ارجوك يا دكتورة ناعمة ردي علي انا تعبانة وحيرانة

[Sun_Shine]

السلام عليكم ورحمة الله وبركاته ،،،

انا عندي مشكلة وماني عارفة شلون اتعامل معاها .. حاولت باكثر من طريقة واستشرت ناس وايد متخصصين ومعارف اصحاب خبرة بالحياة بس احس للحين ما لقيت احد يفهم معاناتي .. ابي ارتاح واحس اني اتصرف صح ومو غلطانة او مقصرة بحق احد.. ارجوك يا اخت ناعمة تساعديني باسرع وقت

انا عمري 31 سنة ومتزوجة من 11 سنة وعندي بنت عمرها 10 سنين وولد عمره 8 سنين والحين حامل الحمدلله ..

في بداية زواجي عشت 3 سنين حياة زوجية طبيعية فيها الحلو وفيها المر .. زوجي طبعه قليل كلام وما يعرف يعبر عن مشاعره بس كان يحاول ويتفاهم معاي وكنت مرتاحة معاه ..وكان يصرف على البيت

عقبها دخل مجال الاسهم والبورصة وتغيرت احواله .. طول الوقت تفكيره ووقته واهتمامه فيها ولا يحس فيني ولا في عياله ... كنت اتحمل واتغاضى ومرات انفجر لانه قام ما يهمه ازعل ارضى ارتاح اتضايق .. بس كنت متحملة وحتى ساعدته ماليا بقروض لتسديد ديونه .. علما انه من دخل هالبورصة ما قام يصرف علينا ولا اشوف أي ارباح من شغله فيها .. كله خساير وديون ...

من اكثر من 3 سنين انصبوا عليه بقضية شيك بدون رصيد وانحكم 5 سنين .. بس هو سافر برا قبل صدور الحكم .. اول شهرين راح هناك كان يدق علينا ويتواصل وكنت ابعث له فلوس لانه ما عنده .. اهله كانوا مو راضين عليه ولكني تدخلت واجبرتهم يتحملون مسؤلية القضية ومعيشته هناك .. وكنت احاول اضغط عليه انه يرجع وينفذ الحكم ولكنه رفض وقاطعني وصار بيننا قطيعة .. وكنت بين كل فترة اكلمه عشان يرجع بس كان يرفض ويقطع عنا ..

بعدين سعيت انه نستأنف الحكم ونحاول نظهر البراءة وكنت انا اللي اتابع القضية مع المحامي واهله وهو ولا يهمه اذا ما كنت ادق واقوله الاخبار ما يسأل .. وللحين القضية ما انتهت ...

هذا مختصر الوضع .. بس انا اللي مضايقني انه مو مستعد يتحمل مسؤلية اللي سواه .. تخيلي صار لي اكثر من 3 سنين عايشة بروحي مع عيالي بالكويت وهو برا متحملة كل شي على راسي.. وهو لا يدق ولا يسأل واذا دقيت عليه ما يرد او ما يبي اكلمه او اعاتبه على قلة سؤاله او اهماله .. انا ما انكر اني مرات اقول له كلام جارح واتنرفز بس من حر ما في قلبي والله .. تدرين انه ما نشوفه الا مرة بالسنة لمدة اسبوعين لا واحنا اللي نروح ونحرص مو هو .. ومن نرجع من السفر يرد على المقاطعة .. انا تعبانه وايد .. ابي احس اني متزوجة حالي حال الناس .. اوكي زوجي مسافر بس في طرق وايد الواحد يقدر يتواصل فيها .. بس هو لا يبي يتواصل ولا يرد علي ...
ودي اعرف ليش يعاملني هالمعاملة ؟؟ انا ماسكة بيته وعياله وقضيته ... وكل شي متحملته في سبيل انه يحس ويفهم .. انا مو من حقي اعاتب او ازعل من هالمقاطعة ؟؟ ياربي انا ماني حاسة ان امراءة متزوجة .. وللحين ماحنا عارفين متى تخلص القضية وهو بيقعد على الحال .. انا خلاص ماني قادرة اصبر .. جدام الناس انا متزوجة ومستانسة والله يعلم اللي فيني .. ماحد يدري من الناس بالقضية لاني متسترة عليها واحاول اتظاهر ان حياتنا عادية وماكو شي صاير ...

