إلى كل اب وام ..ممنوع الطبطبة عند الخطأ

[راجيه الرضا]

اب النهاردة بيحكيلي عن زوجة ابنه وبيقولي كانت بتتصرف تصرفات كتير اوي وكنت بقول لابني معلش عدي عشان خاطر والدها صاحبي

لما تتعامل بشكل غير محترم كنت اقول معلش عشان خاطر والدها صاحبي

اصل حرام هيصعب عليا لما بنته توصل نفسها للطلاق بسبب افعالها

على الجنب التاني تيجي تشوف ابو البنت ده بيعمل ايه لما بيعرف ان بنته غلطت

ولا اي حاجة ولا موقف يتحسبله ولا بيوجه ولا بيفهم بنته الصح من الغلط والدلع بيغلب على الموقف ومعلش اصلها صغيرة

المثال ده موجود منه في بيوت كتير يصعب علينا اهل شريك حياتنا

رغم ان اي حد بيعمل حاجة لازم يدفع ضريبتها في يوم

الاب اللي يطبطب لبنته في الغلط ويغلوش انه يقول ان ده غلط

الام اللي ما تقولش لبنتها ازاي تحفظ بيتها وتقويها على تصرف غلط

لازم يدفعوا ضريبة عشان الغلطات دي يتعلموا منها وياخدو بالهم يتصرفوا صح مع باقي بيوت ولادهم

اوقات كتير بيصعب عليك ناس هما اصلا السبب ان ولادهم واصلين لسوء الاخلاق والتصرف

عليك تنصح ولادك وتوجهم خدوا بالنصيحة هتاخد ثوابهم ومش هيزيدو في طيشهم وهيبقى ليهم كبير ما خدوش بالنصيحة يبقى عملت اللي عليك

لكن ما نكنش بندلع ولادنا دلع ما يفتحش بيوت ولا يحافظ على الاستقرار ونرجع نقول هما ولادنا ليه حظهم وحش

ساعات حظهم الوحش فعلا بيبقى في صورة اب وام ما بيقولوش للغلط انه غلط وماشين على مزاج ولادهم

#مايسة_كمال
#محو_الأمية_الزوجية_مايسة_كمال