اختاري صح من البداية ..التغيير غير مضمون

[راجيه الرضا]

نقول تاني و تالت ورابع وعاشر

ما تدخلش مشروع جواز ...والطرف التاني فيه عيب قاتل... او فيه طبع مرفوض بالنسبالك ومش هتقدر تتحمله ... وتكمل معاه علي أمل انه يتغير.

عاوزة تتجوزي واحد بيصلي ...استني اللي بيصلي وماترضيش بواحد مابيصليش وتقولي ربنا هايهديه.

عاوز تتجوز واحدة رفيعة...ما تروحش تخطب بنت مش رفيعة وتطلب منها انها تعمل دايت وتفضل تتخانق معاها علي الموضوع ده .

عاوز تتجوز واحدة لابسه نقاب ومش قادر تتخيل ان زوجتك من غير نقاب ....روح دور علي واحدة لابسه نقاب ....ماتروحش لواحدة مش منتقبة ومش مقتنعة بيه وتفضل تتخانق معاها عليه٠

عاوزة تتجوزي واحد رومانسي...ماتروحيش تتجوزي واحد عملي جدا ومالوش في الكلام والحركات وتقولي هاغيره بعد الجواز...في الغالب هترجعي تشتكي من الحرمان العاطفي.

عاوز تتجوز واحدة مابتشتغلش...ماتروحش تتجوز واحدة بتشتغل وناجحة في شغلها وعندها طموح وظيفي وتقول هاقعدها في البيت.

مابتعرفيش تتعاملي مع الشخص العصبي خالص... ماتتجوزيش واحد عصبي علي أمل ان ربنا هايهديه وهيبقي هادي مرة واحدة.

عاوز تتجوز واحدة كيوت وهادية....ماتتجوزش واحدة عنيدة ولمضة وتفضل تتناقر معاها طول العمر...روح اختار واحدة كيوت.

عاوز تتجوز واحدة مكحرتة وبتشيل مسئولية ... ماتتجوزش واحدة خبرتها قليلة وتفضل طول الوقت تحسسها انها بروطة وخيبة.

ليه؟
اولا : ماحدش يا جماعة بيتغير بعد الجواز بعد ما أتربي علي حاجة او علي طبع معين لمدة ٢٥ او٣٠ سنة ( الا في حالات نادرة ).

ثانيا : حاجة زي الزفت انك بعد ما توافق انك ترتبط بحد ....انك تحسسه انك مش متقبله...شعورك انك مش مقبول من شريك حياتك شعور في منتهي القسوة.

ثالثا : لان شريك حياتك فيه عيب او طبع انت مش قادر تتقبله...الموضوع ده بيبقي نقطة توتر في حياتكم بتجيب مشاكل بشكل مستمر

اللي بيقولك ان كل الناس بتتغير بعد الجواز ..ده واحد بيحاول يقنعك بحد هو مقتنع بيه حتي لو مش بيناسبك انت.

عندنا حالات طلاق كتير في مصر ...احد اهم أسبابها ان الناس بتختار أصلا الشخص الغلط

الناس مختلفين... وكلنا فينا عيوب ...وماحدش فينا ملاك...لكن لما تتجوز اختار حد تقدر تتعايش مع عيوبه وطباعه... عشان لو الطباع دي ماتغيرتش ( وده اللي هيحصل في الغالب) تكمل معاه وانت راضي ومتقبله

#دفا_البيوت
#محمد_فتحي