ارجوك دكتورة ناعمة ساعديني .. ادري في تفاصيل وايد ما ذكرتها .. بس مادري شاقول شاخلي

اذا في مجال احصل استشارة هاتفية او عالموقع بس تشرحيلي الطريقة

ملاحظة : انا كتبت مشكلتي من زمان بعنوان (ساعديني يا دكتورة ناعمة) بس ما ردت علي :icon1366:

وجزاك الله خير والله يفرجها علينا وعالمسلمين

 

[نسائيات]

رد : ارجوك يا دكتورة ناعمة ردي علي انا تعبانة وحيرانة

اختي انتي تنتحبين وزوجك مش هامه ما اعرف ليش فيه نساء كثيرات لا يستطعن التخلص من تسلط الزوج ومن دور الزوجه المضحيه لاخر حياتهن
ماذا تنتظرين ؟؟؟؟
اخبريني ماذا تنتظرين ؟؟؟؟؟
هل سالتي نفسك هذا السؤال ؟
اريد ان اسالك شيئا مهما
اختي اغاليه جدا فانا احببتك رغم عدم معرفتي بك فقط لانك طيبة جدا وبغباءوانتي مثل نساء كثيرات في عالمنا
هل فكرتي بنفسك ولو لبرهه هل فكرتي بان النقود اللتي تصرفينها على زوجك الغائب هي من حقك ومن حق ابنائك
هل فكرتي بانك ترسلين او تصرفين على زوجك ربما يكون قد تزوج عليك او لديه عشيقه وانتي لا تساوين عنده شيئا

اختي افيقي فان لم تنجدي نفسك لن ينجدك احد
اختي الغاليه زوجك استحلى العيش في الخارج وما عاد يفكر فيج ولا في ابنائه بس هي واجب زياره كل سنه مره يصبر نفسه اسبوعين معاكم
اختي فوقي بس من بذل النفس والتضحيه بس
كم بقى من العمر هل بقى من العمر قد اللي راح
اختي انتي تحبينه وتظنين بانك عندما تقفين لجانبه وتضحين سيحبك اكثر ويقدرك
اختي فوق فوقي
لا تقفي وراء قضيته اليس لديه اهل وين اهله خل يوقفون لقضيته
بعدين ما راح اقول لج ليش تحملين لانه عندي قناعه بان المولود هو رزق من رب العالمين وبقدومه ياتي الخير سبحان الله وهو انسان مقدر له ان يولد في يوم ويموت في يوم ولا انتي ولا غيرك يستطيع التحكم في هذا الموضوع ابدا
لكن توقفي عن بذل النفس
لا تتصلي بزوجك ابداا
اقطعيه ولا تقفي في قضيته
ان قال لماذا قول له انت رجل تحمل مسؤولياتك ولا تزوريه
اختي لا تهدري نفسك لشخص اقل القليل لم يتحمل مسؤولياته فهو شخص غير مسؤول وايضا لا يبالي بك فلماذا
هل سالتي نفسك يوما ماذا تريدين من الحياة ؟؟؟؟؟
اي ذاتك واي روحك لقد اضعتها وانتي تدفعين ثمن اخطاء زوجك
شيكات بدون رصيد هو من فعلها فتوقفي انتي لم تخطئي هو اخطاء وليتحمل
ويوم بيرجع الكويت بالخش بلغي عنه خل ينحبس في بلاده خيرمن سفرته برع
بس توقفي عن بذل النفس وفوق اعيالج محتاجين لج
ولا تمثلي دوم المضحيه لانه سياتي يوم تكرهين نفسك بسبب هذه التضحيه اللتي في غير محلها
فزمن البطولات ولا يا اختي اذا زوجك جبن عن التصدي لاخطائه وهرب لماذا تتصدين انتي لها ؟؟

 

[ريهــــام]

كلام الاخت حكاوينا منطقى جدا وواقعى وصراحة .....انتى طيبة وساذجة جدا........كفاية تضحية
ربى يعينك فى الخطوات الى جاية

 

[&زهور الياسمين&]

كلام الأخت حكاوينى صحيح مئه بالمئه

فيكفي عزيزتي يكفي كل ما بذلته من تضحيه من أجله أنظري لنفسك ولو مره واحده ولن تكوني قد ظلمتيه فانت الآن تظلمين نفسك وتظلمينه بمساعدتك له على الإستمرار بالهروب وعدم تحمل مسؤلية بيته وأولاده

وأعانك الله وسدد خطاك

الله يفرج همك وهم كل المسلمين والمسلمات...

