إذا وحدة دخلت بيتك و إنت مو موجودة....

[ذوق رفيع]

السلام عليكم ورحمة الله و بركاته ..​

كيفكم و إش أخباركم ياأخواتي المتزوجات ..​

كنت حابة أستشيركم بموضوع و أبغى أشوف ردودكم لأني محتارة ..:sadwalk:​

بصراحة الموضوع يخص أختي ..​

يعني كيف أبدأ ماني عارفة لكن أبقول المشكلة بإختصار..و أتمنى إنكم تفهمو عليّ:in_love:​

أختي متزوجة صار لها 5 شهور .. كانت عندنا بعد العيد و كلمها في يوم زوجها و قال لها إن ولد خالتو و زوجته في بيتها فإذا كانت حابه إنها تروح معاه بيتها كان بها و إذا كانت تبغى تجلس عند أهلها فما عندو مانع.. مع العلم إن أختي ما تعرف هذي الحرمة إللي دخلت بيتها و هي مو موجودة ..و كمان زوجها ماراح يكون في البيت..​

عاد أنا قلت لها إرجعي بيتك صعبة تكون وحدة في بيتك و إنت جالسة عندنا يعني أنا أحس إن بيت الوحدة مملكتها يعني من خصوصيتها من أملاكها صعبة تجلس عندنا و وحدة في بيتها ماخذه راحتها على الكامل هي و زوجها..​

قالتي لا أنا ماراح أروح عناد فيه:schmoll: كيف يدخلهم البيت و أنا مو موجودة , قلت لها خلاص دخلو البيت و انتهى الموضوع و كمان يمكن أنحرج أو شيء من كذا .. يعني المسألة مش مقصودة من زوجك ..
فما أدري حل أختي صح أو حلي أنا .. لأني مقهورة عليها شايفتها مترددة و حيرانه و هي تحاول تخفي عليّ بس أنا أعرفها..​

تكفون أبغى رأيكم في الموضوع عشان أشوف إذا إللي قلت صح أو خطأ و كيف أقنعها..​

مشكورين ..​

 

[أسرتي دنيتي]

من راايي انها ترجع البيت اكيد جوا فجأه وزوجها ما عرف ايش يتصرف بس انا ابي اعرف كيف بعض الناس يدخلون بيوت بدون اصحابها الا اذا كانو مضطرين الله اعلم بظروف الناس!! قولي لأختك العناد يخرب البيوت وهم لسه معاريس الله يوفقنا وياها ويرزقنا الصبر والحلم....آمين

 

[(:دلوعة بلقيس:)]

والله تصرف زوجها غريب

بس يمكن انحرج ماعليه اللي صار صار

انا اقول لا تضغطين على اختك اكثر

اذا حبت ترجع فهو افضل واذا ماتبي

على اساس الناس اللي بالبيت ياخذون راحتهم افضل

انها تقفل غرفة نومها وبس وتخلي باقي البيت لهم

لان اكيد لها اغراض خاصه فيها ماتبي احد يشوفها

وعاد زوجها يدبر عمره بس اهم شي مافي اي احد ينام على سريرها

ولا يشوف اغراضها وبس

ولو عاندت بتزيد الطين بله ولو سايرت

زوجها بتكبر بعينه وراح يقول زوجتي عاقله ولو بيده مافي اي شخص غريب يدخل بيتهم

 

[حسونة العسولة]

والله حبيبتي من الأفضل كان تروح لأنها ماتعرفها ولا تعرف طبايعها يمكن إنها إنسانة فيها خير أو العكس زي ماصار مع الوالدة الوالد الله يرحمه دخل عيلة بكاملها في بيتنا واحنا مسافرين وتعالي شوفي البلاوي لمن رجعنا البيت الله لايوريك ماخلو غرفة نوم إلا دخلوها مع إنه الوالد مقفلها لكنهم كسروا الباب وماخلوا فرش ولا كنب إلا عدموه رجعنا من السفر لقينا البيت خرابه وعجبتني أمي مارضيت تدخل البيت قالت لأبوي مادام إنت دخلتهم من غير إذن إنت الي تتحمل ماني داخلة البيت إلا بعد مايرجع زي ماتركته وطبعا جاب عمال شاله الزبايل وفي عفش اترمى واشترى بداله لكنها كانت تجربه قاسية ودرس مايتنسي بالنسبة للوالد.
وهذا الزمن في شعوذة وسحر الواحد صار يخاف من الي يعرفهم, كيف الغرباء؟
حبيت أفيدك حبيبتي وآسفة على الاطالة

 

[امل الصالح]

بدون تفكير

ترجع بيتها

وتستفسر بعدين من زوجها عن اللي صار

بدون ماتوضح انها متضايقة عشان يتكلم براحته

مع اني اعتقد ان اللي صار كان غصب عنه

الله يوفقها

 

[ذوق رفيع]

صباحكم خير ..
مشكورة أختي أسرتي دنيتي..
وربي يوفقك
شكرا لك أختي دلوعة بلقيس.. المشكلة إنها ما قفلت أي غرفة في البيت حتى غرفت نومها مع إني موصيتها ما تخرج إلا وهي مقفلتها..
و شكرا لك أختي حسونه العسولة و بصراحة أعجبني موقف أمك ..
و يعطيكي العافية أختي أمل الصالح .. وراح أخليها تقرأ الردود و إن شاء الله تعقل و توافق..​

 

[شمس لشواق]

ترجع بيتها بدون تفكير

 

[ايامي كانت حلوه]

لو انا مكااااااانها برجع
وقول ترجع بيتها وضيوف زوجها هم ضيوفهاا

 

[عزيزة11]

اكيد الاخوات عندهم حق ترجع بيتها
تلحق
واصلا كان لازم ترجع اول ما سمعت ان فيه ضيوف في بيتها
ولما يروحو تتناقش مع زوجها بهدوء لانه اكيد اتحط في هدا الموقف