ابي اتطلق وصليت استخارة كذا مرة بس محتاااارة

[القطار السريع]

هلا يا بلقيسيات
مشكلتي واضحة من العنوان
ابي اتطلق والاسباب:
صح اني احب زوجي لكنه ما يصلي
ومع اقل هوشة يظل يصارخ بانصاص الليالي ويطردني انا وبنته في الشارع
واضطر ساعتها اروح لامي

وطبعا اهلي رعبهم كله هالحركة اذا اروح لهم بانصاص الليالي 3 او 4 الصبح وادق عليهم الباب
هذاغير انه ما عنده مانع يصارخ بنص غرفة النوم اللي نايمة فيها بنتي ويفززها مرعوبة وتحضني وهي تبكي واطلع انا معاها الشارع ويقفل ورانا الباب

هو الحين صار له مسافر خمس شهور وقبل شهر عصب على سبب تافه ورسل مسج لصاحب العمارة اللي احنا متاجرين منه الشقة وكتب له انه يبي يطلقني طبعا انا استغربت لما جا الرجال وقف ساعة عند الباب ينصحني شسوي لدرجة اني بكيت

هو دايما يوصفني بالفاظ بشعة ما تنقال حتى - لعزكم الله - لبنات الشوارع والفاظه وايد وسخة

ورسل لي مسجات وايد كاتب فيها طالق واكثر من مرة
ونفس الشي كان ساعة اللي يعصب ويتهاوش وهو معاي اصحى الصبح ا هو كاتب طالق
وراح المحكمة مرتين يطلقني وجاب لي الاستدعاء حتى اروح اتطلق

اهلي تعبانين من هالشي
وصديقاتي معصبين علي ويقولون لي انت ما عندج كرامة كيف تستحملين كل هذا بحجة انج ما تبين تحرمين البنت من ابوها

مرة وحدة تهاوشنا ورحت لامي البيت جا تهجم علي في بيت امي وضربني بسكين لدرجة ان امي اغمى عليها وظلت بعدها اسبوعطايحة مريضة

الحين هو مسافر وانا حسيت بالفرق بين وجوده وعدمه وشفت اني مستقرة وايد بدونه
صليت البارحة استخارة واليوم صليت نفس الشي بنية الطلاق

وبعد ما صليت كتبت له مسج انه اذا يبي يرجع لازم يوقف كل تصرفاته القبلية
وهي انه ما يطردني مع بنتي بانصاص الليالي وانه ما يفزز البنت بصراخه وسط غرفتها في الليل لان احس البنت خلاااااااااااص تعقدت
المهم انه رفض المسج وقال انا راعية مشاكل وانه بالمختصر مو موافق على هالكلام اللي انا كتبته في المسج
وقال انه ما بيرجع بس ما بيطلق وبنكون بين الناس عالاقل احباب

بنات انا اللي معذبني اني خايفة اظلمه واظلم بنتي
ومحتارة مع اني صليت الاستخارة
جيت استشيركم بكل الموضوع
شوروا علي شسوي انا الحين؟؟؟؟​

 

[مطرية]

حبيبتى

ماذكرتى لنا الصفات الايجابيه فى زوجك؟؟

يعنى فيه صفات يستاهل انك تناظلين لتغيره ؟؟

 

[ألحان نازفة]

شوفي أختي اللي ما يصلي مافيه خير للناس .. بغض النظر عن انك تحبينه او تشوفين ايجابياته الصلاة اهممممممممممممممم شئ .. ترا ادا ما اصلح صلاته واللي هي الصلة بينه وبين ربه ما بيصلح علاقته فيك اول شئ تطالبين به هو يحافظ على صلاته ادا ما تعدل ما يجوز لك تقعدين عنده
الله يصلح أحوالكم..

 

[القطار السريع]

صفاته الايجابية انه كريم في صرفه
المصيبة ان حتى هالشي احسه تغير بعد ما سافر وصار يصرف علينا ببخل
مع اني متاكدة انه عنده لانه انسان مشهور وشغله يدخل له دخل زين

انا الكل يقول لي اني صبرت عليه وايد
بس انا صبرت عليه لاني تزوجته عن حب
صار لي ست سنين صابرة
بس و شايفة تغيير

الين البنت كبرت وتشوفه ما يصلي
صارت تعتقد ان الرجال ما يصلون
لدرجة انها فاجئتني بهالشي لما قالت لي​

 

[القطار السريع]

اختي الحان نازفة مو قادرة اغير فيه هالشي واخليه يصلي
هو صار له سنين ما يصلي
ولما ناقشته في البداية قال مو مقتنع بمسالة الصلاة
وع الوقت صار يعصب اذا اكلمه ويسب فيني وفي الله <<<< استغفر الله العظيم ياربي​

 

[سـمـاء]

تعيش بنتك من غير اب احسن من انها تعيش معه وهي كااارهته
يعني اب مثله مايكون سبب ترددك بطلاق اذا انتي عايفته
الله يكتب لك اللي فيه الخير

 

[الاميــره]

الله يفرج همك ياااااااارب

 

[امل لايموت]

كان الله في عونك وافرج همك وارشدك لطريق الصواب

 

[ناني الشاميه]

اذا تبين رائي دامك ارتحتي بغيابه واستقريتي
تطلقي
وانتي استخرتي
وشوفي البنات الحكيمات ايش يقولون لك

 

[linoo]

والله حسيت من كلامك انه ما في ولا حسنه لا صلاة ولا أخلاق يعني لا دين ولا دنيا وشو يطردك من بيتك عيب علية كملي استخارات بس الله يرشدك للصواب

 

[رندا كووول]

مايصلي ..مو مقتنع اساسا بالصلاه...ويسب الله الخالق .استغفر الله...ويضربك بالسكين
وطلقك اكثر من مره ويمكن تكوني محرمه عليه وانتي ماتدري..وعقد البنت بصراخه...
واستخرتي خلاص ايش تنتظري ..الله يعوضك بحياه مستقره

 

[كيان العشق]

الله سبحانه وتعالى لعن الي يفرق بين الزوج وزوجته صعبه اقولك اتركيه
بس ع الاقل حطي حد للي يصير خلي اهلك واخوانك يتدخلون يمكن ماشاف احد يوقفه

الله يسخر لك زوجك ويلين قلبه

 

[دلع قلبه]

شوفي احيانا عيشة الاطفال بدون اب او ام او كلاهما يكون رحمة لهم!!

