احتياجات الطفولة التي تؤثر على علاقة الزوجين

[راجيه الرضا]

احتياجات الطفولة الى بتأثر على علاقتنا

احتياجنا للاحترام و الحب لما كنا بنتهزأ على كل غلطة بيخلينا دايما دفاعيين جدا لو شريك الحياة وجه نقد لينا و لا نعترف بالغلط أبدا هروبا من الاحساس بالخزى

احتياجنا للأمان و الطمأنة لما كانوا بيزعلوا مننا و يخاصمونا كنوع من العقاب بيخلينا نترعب من زعل شريك الحياة و نتوتر جدا و نتخانق اكتر لو بعد شوية فى محاولة للتهدئة

احتياجنا للاحساس بالقيمة الذاتية لما كنا بنتمدح بس على انجازاتنا او على شكلنا خلانا حريصين جدا على انجازاتنا ربما على حساب شريك الحياة و على منظرنا أدام الناس

لما كنا بنتعاقب على التعبير عن مشاعرنا بالبكاء او الصراخ او حتى الانعزال ،واحتياجنا الى القبول كأطفال ممكن تغلط و تتعلم ،ممكن يخلينا ندارى مشاعرنا و افكارنا عن شريك الحياة لما نكبر و بعدين نشتكى انه مش بيفهمنا

لما اتحرمنا من الحرية و الاستقلالية لما كانوا خايفين علينا زيادة عن اللزوم ممكن يخلينا لما نكبر محتاجين قدر اكبر من الحرية مع شركاء حياتنا و بنتخنق من تحكماته

الحرمانات كتير
و أثرها علينا كبير بلا أدنى شك
و دا بيأثر على علاقتنا بشركاء حياتنا بالطبع

انت ممكن تبان أدام الناس كلها كيوت و طيب و حبوب و الناس كلها بتحبك لانك مش محتاج حاجة منهم

بس كل مشاكل التربية و الطفولة ما بتطلعش إلا على علاقتك الحميمية بشريك حياتك لانها البديل للأب و الأم و لأنك فى اللاوعى حاسس انها الأمل الوحيد لتلبية الاحتياج الناقص

و بشكل لاواعى تماما بتبقى عاوز منه الى كان ناقصك فى طفولتك
و بتلح و تعافر و تتخانق و تحارب علشان تحصل على احتياجك منه

الوعى و المعرفة أول طريق الحل

#دعاء_راجح