اختفى زوجي!!

و

ورود منثورة

New member
إنضم
2006/12/08
المشاركات
19
السلام عليكم ورحمة الله وبركاته....

هذه اول مشاركة لي وحبيت استشيركم خواتي...

مثل ما بينت في العنوان زوجي صار له مختفي عن البيت 4 ايام
وهذه مب اول مرة يسويها . انا بموت قهر من حركته هذي ما ادري شو بسوي اذا رد

ما ادري اطنش واسويله طاف كأن وجوده مثل عدمه

او اطربق الدنيا على راسه اذا رد

مع اني مجربة الطريقتين وبعد ما في فايدة قولولي شو الحل مع هذا الريال

والله قهر....​
 
كيف يعني مختفي ؟؟؟
وين راح عمل مثلا؟؟؟
و لا زعلان ؟؟
ولا مسافر وما يبيج تزعجينه ؟؟؟؟؟؟
في كل الاحوال تحتاجين حل نهائي يادب هذا الرجل لانه يفعل ما يحلو له خاصه اذا كان مسافر
 
ملك حياتي حركات زوجج نفس حركات زوجي الله يصبرنا عليهم
مع أني فقد ة الصبر
 
الله يكون في عونك اختي ملك حياتي الجائى الى الله في الثلث الاخير من اليل مجرررررررررررررب ولاتنسينا من دعائك
 
مشكورات خواتي على الردود

زوجي هو ولد عمي ونحن ساكنين عند اهله

وهو من زمان يسوي هالحركات وانا ياما تكلمت مرة وياه ومرات مع اهلي ابوي وعمي
لكن ما في فايدة
هو يحب السهر وايد
هو دايما يقفل موبايله برقم سري عسب ما اشوف اللي فيه
بس مرة بالصدفة شفت البلاوي اللي فيه مت قهر كلمته وقلته شو هذا
قالي هذيله الشباب مطرشيلي لكن الواضح من التصوير انه تصويره هو لانه بعضهم سمعت فيهم صوته

عصبت وزعلت و... صحت وقلته انت طلعت من هالنوع من الرياييل انا ما اصدق

سألته انت ليش سويت جي هل انا السبب قاللي لا انت مب السبب وحسيته ندمان
وقلت عسب اصدق انك ندمت خلنا نروح انا وياك العمرة ونبتدي صفحة يديدة

ورحنا وهناك عند بيت الله مسكني من ايدي وقاللي انا الحين بحلفلج ان البنات اللي بالصور
ابدا ما مسيتهن ...

المهم ردينا وكملنا حياتنا بس بعد فترة قصيرة رد للغياب عن البيت والسهر

ادري اني طولت عليكم بس ما ادري شو اقول والا اقول

بس الطلعة الاخيرة انا كنت امزح وياه وهو قبلها توه قاللي انه ياي من الدوام مع انه كان الوقت فليل
لانه موبايله كان يرن وايد وهو يحطه عالصامت ويكلمني
قلتله رد عليه فكنا من الازعاج قاللي هذا مسؤولي في الدوام يباني
قلته ليش مب انت توك تقول جيت من الدوام ليش متصل عيل
قاللي لا انا سرت الدوام بس ترخصت ساعة وراد الدوام والحين المدير يستعيلني ( شفت رقم المسؤول)

ولاني انا الشك بعده ما راح عني 100 % بس ما بينتله قلتله وانا امزح
خلني اشوف الموبايل بس ويه زوجي تغير وحاول انه يتهرب واونه طلع مستعجل للدوام
وهو طالع قلته ( اوكي خلي الدوام ينفعك )
ومن هذا اليوم للحين يا عين ما شافته لا اتصل ولا رد البيت

انا اسفة مره ثانية اني طولت عليكم بس ما ادري شو اسوي
اشتكي لمن خلاص اشوف انه ما في حل وياه لين متى وانا اصبر عليه

