احتاج اتأكد بسألك اربع اسئلة وانتي اختاري
(ركزي زين)
السؤال الاول :
زوجك انطوائي أو اجتماعي ؟
1- انطوائي مو معناه انه قاعد مع نفسه ومايحب الناس لا ! انطوائي عنده علاقات زي كل الناس لكن مو كثير يعني وتحسين قليل اللي قريبن منه وغير كذا تحسين ان لو راحوا الناس مايفرق معه .
2- اجتماعي يعني عنده علاقات كثيرة فيه ناس متعلقين فيه ، علاقات له ومتشعبه ومتوسعه وماعنده مشكلة يخش مع الناس وتحسين ياخذ طاقته من الناس.
واذا احترتي بين اجتماعي وانطوائي شوفي في صفه فارقه الانطوائي لو اجتمع وسولف وكون علاقات لابد يحس بغثه من الناس ويحس وده يقعد مع نفسه ويسترخي لانه ياخذ طاقاته من نفسه .
الاجتماعي صح يقدر ان الشخص لازم يقعد مع نفسه لكن مايجيه ذاك الشعور اللي يغثه من الاجتماعية الزايده بالعكس ياخذ طاقاته من الاجتماعية .
السؤال الثاني :
زوجك حسي ولا حدسي ، يعني مصدر التعلم عند زوجك يكون ؟
1-حسي يعني بالحواس الخمس يعني لو بيفهم شئ لازم يتم شرحه بالحواس الخمس او يمثل عليه او يجسد امامه ويكون غالبا هذ النوع حرفي و يعبر بحواسه وعنده لغة جسد وتعبيرات وجهه ظاهره.
2-حدسي يعني بالعقل يعني لو بيفهم مسالة علمية يقراها ويفهمها بعقله مايحتاج تمثل امامه غير كذا تحسينه انسان جامد تعبيرات وجهه مو 100% ظاهره . في اكيد تعابير وجه تظهر بس مو نفسي الحسي .
وطبعا كل انسان عنده هذا وهذا لكن يكون فيه ميل الانسان الحدسي لو شغلتي محاظرة فيزياء مجرد صوت يفهم الانسان الحدسي لازم شرح وكذا .
السؤال الثالث :
زوجك عقلي او عاطفي
1- عقلي ينظر للامور بالعقل عنده عاطفه شئ طبيعي لكن العقل من يقوده
2- عاطفي ينظر للامور بعاطفه عنده تفكير عقلاني شئ طبيعي لكن العاطفه غالبه على قراراته
السؤال الرابع :
طريقة التعامل مع الحياة :
1- منظم، صارم، وحازم يعني اذا بدا شئ لازم يكمله يحب ينهي المواضيع يحب يخلص الشئ بسرعه
2- فوضوي، مرن، ومتساهل يمكن يبدا بمشروع وبعدين يتركه بدون مايكمله ، مو مره الامور عنده سيده يعني مرن لين.
وبس هذي الاسئلة بإذن الله بعد ماتجاوبين ان شاء الله راح تتضح شخصية زوجك وانا ابغاك بعد ماتختارين الاجابة الصحيحه لزوجك .. ارجعي واسئلي نفسك الاسئلة وجاوبيني عن اختيارات زوجك
وعن اختياراتك ..