 

[ضوء القمر]

أختي العزيزة .
مثل ما قالوا الأخوات زمن البطولات انتهى ...
لازم توقفي مع نفسك وقفه صدق وصراحة .. انتي شو تنتظري بالضبط وشو الشئ الي جالسه تضحي علشانه
وليش حالات الحزن والصراع الداخلي مع النفس ... يمكن انتي ما قصرتي مع أبنائك بس انتي الحين تظلمي نفسك والظلم حرام ... ما فكرتي ولو للحظة ليش هو ما يسأل عنكم مع أنه المفروض هو الي مسؤول عنكم ... "كلكم راه وكلكم مسؤول عن رعيته " انتبهي لنفسك زين ولا تنسي حقها ولا تعاقبي نفسك على جريمة انتي ما ارتكبتيها ..
الله يفرج عنك الغالية ويهون عليك مصابك .. ولجأئي الى الله فهو مفرج الهموم والكروب - الله يصلحك ويعطيك على قد نيتك ويحفظ أولادك الي هما محتاجلك أكثر من زوجك .

 

[Sun_Shine]

اختي الحبيبة حكاوينا

اخواتي الحبيبات المديرة ،، ضوء القمر ،، دروب العز ،،

جزاكم الله خير على ردودكم واحساسكم الراقي باختكم ،،:tears:

والله انا مو ساذجة ولا طيبة بس عندي ضمير حساس جدا جدا ،،، انا الحمد لله مو مهملة نفسي كلش عندي حياتي مع اهلي وصاحباتي ودوامي ومو مقصرة على نفسي بشي ،،

بس مرات تطق جبدي من كل شي ،،، استغفر الله يجيني وساوس ليش قاعد يصير لي جذي ؟؟
ابي يكون لي رجل في حياتي اعتمد عليه ويشاركني افراحي واحزاني ،، مو لأني ضعيفة ،، بس هذه طبيعة المرأة
وما ودي افكر باي رجل ثاني طالما انا على ذمته ،،

انا ادري ان المؤمن مبتلى وان ممكن يكون اللي فينا تكفير الذنوب ورفع درجات ان شا الله

انا مو كاسر قلبي الا عيالي اللي كل يوم يسمعوني كلام يقطع القلب عن لهفتهم على ابوهم وشوقهم له وتضايقهم من هجره وحرمانه لهم من حضوره واهتمامه و اتصالاته ،،، تدرون بنتي شتقول ؟؟ تقول احس ابوي يدوس على قلبي حيييييييل حيييل ،،، وهو ولا هنا ،،،، حاسين انهم يتامى وابوهم عايش :tears: :tears: :tears:


تدرون بشنو امثل حالتي ؟؟ مثل جرح مفتوح وكل ما يلمسه شي يعور اكثر ،، لا راضي يلتئم من نفسه ولا يتعالج

الحمدلله قاعدة احاول اعوض عيالي كثر ما اقدر واهتم فيهم وبنفسيتهم واحافظ على صورة ابوهم بنظرهم مع اني ودي اسب والعن فيه لانه ما يستاهل ظفرهم ،، في ناس غيره يتمنون العيال والله ما رزقهم ،، وهو عنده هالنعم كلها وما يحمد ربه عليها ،،

امي وبعض صديقاتي يقولون لي هو في حالة اكتئاب بسبب الظروف اللي يمر فيها ،، مرات اصدقهم ،، ومرات اشوفه يتصرف تصرفات واحد عادي ما اصدقهم ،،

انا ودي ارسى على بر وارتاح ،، يا يعيش معانا بما يرضي الله ،، والا ننفصل وافتك من عوار الراس،،

مع ان اهلي رافضين فكرة الانفصال ،، يقولون عشان عيالي وانه ممكن يتغير بعدين وصبري عليه ومن هالكلام ،،
مع الاسف ماحد فاهم احساسي شنو ،، اوكي صحيح العيال راح يتأثرون وممكن يتعقدون ،، بس انا راح اتعب اكثر لما اعيش مع واحد مهمل وسلبي لهالدرجة ،،

انا مقدرة تعاطفكم ،، واؤكد لكم انا مو ضعيفة ،، بالعكس هو يقول حق زوج اخته انا موو قادر اتعامل معاها لان شخصيتها قوية واحسها اقوى مني ،،

ناطرة ردودكم على احر من الجمر ،،،

وارجو من الدكتورة ناعمة انها تقرأ مشكلتي وتشور علي شسوي ؟؟؟؟؟؟

 

[نسائيات]

