أنا وبابا والتعب ..كم كنت لا اشعر به

احصائياتى
الردود
0
المشاهدات
285

راجيه الرضا

مراقبة و متميزة أقسام نسوة
معلومات راجيه الرضا
إنضم
18 فبراير 2017
المشاركات
14,538
مستوى التفاعل
9,650
النقاط
113
أنا وبابا والتعب ..كم كنت لا اشعر به
والدي كان بيشتغل في القطاع الخاص
كان بيخرج من البيت 7 صباحا" تقريبا" مابيرجعش غير الساعة 11 بالليل...
كان بيرجع ع النوم علطول ، ويوم الأجازة كنا نخرج معاه شويه ويرجع جري عايز ينام علشان تعبان...

كنت كل ما اشوفه نايم اقوله يا بابا حرام عليك بقي أنا عايزة أقعد معاك ، كان ياعيني يسكت ويقولي وهو أنا بشتغل علشان مين؟!
مش علشانكوا يابنتي علشان تعيشوا أحسن عيشة ؟!

كنت وقتها بأفف وأدبدب ومايعجبنيش الكلام ، روح نام يا سيدي روح نام وكنت شايفة إنه نايم بليل وفي الشغل بالنهار لا أكثر ولا أقل وأنا مش بشوفه ولا عارفة أقعد معاه..

وعدت السنين وكبرت ورحل بابا لدار الحق وبقيت أنا بشتغل من 8 الصبح لحد 12 بالليل وأدخل مش شايفة قصادي وعايزة أنام ويوم الأجازة ببقي مش قادرة أتكلم ولا افتح بقي ، لحد ما مرة ماما قالتلي :
بقيتي شبه أبوكي بترجعي متنحة وساكتة ونايمة ولا بقعد معاكي ولا أشوفك...

ياااااااه سرحت أوي في كلامها
ده الدنيا سلف ودين أوي يا جدع.
نفس الي كنت بقوله ل بابا بالحرف...

يااااه للدرجة ديه كان بابا بيبقي مُرهق وتعبان وشغال ليل نهار وكمان فلوسه الي بيكسبها ديه مش ليه!!
لأ ده بيدهالنا بطيب خاطر ورضا وقبول...

ياعني أنا لما بخرج أشتغل بكسب فلوس اه الحمد لله ، بس ببسط نفسي وأجيب هدوم وأخرج مع صحابي وأعيش كويس ، لكن الأب يشتغل ويشقي ويتعب ويقدم الفلوس ديه عن طيب خاطر لولاده!!!

ياعني بيقدم عمره وصحته وفلوسه وهو راضي وسعيد!!!
كام واحد بيقول عاطفة الأمومة أقوي من الأبوة ، لكن مين بيقدم فعليا" صحته ورزقه وهو راضي وسعيد قد الأب ؟!!!

لو ابنك ولا بنتك قالولك بابا مشغول عننا يا ماما ماترديش وتقولي ( معلش) ماتقلليش من مجهود الأب في عين ولاده ، كوني أنتي خط الدفاع عنه ، فهمي ولاده هو بيتعب قد ايه وبيقدم ايه وبيعمل ايه علشانهم..
احكيلهم انهم هايكبروا في يوم وهايبقوا مسئولين عن أسرة وهايبقوا زيه ، فهميهم انهم علشان يعيشوا في مستوي كويس بابا بيحرق صحته وأعصابه علشانهم ، إن فلوس بابا بيديهالهم عن طيب خاطر...
رجعي ( قيمة بابا) في عيون الولاد مرة أخري ، رجعي الرمز والقيمة وعامود الأسرة مرة أخري.

ده دورك كا أم
وصدقيني ده أعظم دور..

#نهال_محسن
 

من نحن ؟؟

موقع نسوة : هي شبكه عربيه تهتم بكل ما يخص المرآه وحياتها اليوميه يعمل منذ سنوات لمساعدة والمساهمه في انجاح كافة الامور الحياتيه للمرآه العربيه