ابغاها تفوق من ضياعها

سيدة عالمها

سيدة عالمها

New member
إنضم
2009/11/02
المشاركات
387
اخواتي الغاليات
بطرح لكم مشكلة صديقتي واختي وحبيبتي وكل شي
هي مميزه بكل شي من ايام المدرسه وكانت تهتم بنفسها ومظهرها وكل شي طول عمرها مثقفه
بالرغم من ظروف اهلها الي نوعا ما منفتحين الا انها هي حافظت على دينها وماكانت تسال الله الا الزوج الصالح
اتزوجت رجل متزوج لظروف الله يعلم بها
المهم انجبت اطفال
وطبعا عانت كثيييييييير مع زوجها
يعني من حركاتها
توقف عند باب الحمام بالمنشفه عشان ينشف-تدفيله شبشب الحمام اعزكم الله عشان مايلبسه ويكون بارد على رجوله اذا صحته لصلاة الفجر-ماتنام لو بتموت عشان لايفوتهم صلاة الفجر وبالذات هو عشان المسجد-اذا جا بيسفرها تقول ابدا زوجتك وبناتك اول شي- قايمه بواجب اهله قبل اهلها-تحدت اهلها عشانه كم مره-يصحى للعمل يلقى الثوب النظيف المبخر حاطتله اغراضه حتى مفتاح سيارته داخل جيوبه -تذكره بمواعيد-من الصبح القهوه والتمر وتجلس صاحيه وتودعه بالحضن والدعاوي من الباب-ايام الويك اند تقوله لامن حقك هذي الايام انت شقيت طول الاسبوع
اذا نزلت السوبر ماركت ماتشتري الا ارخص الاشياء عشان توفر-موعادل معها وعلى كذا تقول معليش فالاخره ربي بيعوضني
تحبه الغبيه وناسيه نفسها زاد وزنها مررره -ماتطلع بالشهور من البيت-المساج- والدلع-الهدايا كل شي ممكن تتوقعونه تسويه لو يقولها ادخلي النار دخلت..........الخ اشياء كثيير والله
وهو صار من اتفه موقف قام يهجرها ولا يرد عليها وهي اهلها بعيد ولافيهم خير حتى بغت تروحلهم شوي زهقت من الغربه قالتلها امها احنا يمكن نسافر وبنقفل شقتنا
المهم هي الحين نفسيتها تعباااااااانه ووقفت الحمال من بعد اصغر عيالها عمره3سنوات
لانها تفكر بالانفصال تقول تعبت ولا لقت منه الا الجحود
والله ودي منكم نصايح من تجاربكم او من خبرتكم هي مره تحبه هو مامنه الا الكلام حلو ووقت الروقان اما غير كذا خذي من السب وقلت الادب انا تعبت معها انصحها بس قولت ابجمع ردودكم واوريها عشان تعرف الصح من الغلط وجزاكم الله خير​
 
حبيباتي ارجوكم وين ردودكم
والله ماابغى الصبح يطلع الا وهي قاريه ردودكم نفسيتها زفت على تعامله معاها وعندها الضغط واسكر مع انها فالعشرينات
 
واضح انها اهملت ذاتها وصبت اهتمامها عليه

خل تعيد حساباتها ولا تهمله ولا تهمل ذاتها
 
حبيبتي اولا الله يكون بعونها وفررج همها ارب
الظاهر ان صاحبتك نست نفسها وصار عندها خلط في اداء الادوار
يعني وانتي تحكين عنها حسيتها امه مو زوجته
تنظف وترتب وتعتني فيه كانها ولدها وبس
نست نفسها بدليل انك تقولين ازداد ودنها كثيرر لو كانت هذي هي الاشياء الي تهم الرجل كان ليش يتزوج؟؟؟
محد يقدر يهتم فيه زي امه بدليل انك تشوفين بعض الرجال يتزوج وحده ماتعرف كوعها من بوعها مثل مايقولون حتى بيظه ماتعرف تسوي
ومع هذا يموت فيها ومنسيته اهله كلهم

الزوج يبي يشوف زوجته بمظهر الحبيبه فالشوق فالكلام فالغيره فكل شي
مو يقولها نسافر تقول لا زوجتك وبناتك اولا ؟؟؟؟؟؟؟؟؟؟؟؟