احاول اني ما ابين جدام الاهل اني زعلانة او مضايقة بس مش معقولة انهم ما يدرون لاننا ساكنين
في نفس البيت

لا حول ولا قوة الا بالله :no:
​
 
1314132760495194113.gif


غاليتي

واضح انك تشكين في ان زوجك له علاقه مع غيرك
انصحك بدورة الاستاذه ناعمه

اما موضوع غيابه
فلابد من ان تدخلي والده في الموضوع
عشان يسوي حساب شوي
​
 
الله يكون في عونك اختي ملك حياتي
 
الله يكون بعونك عليك بقراءة سورة الكهف وسورة الزلزلة واية الكرسي
 
الله يكون فى عونك عليك بالدعاء له ولك والتزمى بصلاة النوافل وتقربى لله ان الله بجانب عباده دائما​
 
غاليتي

أصبري .. فأن مع العسر يسر ... بأذن الله ..


وانتي مأجورة بأذن الله .. على صبرك ...


و خذي من نصاايح الاخوات .. الاستشاارياات ..


و الله يكون بعونج ..
 
لاحول ولا قوه الا بالله 000 اختي عليك بالأستغفار والدعاء داااااااااااااااائما لزوجك ان الله يسخره لك 00
ونا في رايي ان اهله لازم يتدخلون في الموضوع وضحي لهم بطريقه انك ماتدرين وينه وانك خاااايفه عليه علشان اذا رجع تكون السالفه كبررررررت ويصير يحسب حسابك وحساب اهله المراااات الجايه00
 
يا متزوج يا عنده وحده راقبيييه عدل لان اذا يتركج بالايام معناته علاقه مب بسيطه ولازم تصرفين لاتسكتين وتخلينه

يروح لغيرج
 
الله يعينك حبيبتي
بداية عليك بالدعاء وقيام الليل خاصة وان هذه الفترة من فترات الاستجابة
ما بالنسبة لزوجك
فرايي الشخصي : هو عدم المبالاة لا تسالين عنة ولا تعبرينه واهتمي بنفسك وغيري من شكلك ( نيو لوك ) وعيشي حياتك من زيارات للاهل والاصدقاء والسينما والمطاعم وغيرة .. واذا اتصل عليك لا تردين ( المهم انه يشوف النيو لوك ) وخلية يركض وراج حتي يتمنى يشوف رقم تلفونك بجوالة وانة يحرم سهراو نوم خارج البيت
حاولي انك تحسسية بان الفترة الي راح يكون فيها بره البيت راح تفوتة او تطوفة اشياء حلوة
عاد انتي وشطارتج
سوري اذا ردي غير واضح لاني كتبت الموضوع وانا محترة ومقهورة ( اعاني من نفس المشكلة ولكن بصورة مختلفة )
 
مرحبا عزيزتي الموضوع كبير والواضح انه ضامنك واهله مع الاحترام سلبيين فانا ارى انك لازم تتخذين خطوه جريئه وجديده شيلي ملابسك وكل اغراضك وروحي بيت اهلك بصمت ولا تردين على مكالماته ولا تخلينه يشوفك الا بعد مايموت من الانتظار ويحس بغلطه واكتبي شروطك بورقه قبل لا ترجعين وخليه يوعد ابوك او احد من اخوانك انه لن يعيد الكره وخليه يفهم في البدايه انك ماعاد تبغينه ومن ضمن شروطك انه يحترم خصوصياتك وتحترمي خصوصياته بدون مايقفل موبايله برقم سري لان هالتصرفات تثير حفيظة اي شخص الله يعينك يارب.
 
