارثين

واستفيدي ياعسل ماتدرين وانك تبشرينا الله قادر على كل شي

 

[صفوه الكتابي]

بعدني ما جهزت الشنطه يمكن اخر ها الشهر بجهز حجي بجامتين وفوطه وملابس داخليه والصابون والشامبو واللوشن للجسم لي انا والبيبي وللطفل فالينات داخليه وملابس باكمام طويله وقماط خفيف وثقيل والكمه والحفاضات وانتي بكرامه تقريبا هالاشياء بس مااعرف كم العدد بس بخلي احتياط ملابس جاهزه بالشنط بالبيت اذا احتجت شي زياده بخلي زوجي يجيبه معاه والله يعيني لاني بغربه والله يوفقنا ويقومنا بالسلامه

 

[رهم]

شوفي اختي اهم شي تكون شنطتك جاهزه قبل تدخلين الشهر التاسع تحسباً لأي امر طارئ

اما محتوى الشنطه (حسب اللي حطيت انا بشنطتي):
1- تغييرتين كامله لك تشمل(ملابس داخلية قطنية مريحه وواسعه شوي-بجامة او قميص حسب رغبتك-سروال داخلي قطني طويل-شراريب)
2- فوط صحية لك(10 حبات تقريباً)
3-مشط وربطات شعر(لانك بعد الولادة بيصير شعرك تووحفه)
4-اربع تغييرات للبيبي وتشمل(بربتوز داخلي -بجامة كامله-مهاد ولحاف-غطاء للراس)
5-حفاظات للبيبي كيس كامل ويجي حجمة صغير
6-مناديل رطبة للبيبي
7-مجموعة جونسون او بيجون الصغيرة وتشمل(شامبو-زيت-لوشن- بودرة-صابونة)
8-حليب للبيبي مع رضعه(في حال ما طلع منك حليب)
طبعا هذا التجهيز للشنطة حق يومين فقط بحكم الولادة الطبيعية
والله يسهل ولادتك ويقومك بالسلامة
ويرزقني اخوان لغلاتي​

 

[عذبة الروح 2]

سمعي ياقلبي ..
بحكم تجربتي بولدي ...
تجهيزات البيبي لا تبالبغين فيها لأنه راح يتمهد ولا راح احد يشوف لبسه هذا في النفاس
يعني اشتري ثياب الي لها اكمام ومفتوحه من تحت مثل الفستان يعني صدقيني هذا مريح لبيبي واسألي الوالده راح تقولك بعد ولأنك بعد الأربعين راح تشترين الأشياء الكشخه لطفلك
بس في النفاس مافي احد بيفك مهاده
المهم مهادات اربعه أو خمسه
اثياب خمسه ..
رضاعه عدد 2 ويكونو بلاستيك ..وتكون صناعه مضمونه حلامات رضاعه على الأقل 2 فقط
لفات على شان تلفين البيبي تكون قطنيه لمن يكون برد وخفيفه لمن يكون حر
تقريباً 3
قبعات لطفل علشان ما يبرد الي تبقين 2 لأنك بعدها مراح تحتاجينها لكبر ..
وبعد تحتاجين فازلين خاص لطفل علبه صغيرة
وسرير متنقل هذا إذا ما تبين تحطين سرير لبيبي في الغرفه
وانتي ..
لا تتقيدين بشي معين خلي الشي مريح لك واهم الشي السروال والإشرب لراس
مفرش يكون دافي لك قبل ما يكون كشخه ..
الفوط الصحيه خذيها قطنيه .. شربات ..
الشنطه خليها في بيت أهلك ..
بحيث لا ولدتي يجيبونها لأنك مستحيل تقدرين تلبسينه بعد التعب لازم احد يساعدك
وتكون فيها
إذا ولاده طبيعيه قميصين ومسكت شعر ولبسين لبيبي لأنه راح يوصخه بالقوه عيرات داخليه اربعه
وفوط صحيه كيسه الي فيها عشرة
ومهاد ولفه تلفينه عن البرد .. وقبعه وحده ..
وفرشات اسنان ومعجون وصبونه سائله بس ..
ونصيحه لا تسبحين البيبي بالشامبو ا ما تولدينه لانه جلدته ياحرام توها ما بعد تتعود على الجو الخارجي
خليه بس ماء أو فوطه تبللينها بماء دافي وتمسحين جسمه لأنه مو مثلك تعرقين ومن الأكل والشرب ..
هو على الحليب ومافي شي غيرة .. وإذا اضطريتي صابونه مافيها عطور
لأنه عن تجربه لولدي يوم روشته بالشامبوا قلب جسمه لي ..
القيصري :