رد : ارجوك يا دكتورة ناعمة ردي علي انا تعبانة وحيرانة

اختي زوجك رجل غير مسؤول بتاتا
هل تعلمين شيء زوجك بشيكاته اللي من غير رصيد يعني ديون اذا مات راح تغله في قبره
زوجك لم يتحمل مسؤولية افعاله وهرب وهرب لديره ثانيه ليعيش براحه بس هذا مش حل الرجال افعال وزوجك لم يكن رجل بفعلته ابدا تركك تواجهين هذه الامور الصعبه وجه يردك ووجه يصدك اين رجولته
اختي ريحي نفسك لن اطلب منك الانفصال فهو ابغض الحلال لكن اهجري وقاطعي زوجك نهائيا لحد ما يرجع ويواجه الموقف اللذي تواجهينه
اختي لا تهدري روحك وقلب ونفسيتك ونفسيتك اطفال اكثر من هذا توقفي
زوجك 3 سنوات وهو يمر في مرحلة الاكتئاب ؟؟؟عجيبة والله
زوجك مرتاح لوضعه ومش هامه شيء
بالفعل انتي اقوى منه لانه ضعيف ولا يستطيع المواجهه وانتي تظنين بان زمن البطولات موجود وتشعرين بانك قوية كلما ذهبت للمحكمه لتدافعين او لتحلين مشكلته
اختي توقفي فهو لا يستحق اهجريه واغلقي تلفوناتك في وجه دعيه يكلم فقط ابنائه اما انتي فاقطعي كل اتصال به واخبريه وعن طريق مسج انك لن تتحملين اي مسؤولية تخصه بعد اليوم المشكله مشكلته عليه بالعوده وليحلها بنفسه فهروبه لن يحل شيء
حتى هذا الطفل اللذي في داخلك هل تعتبرينه امتدان لعلاقتك به ؟؟؟؟لا هو ليس امتدادا ابدا فزوجك غائب مهما فعلت ولن يعود بهذه الطريقه ابدا
عليك بالحزم في امورك كافه تخلصي من كل مشاكله وعقده وعيشي بدون التفكير بها عيش من اجل نفسك واطفالك فهو في هذه المرحله محتاجين لك كثيرا

 

[Sun_Shine]

اختي الحبيبة حكاوينا

مشكورة على اهتمامك ومتابعتك لمشكلتي ،، :a194:

انا تقريبا مطبقة 90% من نصايحك من زمان ،،

بس اللي مخليني للحين مو مطنشة 100% هو عيالي لما يتكلمون عنه ،، او استفسار الناس عنه ،،
يعني كل ما قربت انسى يذكروني ،،

انزين سؤال شرعي ،، هل لما اهجره وما اتعامل معاه علي اثم او ذنب ؟؟ ما يعتبر نشوز ؟؟؟

انا مو خايفة الا من ربي لانه ما يستاهل حتى اتكلم عنه ،، :sad_1:

يارب ترد علي الدكتورة قريب آمين

 

[نسائيات]

رد : ارجوك يا دكتورة ناعمة ردي علي انا تعبانة وحيرانة

اختي كيف يعتبر نشوز زوجك هارب لا يقوم بحق الولايه عليكم ولا حق الصرف عليكم و حق القوامه
وما هي القوامه ؟؟؟؟هو لا ينفق ولا يحميكم و لا يتواجد معكم اذا فلماذا تخافي على حقوقه
اختي انتي عندج ماشر الضمير وايد صاحي خفضيه شوي ومثل ماقلت لج لا تردين عليه اكتفي بمسج انج ما راح تمشين له في قضيته ولا راح ترسلين له فلوس هو ريال يقدر يدبر نفسه لو يشتغل شحات ولو رجع الكويت بلغي عليه ينحبس
اختي عيالج لا تخلينهم يقطعونه خليهم يكلمونه بس انتي لا
واذا احد ذكرج فيه وسالج عنه قول لهم بخير وسكي الموضوع اول طلبي منهم ما يتكلمون في امورج الخاصه
ترا الناس تعرف انج تعبانه وترمس من وراج فماله داعي تتصنعين الفرح

 

[سما دبى]

الست متزوجه وعندها أطفال
طبعا لازم تحارب عشان تلم شمل أسرتها
اللى يقولون لها كفى عن بذل النفس؟؟؟؟ كيف لهم ذلك

أتقوا الله يامشرفات عن تحريض زوجه على خراب بيتها

عسى الله أن يلم شملهم قريبا ان شاء الله

 

