إنما يوفي الصابرون أجرهم بغير حساب "من ملف الاستشارات

[راجيه الرضا]

عمرى ما بنساها ابدا

كان عندها ٢٥ سنه ولسه مخلفه جديد

باباها ومامتها اطلقوا قبل فرحها باسبوع واهل جوزها خدوا ده مدخل يضايقوها ويوجعوها بيه

جوزها كان سلبي جدا وكان بيسمع امه بتهينها وتخوض في عرضها وهي كانت مكسوره جدا مش بترد وبتعمل نفسها بتضحك قال يعني حماتها بتهزر

كانت دكتوره شاطره جدا والمرضي بتموت فيها وهي مخلصه جدا

بعد ما ولدت باسبوع مامتها قررت تستولي علي فلوس كانت شيلاها معاها وادتها لاخوها يغير بيها عربيته ولما قالت لها ان ده ظلم هددتها بان ولادها هيعقوها لانها عاقه فحبيبتي اعتذرت لوالدتها وسكتت علي حقها بر بيها لوجه الله لان هي مكنتش مرتبطه بمامتها خالص وهي كانت بتعاملها باهمال وقسوه طول الوقت وهي برضوا كانت في منتهي البر

كل حاجه في حياتها كانت بايظه
اهلها
اهل زوجها
زوجها
صحتها

وحتي فلوسها مامتها خدتها وكانت تحويشه عمرها

لما سئلتها جايه ليه

قالت لي عشان بقيت بتعصب علي ابني وهو ملوش ذنب عايزه اتعلم اتحكم في غضبي ومخليش الضغوط دي تاثر علي علاقتي بيه

انا انبهرت هي ازاي حنينه عليه كده رغم كل القسوه اللي حوالليها

وابتديت اعلمها ادوات تفرغ بيها غضبها
اشجعها ترفض اللي بيضايقها
اعلمها تقول اللي جواها ومتخفش ان حد يزعل منها

وكل مره انبهر هي ازاي بسرعه بتقدر تظبط كل حاجه وتتعلم بسرعه مذهله

كم انجازات يخض وكان الدنيا دي بتتطوع لخدمتها

مقلتش وانا مين يطبطب عليا ولا كانت بتحجج باي عذر

واخده في وشها وشايله مسئولياتها بمنتهي البطوله

بعد ٤ سنين قابلتها

وقفت اذي اهلها واهل جوزها ومخسرتش حد فيهم

ابنها طفل يجنن ذكي ومهذب وبيتواصل معاها بشكل حميمي ودافي

كبرت شغلها وبقي معاها اضعاف اللي اتاخد منها

هي صبرت وطلبت بس تبقي هاديه مع ابنها بس ربنا اداها من خزائنه التي لا تنفذ بغير حساب

الناس اللي بتختار الاصلاح وبتتحمل المسئوليه وبيصبروا دول المفروض قصصهم تتنشر في الجرايد عشان يعلمونا معني الاراده والاخلاص والصبر والتحمل

حقا وصدقا

انما يوفي الصابرون اجرهم بغير حساب ??

د.سارة سيف