على الاقل اربع قمصان أو خمسه ..
غيرات 10 والفوط الصحيه كستين ..
ومهادات البيبي الثياب 4 والمهادات4والفات 2
وإن شاء الله ما تحتاجين القيصري
والله يسهل عليك

 

[حبك بعثر الدنيا]

شنطت الولادة للمستشفى تحتوي على ...
3 قمصان مع طرحاتهم (وملابس داخلية قطنية وستيان للرضاعة وسروال قطن لكل لبسة )
مفرش للسرير ..
ادوات النظافة ممالتج ...
صابون او شور جل -ديودرنت -عطر ريحتة باردة -بودرة -شامبو-لوشن للجسم -ولاتنسين الكوتكس -المشط اعوادتنظيف الاذن-معجون+فرشاة للاسنان-وممكن تاخذين معاج (كحل وكريم اساس وغلوس) لما يجي زوجج يشوفج بأحسن صورة وانتي اتقدمين لة احلى هدية منج (ضناة)البيبي مالكم ..
بالنسبة لشنطة البيبي نفس الشي 3 غيارات كامل من بيجامات وبربتوزات ومهاد وكيس حمل البيبي ومقاط واغراض النظافة الجونسون وقطن للتنظيف مع كوب بلاستك او ملة صغيرة للماي لتنظيف البيبي ومفرش تحتة مع شنطة للخروج من المستشفى +ملحف للبيبي...
اتمنى اني فاديتج ومانقص شي

 

[جنون بيبي]

توني حامل باول بيبي..
بس دخلت استفيد

 

[وحيده في دنياي]

للبيبي طبعا كل شي على 2 :
( مهاد + قميص + وشباحه داخليه + قبعه
+ مقاط للمهاد + شرابات + رضاعه + حليب لنونو +
مصاصه عشان تسكتيه + ماي غريب + فازلين +
مناديل مبلله + مناديل عاديه )

اغراضك :
( 2 قميص + سروال داخلي + او بجامه + مشط +
عطر خفيف + بودره وروج وكحل للتعديل بعد الولاده +
حفايض قطن تكوني لافتها بشاش ومجهزتها +
ستيان + اعواد لتنظيف الاذان + شيله لراس لما يجي احد يزورك بالمستشفى تكوني لابستها اذا حبيتي )

والله يتمم عليك وعلي وعلى كل الحوامل على خير
ويسهل ولادتنا

 

[تحت زخات المطر]

تسلمون ياعسولات ماقصرتو والله
من الحين ان شاء الله بجهز اغراضي كلها

 

[روح القلوب]

الله يرزقك الذريه الصالحه امين
عليك بدعاء رب العالمين ربي لاتذرني فردا وانت خير الوارثين

واستفيدي ياعسل ماتدرين وانك تبشرينا الله قادر على كل شي

ديتك ياعسل ع الدعوه ربي يتتم حملك ع خير

 

[دآليآ]

للبيبي طبعا كل شي على 2 :
( مهاد + قميص + وشباحه داخليه + قبعه
+ مقاط للمهاد + شرابات + رضاعه + حليب لنونو +
مصاصه عشان تسكتيه + ماي غريب + فازلين +
مناديل مبلله + مناديل عاديه )

اغراضك :
( 2 قميص + سروال داخلي + او بجامه + مشط +
عطر خفيف + بودره وروج وكحل للتعديل بعد الولاده +
حفايض قطن تكوني لافتها بشاش ومجهزتها +
ستيان + اعواد لتنظيف الاذان + شيله لراس لما يجي احد يزورك بالمستشفى تكوني لابستها اذا حبيتي )

والله يتمم عليك وعلي وعلى كل الحوامل على خير
ويسهل ولادتنا

رايي من رايها
شكرا ع الطرح لا هنتي