كانها ماتبيه لازم توظح له انه مرغووب وانها تموت فيه مسالة العدل هذي خاصه فيه مايمنع انها تعينه عليها بس بحدوود
الله يهديها خليها تشوف نفسها كيف كانت يوم يخطبها وتحاول ترررجع زي ماكانت
 
اي والله صادقه كانها امه بس هي كمان تصلح حفلات رومنسيه له وبالعكس هو يقولها احيانا خنقتيني بالحب والمشاعر
من كثر ماتحبه وتهتم فيه اكثر من نفسها
 
الله يعينها بس زي كلام الاستاده ناعمه ما قالت الرجل لا يحب المره التي تفرم نفسها لترضي من حولها هي غلطت اكبر غلط شافها ما حبت نفسها كيف يحبها نصيحه خليها توخر عنه شوي وترح لنفسها ولا تتنازل عن حقوقها وشوفي كيف يرجعلها تروح لكوفيره تسوي استايل جديد وتشتري ملابس جديده ويوم تدلعه لازم تاخد لنفسها دلع لو بي الطلب شوي يتعواد لاانها خنقته الرجال يبا يعطي مشاعر ما خلات مجال الدلع بحدود الله يسعدها
 
الله يكون بعونها خليها تستخير وتكثرمن الدعاء والاستغفار وانصحيها بقراءة سورة البقره يوميا والله يسخر قلبه لها
 
والله ماعمري شفت مره دلعت زوجها الا تندم
قولي لها اذا دلعته زياده بيضيع منها هذا اذا ماضاع منها
وتثقل عليه وتبداء بمراعات امورها واهتمامها بنفسها وعيالها بس
وهو تسوي له الواجب فقط -رجال مايحبون الدلع بزياااااااااااااده
الله يعينها
 
اللي تسويه هذا اكبرغلط
وين نفسها نفسهااولى من زوجها الحنيه للزوج ماتجيب الاالندم
خلها تقرا مواضيع
 
الاستاذه ناعمه الهاشمي وتستفيد منها
الله يوفقها يارب ويسحره فيها سحرحلال
 
اي والله حبيبتي الله يرزقك بالذريه يارب وجميع المسلمين
بس هي تقول انه زياده فالاجر حسن التبعل
 
خليها ياقلبي تحب نفسها قبل كل شي ولاتقصر بحب زوجها وعيالها
الحرمه فينا تعطي كل شي وبالاخير ماتلاقي الاسررررررررررررراب
اتذكر قصه كتبت هنا في المنتدى اعتقد للاخت الغاليه موزه
عن وحده كانت ماتقصر مع زوجها ابد ابد ابد ولاكنها كانت معطيه نفسها حقها حـــــــــــــــيل وكان زوجها يمووووت في تراب رجولها ,, هالقصه جتني مثل الكف على وجهي نبهتني في اول محاوله لي في نسيان نفسي لرضاء زوجي ولكن الحمدلله تفطنت لنفسي بدري قبل مانجرف مع انها مو شخصيتي لكن قلت بجرب قلت طريق ممكن يقربني من زوجي والحمدلله عايشين كلا ماخذه حقه
 
حسن التبعل مومعناه تنسى نفسها
الله يهديه ويسخره لهااا
 
والله حتى انا احسها الله يهديها زي شروف فمسلسل ام البنات
بس ارجو منكم الافاده
اكثر من التعليق فقط او الدعاء لو بظهر الغيب
 
مرحبا سيدة عالمها ..
الرجل سبحان الله مخلوق غريب اذا زادت العنايه به ينفرويبحث عن من تهمله
واذا اهمل بحث عن من يهتم به يعني بالعربي مايملا فمه الا التراب مع اعتذاري للراجال
وصديقتك من شدتة الأهتمام به نست نفسها وهذا اكبر غلط اني اعيش عشان ارضي زوجي
على حساب راحتي وسعادتي واهمال بشكلي وجسمي ليه وعشان مين
سيدة عالمها ..انتبهي لصديقتك وخليك قريبه منها وانصحيها انها اذا ماحبت نفسها ماراح احديحبها حتى لو كان زوجها
والله يكون بعونها
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل