إذا كتبت لكم قصتي رح تساعدوني ؟؟؟

[عيون بريئه]

السلام عليكم

بصراحه انا وايد متردده اكتب لكم مشكلتي ولا لأ أخاف ما احصل أي أهتمام أو أنكم أتطنشوني
وبجذي نفسيتي رح تتعب أكثر واحس أني ولا شي ويمكن هذي الحقيقه أتمنى أنكم أتردون علي وتشجعوني أن أكتب لكم مشكلتي علشان اتساعدوني وارتاح من ألي أنا فيه ​

 

[نسائيات]

ان شاء الله ما راح نطنشج
لانه وبكل بساطه مهما كانت المشكله صغيره في نظر الغير فهي كبيره في نظرك انتي

 

[احب الله]

عليكم السلام ورحمة الله وبركاته

هلافيك اختي العزيزة
اختي لاتترددين اكتبي مشكلتك واخواتك في المنتدى ما بيقصرون معك ان شاء الله واذا تآخرو عليك لاتفتكرين انهم

مطنشينك ولكن هذه الايام مثل ما انتي عارفه امتحانات على الابواب وايضاء عيد الله يبلغناء ويعيده عليناء جميعا

وعلى امة محمد بالخير واليمن والبركات اللهم آمين

:icon26: :icon26: :icon26:

 

[احب الله]

 

[عيون بريئه]

حكاوينا _ احب الله

اشكركم على الاهتمام والرد
إن شاء الله رح أكتب مشكلتي على الورد وأنقلها لكم لأني عندي مشكله وأهي أني دايما متردده ومو واثقه من ألي أنا قاعده أسويه لو تدرون أني من أمس مو نايمه بس أفكر هل أكتب مشكلتي في المنتدى ولا لأ واتقلب يمين ويسار وأشلون يتلي الجرأه وكتبت اليوم ما أدري

بس كل ألي أعرفه أني أبي اتغير :dunno:​

 

[طوق الياسمين]

أكتبي عزيزتي

فلكل منا مشاكله ، وهمومه

ولابد له أن ينفس عنها ، ويبحث عن حلول وبدائل ولا يعجز

أكتبي قصتكِ

وكلنا معكِ

يدا بيد

بانتظاركِ عزيزتي

 

[عيون بريئه]

أنا عمري 20 سنه متزوجه من سنه وخمس أشهر زوجي عمره 27 سنه تزوجنا عن حب وكان على بالي أني كل شي بحياته عقب الزواج أكتشفت أنه كان يكلم 5 غيري انا كنت أدري انه كان يكلم قبلي بنات بس ما كنت أدري أنه كان يحتفض بكل شي مسجاتهم حتى صورهم عموما أكد لي أنه يحبني وان لو ما كان يحبني جان ما اخذني أنا من بد كل هالبنات أقتنعت أنا بهالكلام وسكت طبعا عقب ما مسح كل رسايلهم وشقق صورهم إلا صوره وحده وقال لي انها محلفته أن يردها لها بس أهو ما يدري وينها علشان يرد لها صورها وأكد لي أنه نساها وهم أهني أستسلمت له لأني أحبه وما أبي أخسره ........ مرت أول 4 أشهر بحب وسلام وراحه ويم من الأيام أذكر كانت أيام رمضان زوجي كان نايم وصل لي مسج من بنت خالتي ( عيون أبي مسج حلو عفيه بسرعه ) بغيت أدزلها مسج أكتشفت أن ما عندي رصيد قلت ماكو إلا تلفون حبيبي أخذت تلفونه وأهو نايم وأكتب لها المسج وأدزلها ياه قلت خلى اروح الرسائل المرسله وأمسح المسج علشان حبي لايزعل ويقول ليش ما أستأذنتيني مسحت المسج ولقيت قبل المسج ألي أنا دزيته مسج مكتوب حبيبتي فــ..
قلت خلى أفتحه وأشوف دازه لمنو ؟

قريت حبيبتي فطامي مرتي الحين عندي ما أقدر أكلمج .... طبعا من الصدمه أيدي قامت ترجف وحسين أن نفسي بينقطع من الصدمه وأطلع من مسج وأدخل لمس ثاني كل المسجات حق فطامي وكلام حب وغزل والمشكله هذا الكلام يصير وأنا معاه في البيت وحتى في الغرفه وأنا ياغافلين لكم الله .... رحت على الوارد أشوف إذا أهي دازه شي بس للأسف كان ماسح الرسائل الوارده وبعد أشوي وصل له مسج بس مو من فطامي لا من بنت عمته تقول له ولد خالي حبيبي أنا مو زعلانه ليش ماتزوجتني بس ليش ماقلت لي أنا أهني أنهرت رديت التلفون مكانه وقعدت أبجي بصوت واطي مسحت دموعي رحت عند زوجي ........ حبيبي قوم أبيك توديني بيت أمي قام من النوم جان يقول لي هلا حياتي شنو تبين باباتي تبين تروحين عند أمج أوكي حبي روحي لبسي علما أغسل ويهي ...... لبست وركبنا السياره وأهو مو حاس بولا شي قربت يم بيت أمي دموعي فضحتني قالي حبي شفيج شنو صاير ليش عينج تدمع انتي تعبانه فيج شي قلت له لا مافيني شي وصلت عند بيت أمي طلعت من السياره نزل أهو الجام حبي أكيد مافيج شي جان أقوله لا بس سلم لي على فطامي وركضت دخلت بيت أمي طبعا أهو شكله كان مو بس مصدوم إلا جنه واحد معطيه كف دق علي ما رديت ضليت طبيعيه عند أمي ما بينت لها شي رحت قعدت بروحي بغرفتي دقيت على بنت خالتي وقلت لها الي صار وأنا أكلمها كان يدق علي بس كنت مطنشته بعد أشوي بنت خالتي تقولي عيون ترى زوجج قاعد يدق علي قلت لها ردي عليه وبعدين دقي علي........ بعد 5 دقايق دقت علي وقالت لي أنه أهو وايد خايف أن أطلب منه الطلاق ويقول خليها ترد علي خلى نتفاهم بالبيت أحسن وخلى تكبر عقلها
رديت عليه وعلى طول قال لي ترى أحبج وما رح أهدج وهذي البنت كانت مجرد تسليه لا أكثر وخلاص أنا الحين أنهيت علاقتي معاها علشانج ردي البيت قلت له وبنت عمتك قال أي بنت عمه قلت له لا تستعبط علي ترى بروحي معصبه قال لي خلاص أنتي ردي البيت وأنا أقولج كل شي رديت البيت وقال لي أن بنت عمته كانت تبيه بس أهو مايبيها وأنها من زمان تدز له مسجات بس أهو ما يرد عليها وقتنعت وقلت له وفاطمه وعدني أن سالفتها مارح تتكرر أبدا وأنه رح يتوب إذا سامحته ونسيت السالفه سامحته وتناسيت السالفه لأني بصراحه ما أقدر أنسا هالموقف أبد
ومرت الأيام ومر على زواجنا 8 أشهر ويوم من الأيام وزوجي كان نايم قلت يابنت روحي شوفي تلفونه لأني بصراحه من سالفه فطامي وانا ما كنت أثق فيه فتحت الرسائل ما شفت ولا رساله لا الوارده ولا المرسله ولا حتى المحفوضه أستغربت قلت لازم حاط رسايله في مكان ثاني وقعدت أدور بالتلفون لمن لقيت عنده برنامج يحفظ فيه الرسايل على طول فتحته وبدون أي تردد وكانت الصدمه الثانيه رسايل حب وغرام من بنت عمته ومن بنتين ثانين بعد أنهرت وقمت أبجي بصوت مسموع قام من النوم أشفيج وريته الرسايل تفاجأ أشلون قدرت أطلع الرسايل لا بلا شعور عطيته كف وظل متسمر بمكانه ورحت لبست ملابسي ودقيت على أمي وأنا أبجي قلت لها الحين تاخذيني أمي خافت ويت على طول وزوجي كان ليلحين قاعد بمكانه من الصدمه رحت بيت أمي وأنا بس أبجي حاولت تفهم أمي مني السالفه ما قدرت دقت على زوجي أشفيكم شنو صار جان يقول لها خلاص أنا الحين أي البيت عندها ونتفاهم وصل بيت امي وأمي دخلته عندي الغرفه وأنا بس أبجي جان يقول لي ليش تبجين قلت له تسوي رحك غبي أطلع بره ما أبي أشوفك أنت خاين قال أنا مو خاين أنا رح أقولج الصج بنت عمتي تدز لي مسجات بس أنا ما أرد عليها وبصراحه مسجاتها حلوه قلت خلى أخش المسج لأن المج حلو مو صاحبت المسج وقلت يمكن أستفيد منه وقلت له والبنتين قال هذولا خوات كانو رفيجاتي والحين وحده منهم وأهم متزوجات بس كانو يبون يسلمون علي وأهم مثل خواتي ....... ورديت معاه لبيت وقالي أنه خلاص مارح يرد عليهم وماله شغل فيهم وإذا دقوا مارح أرد ............ رديت البيت وأنا حاطه بقلبي سالفه فطامي وبنت عمه والبنت الي مع أختها وكان قلبي يعورني وإذا صار أي شي بيني وبينه كنت أذكره فيهم وبس ما صرت أثق فيه كلش أنعدمت الثقه ........ بعد شهر وشهرين تقربيا من هذي السالفه حملت وزوجي أستانس وايد ومن الوناسه كان يلبي كل طلباتي حتى حرق صور البنت ألي ما كان راضي يشقهم في البدايه وانا قلت بس خلاص تغير .......... من أسبوعين زوجي كان ياخذ شور رن تلفونه رحت أشيله ترددت وايد لمن تسكر ( على فكره زوجي عنده ثلاث تلفونات ) أستغربت أن خلى الجهاز هذا شغال لأن أهو نادرا ما يفتحه عكس الجهازين رحت الرسايل الوارده ونصدمت من ألي شفت مو رساله لأ صوره صوره وحده كانت شبه عاريه بس كانت بشعه أنا أحلى منها بوايد أستغربت معقوله زوجي يكلم وحده بهذال الشكل المشكله أن الصوره مو دازينها بواسطه البلوتوث لا البنت دازته من تلفونها لتلفون زوجي والتاريخ والوقت كل شي موجود طلع زوجي من (تكرمون) الحمام جان أقول له تلفونك رن قال أي تلفون ووريته الجهاز قال منو ألي متصل قلت له البنت الجيكره ألي أنت تكلمها ألي دازه صورتها جان يقول لا صج منو داق قلت له لا تسوي روحك غبي ترى شفت الصوره قالي منو البنت أنا ما أعرفها عصبت صرخت بويه قلت أنت غبي ولا تتغيبه ترى أنا مو غبيه علشان تسوي هالحركات على راسي أنا شفت الصوره والصوره دازينها على رقمك والتاريخ موجود يعني من جم يوم وتبي تعرف الوقت جان يقعد يمي ويلمني حيل قلت له وخر عني خلاص ما قمت أحبك كرهتك أنت أكبر جذاب جان يقولي قعدي خلى أقولج قصتها أهني ما اقدرت أتحمل بروده اعصابه قمت أبجي جان يقول ليش تبجين لا تبجين هذي وحده اتصلت فيني من الشركه الفلانيه وكانوا يعرضون على مشروع بس ما صار لأن المبلغ كبير البنت شافتني ونعجبت فيني قامت تتصل فيني وقالت لي حبيتك من أول نظره بس أنا ما عطيتها ويه وقلت لها انا متزوج وأحب زوجتي وسكرت التلفون بس اهي ضلت تحاول تتصل والصوره هذي أهي دزتها يعني نوع من الأغراء علشان أرد عليها بس والله أني مو مهتم لها وبس هذا كل الموضوع يلا لاتبجين مسحي دموعج ولاتبجين على أي شي يصير البنت ما بيني وبينها شي وسكره الجهاز وقال بس بعد مارح أفتحه وقال لي لا تقولين حق أحد بالي صار وأنا سمعت كلامه ووعدته ان ما اقول حق أحد.......... بس بصراحه أنا تعبت من ألي قاعد يصير كل أسكت واسامحه لي متى فكرت أقول حق أحد من أهله بس المشكله أني أستحي أستحي وايد لدرجه أنهم لمن يكلموني أو يسألوني سؤال زوجي يرد بدالي أحس أن شخصيتي حيل ضعيفه وأني كلش ما أعرف أتصرف وأن كل شي بيد زوجي تصدقون حتى لمن أروح الطبيب زوجي أهو ألي يتكلم عني كأنه أهو ألي حامل أو مريض بصراحه أنا تعبت نفسيا ما أدري شسوي وأشلون أتصرف خصوصا أن الحين قام يصير فتور بيني وبين زوجي ماعدنا مثل قبل محد يحب يقعد مع الثاني أصلا مافي مواضيع نتكلم فيها مع بعض أنا كل في البيت وأهو كله طالع ( على فكره أنا ما أشتغل ولا حتى أسوق سياره ) أحس أن حياتي صعبه حيل .....

ســــــــــــــــاعــــــــــــــــدونـــــــــــــــــــــي​

 

[هجران الليالي]

بصراحة شي يعور القلب الله يعينج شلون انتي متحملة كل هذا...
انا مااشجعج على أبغض الحلال لكن ليش ماخليتي حد من اهلج يوقفه عند حده مب كل مرة يقص عليج بكلمتين ولان دايما احنا البنات عاطفيات زيادة عن اللزوم ونصدق لكن اسمحي لي اقولج ان زوجج بصراحة مااعرف شلون انتي متحملة الوضع وليش يعطيج وعود وماينفذا مب اللازم ان الرجال عند كلمته وانتي كل ساكته وهو يخونج ويطرش مسجات ولو هو مايبي بنت عمته تتصل ولا تطرش مسجات جان على الأقل هددها انه بيكلم اهلها !!! وفي هالحالة مابتتجرأ تتصل ابدا!!! وعلى طاري الفتاة العارية ليش مامسح الصورة على الاقل ولا ابسطها يهددا في وظيفتها مب هي متصلة له عن طريق شركة يعني اكيد بتخاف على مركزها!!!

وان شاء الله ربي يهديه وان شاء الله البنات ذوات العقول الحكيمة يردون عليج
الله يفرج لج

 

[rtist@]

الله يكون بعونك
بس بصراحة:sad_1:
انتي طيببببببببببببببببببببببببة حييييييييييييييييييييييييييييييل
بسرحة تسامحينه وترضين:schmoll:
اعتقد ان هذا السبب في عودته مرة ثانية لعلاقاته
لانه متأكد انك رح تسامحينه
خلك قوية شوي
وزعلي ولاترجعين له بسهوله
وحطي لك شروط
خليه يحس بقيمتك
ولاحظت انه يحترمك عشان كذي سهل تخلينه يتوب من عمايله،
الرجال عادة اذا واجهته مرته بخيانته يثور ويخربها
بس تحتاجين نائح استاذتنا ناعمة ورح تعلمك شلون تعطيه كف محترم عشان مايطالع يمين ولا يسار:busted_red:

 

[عيون بريئه]

هجران الليالي

أشكرج على أهتمامج بصراحه فكرت اكثر من مره اتصل على عمته وأقول لها كل شي بس ما اقدر ما أدري أشلون أكلمها وأشلون أبدأ معاها أهي عمته عايشه بالامارات لانها كانت متزوجه إماراتي وعلى فكره أنا أبوي إماراتي وعايش بالأمارات فكرت حتى أني أقول حق أبوي وأهو يتصرف بمعرفته بس هم خفت وترددت أخاف المشكله تكبر

اما بالنسبه لهذي ألي ما تستحي ألي تطرش صورها نسيت أقول انه مسحه صورتها جدامي بس للأسف ما حفظت رقمها بس قصيت عليه وقلت له ترى رقمها محفوظ عندي وإذا دقت عليك مايصير خير بس أنا أدري أنه أهو عارف اني مارح أتجرأ وأدق عليها أو أني أتجرأ وأفضحها لأني خوافه وما أعرف أتصرف


أم خالد

آآآآآآآآآه يا أم خالد أزعل وين اروح عند أمي مارح تقدر عليه بروحها أنا أمي متطلقه من 15 سنه وما عندنا ريال بالبيت وابوي بالإمارات بعيد عني وما أقدر اشتكي له آخاف يحاتيني وهو بعيد عني معني أشكثر أحلم في ابوي أنه يحاتيني وقول لي فيج شي والله العظيم آخر مره من شهر طرش لي مسج ( ابوي حبيبي مستوي شي بينج وبين زوجج مضايقنج خبريني) والله كأنه حاس فيني وأنا رديت عليه ( لا يبه سلامتك مافي إلا كل خير لا تحاتي أحنه الحمدلله مرتاحين )

وياريت وأتمنى من كل قلبي أن الأستاذه ناعمه تشرفنا بالكويت رح أكون أول وحده أروح لها بصراحه أنا وايد محتاجه لأستشارتها​

 

[ظلال]

اسمحي لي أختي إذا قسيت بردي عليك لكن والله من حرقتي عليك مع إحترامي لك إسمحي لي أقول لك انتي إنسانه
ساذجه تصدقين كل شي حتى الشي للي مايحتاج تفكير وتسامحين علىطول قبل ماتردين إعتبارك وهو عرف هالنقطه
فيك وقعد يلعب بها عليك وش تتوقعين يعني سبحان الله كل الحريم هذولا طايحات عليه ليش مايكون هو اللي يلحقهم
هو عرف صغر تفكيرك وضعفك واستغلها حتى الجوالات ليش ثلاثه ومايفتح غير واحد ترى هذي الحركه معروفه ومكشوفه ولا يبي لهاكلام حتى البزارين يعني المراهقين يسوونها يخلون تلفونات خاصه بالغزل والمعاكسات يفتحونها
إذا طلعو برا البيت إنتي كبري عقلك وقولي له أنا أبيك كتاب مفتوح ماابي حركات المراهقه ومعاكسة البنات تسيطر
عليك انتي كل شي كشفتيه بنفسك وشفتيه بعيونك ومتلخبطه ومتردده لأنك إنتي ماتبين تصدقين بس هذا مو من مصلحتك وبعدين وش فيها إذا كلمتي عمته بالعكس يمكن يبين لك شي إنتي ماتدرين عنه لكن لاتكلمينها بأسلوب هجومي كلميها بعقل وقولي لها أنا بس أبي أتأكد البنت هي اللي تلاحق زوجي وإلا العكس وخليها توقف عند حدها
لإن بمكالمتك راح يكون عقاب قاسي للطرفين زوجك وبنت عمته وإذا بان لك شي ثاني انتبهي تترددين مهما كان
إلا إذا هانت عليك نفسك وكرامتك واستخيري قبل لاتطلبين الطلاق لأنه أمانة ومن كل المشاكل اللي قريتها ان هذا النوع مايفيد معه أي أسلوب إلا اللي يبصق في وجهه ويتركه للأبد لأنه ماراعى حرمات الله...........
الله يفرج وييسر لك.

 

[طوق الياسمين]

يا الله يا كريم

كيف لك أن تتحملين كل هذا ؟؟؟؟؟؟؟؟

اعذريني لكلماتي ، ولكن شخصيتك هشة وضعيفة

وكأنكِ طفلة صغيرة ، وأنتِ كذلك فعلا

20 سنة ، نعم ما زلتي طفلة لا تعي الكثير في الحياة ،

مازلتي تتلمذين في مدرسة الحياة الكبيرة

الله كريم

وان شاء الله ستجدين النصح من الأخوات الكريمات

ونصح القديرة دكتورتنا الغالية

اللهم اهدي لها زوجها ، وجنبه الفواحش والمعاصي ، وزيّن له الدين والايمان

اللهم سخره لها

اللهم سخره لها

عليكٍ بالدعاء والاستغفار

 

[بنت الشيوخ]

الله يعينك اختي


بس والله مع كل هذا المفروض ان قلبك صخر وان تقلبين عليه الدنيا وان ماتمشيها له اكثر من مره
هو يستغل طيبتك وصغرك وانتي مصدقته في كل شي

بس الميزه انه متعلق فيك والمفروض تستغلين هذه النقطه لصالحك ولازم يعرف والدك بالموضوع اواحد من اهلك علشان يوقفه واستغلي خوفه من الفضايح وهدديه وخليه عاد يفكر الف مره


خلى والدك يتكلم معه عن الحركات هذي ............


والله يقويك ويصبرك

 

[أنامل]

والله يا قلبي كان المفروض تورينه العين الحمرا من أول ..والا ايش يخليه يستمر ويستخف فيك..
والزواج يا حبيبتي يقوم على الحب والاحترام ..زوجك واضح تماما ما يحترمك ولا يقيم لك مقدار ولاقيمة ..والا ايش يخليه يلعب ويغازل بنات الناس ..لا وبنت عمته بعد ..اعذريني ..حب من غير احترام ..ما يعيش
لازم تكونين قوية وتثبتين انك موجوده وتوقفين بوجهه وتقولين له ...يا انا يا هالبنات في حياتك ان كنت تحبني فعلا ..
ولازم يتدخل شخص كبير وراشد ..لان زوجك يتصرف بطيش مراهق الله يصلحه ويهديه..

 

[نسائيات]