يعني الحياة استقرار ومودة واحترام اذا فقدت وش بقى !!

دائما اذا احترتي في امر استخيري واكتبي ايجابيات هالامر وسلبياته

القرار وقتها بيكون اسهل
في رايي ضاع من عمرك 6 سنين في محاوله لاصلاحه
لكنك لاتهدي من احببت ولكن الله يهدي من يشاء!!
انتي سويتي اللي عليك وزيادة وصبرتي على اشياء مااحد يصبر عليها
انثى ومعاها طفله وبكل بساطه تنطرد بنص الليل وين كرامتها وين وصايا الرسول اللهم صلي وسلم عليه فيها وين الرجولة اللي تحفظ لها قدرها وقيمتها
صدقيني بنتك لو بتظل معاه ممكن تصاب بعقد نفسية تتمنين انك ماجبتيها
هذا غير ان تربيتها مع اب مايصلي ويغلط على رب العالمين بيكون امر صعب جدا جدا
استخيري وخليك عند اهلك بكرامتك وكرامة بنتك تتربى صح وفي جو ايماني حقيقي بإذن الله
زوجك لو شاف انه ما يستاهل وانه غلطان
بهجرك له وبطلبك لطلاق لسترداد كرامتك
ممكن يرتدع ويتعدل
لكن مع الاسف اغلبنا تسكت على الظيم والقهر بحجة انه ممكن يتعدل وينصلح
وهو يشوف بما انها صابره يعني راضيه ومعجبه فيه وفي سوء اخلاقه
لكن لو كل امراة اتخذت موقف حازم مع زوجها الظالم (وانا هنا اتكلم عن بعض حالات )
كان ممكن يحس بغلطه وينتبه لنفسه ويعدل اخلاقه..

 

[القطار السريع]

موتوني من البكا والله العظيم
مو قادرة اتمالك نفسي

انا اهم شي عندي الصلاة والصوم
والكل حاول معاه ما فاد

يا الله بيوقف قلبي من الهم
ومع هذا ما ابي اظلمه

انا لحد الحين صليت 3 مرات استخارة
كم مرة المفروض اصلي؟؟​

 

[kimou]

مفروض تصلي مرة واحدة، بس صدقيني ما يحتاج، سب الله شرك اكبر مخرج من الله و العياذ بالله ، يعني زوجك يعتبر مشرك. توكلي على الله و طلقي و لا عاد تفكري في الموضوع ابد و الله يعوض عليك خير منه.

 

[.PRADA.]

ولما ناقشته في البداية قال مو مقتنع بمسالة الصلاة
وع الوقت صار يعصب اذا اكلمه ويسب فيني وفي الله <<<< استغفر الله العظيم ياربي

هذا يعتبر كافر والله اعلم لايجوز بقاءك معه
استفتي مشايخه في الموضوع​

 

[رندا كووول]

الاستخاره مو بالعدد....اقدمي ع الحل اللي ريحك وبارادة الله يتسهل ويكون خير لك..

 

[غروربنوته]

الله يفرج همك

 

[يكفيني دفا حبك]

كان الله في أختي الفاضلة إسمحيلي أشبهك بانسان هلكان من العطش وتايهة في صحراء ومو لاقي قدامه ليروي عطشه غير بير ماء لكن المصيبة إن ماء البير مااااااااااااااااااالح , إذا شرب منه زاد عطشه عطش ةيالتالي هلاكه واذا ما شرب ممكن يموت عطش وممكن يرزقة الله سبحانه ويرحمه بشربة ماء نقية صافية تنتشله من الموت فتكتب له بها حياة جديدة,. غاليتي مشكلتك حلها ليس بأيدينا بل لابد أن تعرض على مفتى عام لذا أنصحك بالإتصال بأحد مشايخنا الكبار وعرض مشكلتك عليه بالتفصيل لأن مشكلتك محتوها ديني أكثر من إجتماعي ,,, أسأل الله لك السداد والتوفيق وأن يختار الخيرة لك ولإبنتك ... تقبلي مروري .

 

[فلوووور]

حبيبتي النقاش والحيااااة مع انسان ماااااايصلي ويتكلم على الخالق(استغفر الله) حياااة هلاااك
وقتل لك ولبنتك ياحياتي وش ترتجييين من شخص يطرد بنته وزوجته بنص الليل ؟؟؟ وزود على كذا مااايصلي
صدقيييني انا ماأشجع على الطلاق لكن مع هالشخص الطلاق هو الحل السليييييييييم والشخص اللي زي كذا أصلا مايستاااهلك ولا يستاااهل يكون أب,وثالثا ياعمري حرااام بنتك تتعقد وتصير مريضة نفسيا لما تكبر والله لوتدفعين على علاجها أكبر المبالغ ما تطيب ولا ترتاح لان هالعقد صااارت من وهي صغييييره..
أتمنى حبيبتي إني ماثقلت عليك بكلااامي بس هذا رأيي