أنت والميديا والافكار والتأمل

[راجيه الرضا]

مجموع طول الفيديوهات اللي بتترفع يومياً على يوتيوب أكتر من 50 سنة!
(+300 ساعة كل دقيقة) .. وبتزيد كل شهر! .. يعني لو جبت طفل عنده 10 سنين ممكن يقضي باقي عمره كله يشوف الفيديوهات اللي اترفعت في يوم واحد فقط! .. من غير ما ياكل ولا يشرب ولا ينام!

عدد الأفلام اللي بتقدمها صناعة السينما ( هوليوود + بولييود .. إلخ) أكتر من 10 ألاف سنوياً .. وبيزيد.

عدد ماتشات كرة القدم أو أي لعبة شعبية تانية التي تقع في دائرة اهتمام الفرد الواحد قد تصل للمئات سنوياً .

المسلسلات والأغاني والبرامج التلفزيونية ..ما تعدش ..
ألعاب الكمبيوتر والموبايل الجديدة التي تصدر كل يوم ..
فيسبوك وتويتر وانستجرام وسناب شات وغيرهم من الحاجات اللي بتاخد من وقت الناس يومياً .. ما تعدش!

إحنا عايشين في العصر المثالي للغفلة! .. والقادم غالباً أسوأ!

الإنسان العادي الآن ليس لديه وقت سكون لتأمل حاله وحال الدنيا .. الميديا وزغللة الإعلانات ونمط الحياة حولته لفأر على عجلة .. معندوش وقت يهدى ويرتب أولويات .. سبل الترفيه والإنشغال حتى غطت عالشغل .. فما بالك بلحظات السكون والتأمل في المصير المحتوم.

زمان الإنسان كان غصب عنه هيلاقي الوقت للتأمل والتفكير في معتقداته ..
دلوقت مفيش وقت للتفكير بعمق .. اعتناق الأفكار اللي بتتعرض في الأفلام والمسلسلات والبرامج أسهل كتير خصوصاً لو اتقدمت بأسلوب مميز! .. مهما كانت فاسدة!

اجعل لنفسك لحظات سكون وتأمل في حالك وحال الحياة .. ماتبقاش زومبي أو فار تجارب ما بيفكرش غير في تسلية نفسه وتمضية الوقت بشكل ظريف والسلام!

معظم ما شغلت به بالك الأمس لم يعد له أي قيمة اليوم!
فانظر بما تشغل بالك اليوم؟!

#عصر_الغفلة


علي محمد علي