مرحبا بك اختي الغاليه
شعرت بحجم معاناتك والمك الداخلي
تحبينه ويخونك
لكن الم تستالي نفسك لماذا ؟؟؟؟
ان زوجك يستغلك هو يحبك وباقي عليك لانك تشكلين لديه الامان نعم هو يشعر بالامان معك فانتي في نظره طفله بريئه يرعاها و يحبها وتحفظه في غيابه
لكن حذاري غاليتي فزوج في جميع عشيقاته يبحث عن الصديقه اللتي يستطيع الحديث معها عنك وعن نفسه وعن حياته ومغامراته
فلماذا لا تستمعين له حتى لو كانت قصصه بمنتهى السخافه وتبتسمين وتتفاعلين
لماذا لا تكونين هذه العشيقه
يعني غيري من طبعك ومن نفسك
فكما تقولين هو من يرد على الناس اذا سالوك وهو من يستنطقك فلماذا كل هذا
كوني لنفسك شخصيه مستقله ساحره تاسر زوجك وتملاء عينيه عن جميع المحيط
ولا يكذب عليك الكل طايح بداديبه
ولا يغرنك قبح المراة الاخرى
فهو لا يرغب بجمال وجهها بل بلحظه استمتاع معها من ان تنتهي تنتهي معها العلاقه فحذاري
وابنة عمته اللصقه تريد سرقة زوجك منك فحذاري اتصلي بها وكوني واثقه من نفسك وشرشحيها واماااااااااااااااااااااااااااااااااااااااام زوجك هل تفهمين ما اعنيه
يعني لا تروحين بالخش عن زوجك وتشرشحينها لا مش هو اللي يقول انها راميه نفسها عليه خلاص قول له انا بتصل فيها وبتكلم معاها
وكوني مصره وواثقه من نفسج بعد
يعني صيري قويه واتصلي فيها قدامه عشان لا تتجراء تهددج تبلغ عليج زوجك بانك تهددينها وعشان تحس انك قويه وانه مالها مكان بينكم سراقة الرياييل
وهدديها بتبلغين عليها ابوها وبعد عطي ريلج تلفون وخل يقول لها قدامج انه لازم ما ترسل له مسجات وانه يحب زوجته وما يبيها تتصل مره ثانيه
قوني قويه ولا هذي العلاقه ممكن تطور يا اختي فحذري
انصحج بتغير مظهرج
ودخول الدورات عند الاستشاريه ناعمه الهاشمي راح تفيدج جدااااااااااااااااااا
عبر المنتدا
انتي محتاجه لتطوير الذات من الصفر
بس لا تكونين سهله يعني زوجك استحمل منك كف ما راح يستحمل يكلم بنت عمته خطافت الرياييل قدام
استغلي نقاط ضعف زوجك خير استغلال
كما انصحك بان تقرئي موضوع الاخت القلب الكبير عن انماط الشخصيه في القسم النفسي موضوع اكثر من رائع وحللي شخصية زوجك وتعاملي معه من خلال هذا التحليل كوني كما يرغب

واحلى ما في الحياة الزوجيه الخصوصية
يعني لا تروحين لا لامك ولا لابيك خليهم بس يشوفون الصوره الحلوه عن حياتك
وخاصه انه هذي المشاكل تتكر عندك وبصوره دورية فماله داعي تبلغين اهلك دامك قادره تحلينها بنفسك مع زوجك وان شاء اللهراح يقدر لك هذا الفعل وفي نفس الوقت تحفظين صورته وصورتك قدام الناس
لانه الناس لها الظاهر فقط والله يعلم ما في الباطن
كم من اسر ينهشها الخراب من الداخل لكن تستر على نفسها لتمر القافله
وانتي والحمدلله لديك في هذا المنتدا من يسمعك وينصحك ويرد عليك
فاتركي صورة زوجك نقية في عيني ابويك ليحبونه ويظلون يحبونه لانه انتي تستطيعين الغفران له لكن اهلك لن يستطيعوا ذلك وستتدمر مع الوقت علاقتهم به

 

[عيون بريئه]

ظلال

صح كلامج أنا فعلا متلخبطه ومتردد وما أبي أصدق ألي شفته وألي صار ودائما أحط أعذار وأسمع كلامه بس هذا الشي لازم يتغير علشان أقدر أواجهه وما أخلي نفسيتي تعبانه وأكبت كل شي بقلبي وأسكت وأهو ولا على بالي مستانس

طوق الياسمين

أشكرج أختي على نصيحه وعلى الدعاء ومثل ماقلتي الله كريم

بنت الشيوخ _ أنامل

المشكله أني عارفه أنه يستغل طيبتي بس ساكته ومسامحته وهذا أكبر غلط والمشكله أني ما أعرف أشلون أهدده والمشكله الأكبر أن ما عندي أحد أهني بالكويت يعني مثل ما ذكرت أنا أبوي مطلق أمي من 15 سنه وبهذي السنين ما شفته إلا 4 مرات أبوي مايقدر أيي الكويت لأن شغله مايسمح له ومايقدر ياخذ إجازه ودايما يكون مسافر بشغل وزجي عارف بهالشي يعني لو شنوي يصير أبوي مارح يقدر أي ويحل المشكله بسرعه وإذا صار ويه رح يكون متأخر وايد والسالفه بردت

حكاوينا

مشكوره على النصائح وفعلا أنا محتاجه لتطور الذات من الصفر على قولتج

وإن شاء الله رح أقرأ موضوع الأخت القلب الكبير وأطبقه

لا عدمناكم​

 

[مرحة : )]

حبيبتي عيون بريئة


فعلا انت برييييييييييئة

انا وجهة نظري ان انتي اللي محتاجة تطوير لذاتج وزيادة الثقة في نفسج ودروس حول الحياة الزوجية


اشتركي بدورات الدكتورة ناعمة ؟؟
بس هاااااا من غير مازوجج يدري

ثقفي نفسج حييل
اشتغلي على عمرج والهي عنه شوي
اقري كتب عن تمنية الشخصية وطبقي
اهم شي التطبييييييييييق ولا ماكو فايدة
دخلي دورات وطبقي اللي تاخذينه

خلي هدفج حاليا تنمية شخصيتج


اما سالفة الخيانة فان شالله تدخل الدكتورة موضوعج وتعطيج نصايحها
او انج تشتركين بالاستشارات الهاتفية

الله يوفقج حبيبتي ويفرجلج
ادعي وخليج قريبة من ربج
خذيتيه عن حب.. تتوقعين العلاقة اللي كنتي معاه فيها حلال ولا حرام؟ واللي بدايتها عصيان اكيد ربي بيجازيه بس مو معناته ان انتي خلالالالاص
لا ادعي واستغفري ربج كثييييييييييييييييييييييييييييييييييييييييييييرا
وصلي كم ركعة قبل لا تنامين تدعين فيها الله ان يفرجلج ويهدي زوجج ويبعد عنه بنات الحرام
وكثري من قراءة القرآن
وعسى الله يهديه

 

[شمس مشرقة]

أختي الحبيبة
يجب عليك ألا تيأسي
ولتعرفي أن زوجك يحبك ولن يستطيع التخلي عنك
بدليل مبادرته الى ارضاءك وتبرير المواقف لك ـ حتى لو كذباـ
هو لايريد أن يخسرك
ونصيحة الأخت الفضلة حكاوينا منطقية اعملي بها
وقبل ذلك قوي صلتك بربك واكثري من الدعاء لك ولزوجك
خطر في بالي فكرة:
ما رأيك لو قمت بزيارة لوالدك في الامارات وتعرفت على اخوتك لوكان لديك اخوة
ومن ثم تقومين بزيارة الأستاذة ناعمة الهاشمي
فتكوني بذلك كسبت زيارة والدك وتغيير جو
وزيارة الاستشارية
وفقك الله وأسعدك في حياتك

 

[الدانه]

الله يعينج والبنات ماقصرو بس ياليت تكلمين الأستلذه ناعمه ؟لأنها اكيد بتفيدج انشاءالله

 

[عيون بريئه]

السلام عليكم

noori

مشكوره على الرد وعلى النصايح القيمه وعلى دعائج لي وإن شاء الله مارح إنسى ربي أبد


شمس مشرقة

جان زين عرفت الدكتوره ناعمه قبل لا أحمل جان رحت الإمارات ولا همني شي بس الحين المشكله أنا مو باقيلي شي و أولد يعني وين رح أحط بنتي معني حاولت أقنع زوجي أن نروح عند أبوي وألولد هناك لأنها كانت فكره أبوي بالأول الحمدلله أنا أبوي عايش بخير أهناك وعرض على زوجي أنه يعطيه بيت ونقعد فيه وإذا ما عجبه يطلع من فلته أهو ومتره وعياله وأحنا نقعد فيها بس زوجي مارضه بصراحه أنا أبوي طيب وايد ووايد يحبني لأني أكبر عياله وأول وحده رح أيبله حفيد بس شنو نقول الشكوه لله

الدانه

مشكوره على الرد وإن شاء الله الدكتوره تشوف موضوعي وتساعدني ​