[مرحة : )]

رد : ارجوك يا دكتورة ناعمة ردي علي انا تعبانة وحيرانة

عسى الله أن يلم شملكم قريبا ان شاء الله

 

[Sun_Shine]

اخواتي الحبيبات ،،،

جزاكم الله خير على الدعوات الحلوة :bye1:

ان شا الله الليلة ترد علي دكتورتنا العزيزة

 

[بزوغ الشمس]

اختي الله يعينج على هاي المصيبه
بس عندي ملاحظه اتقولين خايفه على نفسية عيالج اذا انفصلتوا .....أوكي هلي حاصل الان معاج مب صوره من صور الانفصال يعني مب موجود معاكم وما يتصل ولا يصرف ولا يدري عنكم ......هذا كله تعذيب لج ولعيالج وحتى نفسية بنتج تعبانه مثل ما قلتي .
انت بهاي الطريقه تستنزفين نفسج وأعصابج وصحتج على الأقل فكري بصحتج لان اذا انت استوى فيج شي لا قدر الله منو بيهتم في عيالج على الأقل خل واحد منكم موجود مع اليهال بكامل صحته وعافيته ونفسيه سليمه وهالفلوس الي اطرشيهم حقه هذا انتي وعيالج أولى بها

والله يفرجها عليج ولا تزعلين من كلامي حبيت أوضح لج هالامر

 

[Sun_Shine]

[grade="008000 FF1493 800080 0000FF"]اختي الحبيبة بزوغ الشمس

اسمج نفس اسمي بس بالعربي الفصيح ،،،

مشكورة عالرد والدعوة الحلوة ،،،

انا ما ابعث له فلوس حاليا ،، اهله هم اللي يبعثون له ،،

وكلامج صح بالنسبة لعيالي ،، الله يعيني ويثبتني آمين[/grade]

 

[Sun_Shine]

[grade="FF1493 32CD32 4169E1 800080"]ارجوك يا دكتورة ناعمة عطيني جواب

ودي افهم ليش زوجي قاعد يتصرف جذي خصوصا مع عياله ؟؟؟؟

معاي نقول اوكي ماله خلق نجرة وكلام قاسي ،، بس العيال ما لهم ذنب انه هو ابوهم وانا امهم !!!

يا ربي يا حبيبي افرجها علي وعلى المسلمين من اوسع ابوابك آمين يا ارحم الراحمين[/grade]

 

[زهرة البوادي2006]

كلام الاخت حكاوينا صحيح وانا اضيف مع كلام بعض كلام مثل قول ( انها تقاطعه وتشوف هل سيفيق ام لا لان الي ان فهمته من الاخت صاحبة المشكلة ان اصلن هو معتمد عليها ان هي الي تصرف وتربي وتتابع قضيته اختي اتركي قضيته على جانب ولا تسألي عنه وفي نفس الوقت ادعيل له بالرجوع وجمع الشمل وشوفي ويش يصير صدقيني يأختي راح يحس وبتجي يوم وبيمل وبرجع الديرة

 

[Sun_Shine]

اخواتي الحبيبات

مساكم ورد وفل وياسمين :icon26: :icon26: :icon26:

لا تنسوني من صالح دعائكم اذا قرأتم مشكلتي ،،

وادعو لي ان دكتورة ناعمة ترد علي قريب جدا جدا جدا :c016:

 

[قلب في جسدين]

[ALIGN=CENTER]

[CELL="filter:;"] [ALIGN=center]حبيبتي ليه ماتتصلين بالمركز وتكلمين السكرتيرة ويصير لك برنامج استشارات خاص بك، أتوقع تستفيدين من الدكتورة أكثر وتكون لك مواعيدك الخاصة ..

الله يرد لك زوجك ويهنيك فيه ويعوضك الحرمان الي عشتيه، وتكونين مثل أم بسمة تكتبين لنا قصتك كاملة إذا انتهيتي منها بإذن الله ..

وهذا رابط موضوع مملكة بلقيس http://www.uaebalqees.com/vb/showthread.php?t=2156[/ALIGN] [/CELL]

[/ALIGN]

 

[Sun_Shine]

[grade="00008B FF6347 008000 4B0082"]حبيت ارفع موضوعي اليوم[/grade]

 

[الحنونه]

رد : ارجوك يا دكتورة ناعمة ردي علي انا تعبانة وحيرانة

الله يفرج عليك
ان الله مع الصابرين.........