معقول يغيب عن منزله بلا سبب أكثر من 4 أيام ؟!!
عزيزتي لا أريد أن أخيفك أكثر و لكن لابد أن لدى زوجك شيء ما يخبئه ..فليس من الطبيعي هذا الغياب بلا سبب معقول..أهم ما في الأمر أن تحلي هذه الإشكالية .. لا تتركيه يستمر بنفس النمط أي أن يلجأ لترك البيت عند أي خلاف ..لأنه حينها سيبحث عن أي خلاف فقط ليجد سبباً لخروجه..
ألجأي إلى أي طريقة تمنعينه فيها هذا السلوك ..وبعدها إلتفتي لبقية أجزاء المشكلة..
كان الله في عونك و فرج همك ..
 
السلام عليكم ورحمة الله وبركاته...

اشكركن خواتي على الردود

هذه مب اول مرة يغيب مثل ما قلت من قبل

وبالنسبة لرأي بعض الاخوات اني اروح بيت اهلي انا سويتها من قبل وخلاني هناك 6 شهور وانا
كنت مصممة على الطلاق وهو ما سأل عني ولما شبع صياعة وحرية
راح كلم ابوي وابوه بما انهم اخوان وما حبوا انه يصير طلاق تصالحوا بينا على وعد انه يتعدل

المشكلة يا خواتي انه كل ما زعل او صار شي بيننا يترك البيت لايام وبعدين يرد كانه ما صار شي

والله تعبت اروح لمن ان تكلمت لاهله ما يصير شي ولا يتغير بس فضيحتي عند هله وخواته
وامه وابوه يقولون لي صبري وادعيه له بالهداية هذا اذا رديت عليهم وخبرتهم عن ولدهم
اما اذا يبون شي منه يكلموني ويتشكون منه

شو الحل الحين عطووني حل شو اسوي اذا رد

خواتي ساعدوني وخصوصا د موزة​
 
حبيبتي ملك باين ان زوجك راعي علاقات والله اعلم

من سردك لمشكلتك يبين ولذالك اقولك لازم تكون لك ردة فعل حازمه من هذه الناحيه

خاصة اذا كنتي متاكده ان الصور الي بجواله مخله سواء كنتي شاكه انه حاضر بهذي الاماكن او مجرد بلوتوثات وصلته الفكره وحده وبالتالي لازم ردة فعلك تكون حازمه ورافضه لهذا الامر

لازم تفهمينه انه لايمكن تستوي الحياه بوجود الحرام ولا يمكن تصبح حياتكم سعيده ويوجد بها خلل مثل هذا

فهميه انك لا يمكن ترضين بالخيانه حتى لو لمجرد المتعه القصيره

وان هذا امر غير قابل للمفاوضه والمساومه واذا الامر بسبب تقصير منك فيجب عليك تصحيحه بتعديل نفسك


واذا الشغله مو بسبب تقصير منك فانت اكرم من ان يساوي بائعة هوا بك كزوجه

كوني حازمه في مسالة الخيانه واعلمي ان الخيانه لابد فيها من المواجهه لانها خط احمر لا يمكن مجاراة الحياه بوجودها

اما مسالة غيابه فاعتقد ان السبب ماذكرتي من اشتباهك في علاقاته ويجب ان تكوني حريصه فقد يكون ممن سلك طريق المخدرات لا قدر الله

وفي الغالب ان سبب غيابه الطويل هو اطمانانه بانك مع اهله ولست وحيده في بيت مستقل

فلا يهمه وضعك لانه يعلم انك في مامن

برايي يجب منقاشته وبشكل حازم واظهار ان هذا الوضع لايمكن السكوت عنه وهذا لايعني اني اطلب منك الصراخ ورفع الصوت والمضاربه لا

انا اقصد نقاش حازم تتكلمين فيه بكل جديه وبكل ثقه عن عدم رضاك بهذا الوضع وانه لا بد من تعديل سلوكه فاذا لم يتجاب استخدمي بعض الطرق الاخرى مثل عدم التحدث له (تبغضينه ) وخاصة انك تبغضينه لامر شرعي في ارتكاب لمعصيه كبيره
حاولي باكثر من طريقه واجعلي مشورة الاهل واعلامهم بالمشكله اخر الحلول


ورودي لك عزيزتي
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل