أستمرار أو........

[قيووود88]

السلام عليكم ورحمه الله وبركاته....
اخواتى ملكات بالقيس ومنتدى الغالى المحبب لى قلبي..
ودى استشيركن فى امور تخص حياتى الشخصيه وعندي امل كبير بقدرتكن على اعطائي نصائح استفيد منها في حياتي ياطويلات العمر متزوجه من ثلاث سنين وسبع شهور وعندى بنوته عمرها سنتين وشهرين المهم صار زعل بيني وبين زوجى رحت عند اهلى على امل ان زوجي يجي يرجعنى وانا الحين عند اهلى صار لى ست شهور بس لين الحين ماتكلم ويجي بين فتره والثانيه يسال عن بنته ويسلم على خاله اللى هو ابوي وولا يتكلم فى سالفتناواذا ابومه او امه فاتحوه فى الموضوع مايرد عليهم يتم ساكت يتسمع ولا يتكلم ومرات يقول مالكم خص فى عيالي بردهم متى ماابي.
وعلى فكره انا وزوجي نفس النمط جنوبي شرقي وانا بعد جنوبيه شرقيه وقبل كم يوم جا بيت اهلى وحسيت أنه بيتكلم بس ماتكلم لانه من النوع الخجول والمتردد هااا وش رايكن فى مشكلتى وايش تعتقدن هل هو يفكر بالطلاق وخلانى فتره طويله عند اهلى اوانه تأديب لي انا بصراحه احترت شوي وبنجن من كثر ماافكر فى مستقبل بنتى انها تعيش مشتته بين ابوهاا وامهاا اش تشورون عليه هل اطلب الطلاق لانه هذي فتره طويله ولا اصبر لين مايتحرك هالجنوبي دايما يجي فى بالي انه ماايبيني لو يبيني كان من زمان رجعني صراحه تفكير مشتت مااعرف ايش اقول ارجو من ذوات الخبره فى الحياه الزوجيه ومشاكلها ان تساعدني وتعطيني نصائح استفيد منهاا..

والله يابنات انا فى حاله مايعلم بهي غير ربى ...
والله يسهل ويتقبل دعاء كل وحده ترد على ........

 

[سيمـا]

اختي انا شايفه شريط حمل اذا كانك حامل فيمكن يبغاك ترتاحين وتولدين عند اهلك واذا لا فاتوقع انه بس يبيك تفكرين وتاخذون فترة نقاهه لان لو نيته شينه كان تكلم من زمان او اخذ منك البنت لكن واضح انه هادي وقايم بالواجب الله يسهلك امورك

 

[أنا أنسانه]

الله يسهل اموركم يااااااااارب ويصرف عنكم الطلاااااااااااااق

 

[طلة شيوخ]

الله يسخرلك ليه ماتدحرين الشيطان وتعوذين منه وترجعين اذا مو عشانه عشان بنتك ماله ذنب تعيش مشتته والحياة تضحيه​

 

[دمعة حزيينة]

بس شو هالسبب الكبييييير اللي خلاكم متزاعلين 6 شهور ياويل حالي
اوكي بادري انتي ياقلبي شو باقي بالعمر اذا كل زعلة تقعدون فيها 6شهور
لاحول ولاقوة الا بالله..

 

[الجده الصغيره]

ست شهووووووووووووووووووووووور !!!!!!!!!!!!!!!!!

لييه المكابره منك ومنه؟........ليه احلى ايام العمر تروح بزعل؟

لا يالغلا تحركي ....كلميه...ناقشيه...قولي له تبيني تعال خذني كلوني الناس بكلامهم ونظراتهم....خلاص انتهى الزعل وطاح الحطب...بنتي تعبانه نفسيتها تبيك....

 

[قيووود88]

شكرا
سيما
طله شيوخ
انا انسانه
دمعه حزينه

امين يارب العالمين ويسهل عليكن.
اكثر من سبب للمشكله تجمعت وانفجرت مره وحده وماحد معور قلبي غير بنتى ..بعدين كف ارجع وهو ماكلم ابوي .قاهرني بروده وسكوته الى مخوفني.

 

[بيبي ون]

اتوقع انه يأدبك انتي حاولي تكلمينه بشي خاص في بنتك مثلا اوشي ثاني بس شي مو معناه انك تبي تراضينه بس دوريلك حجه وكلميه باي شي غير مو ضوع خلافكم يمكن ساعتها يكلمك بس عطيه فرصة وانتي لاتشدين الله يسخرلك ويسخرلي

 

[ضحكت الدنيا1]

حبيبتي ايش هي المشكله عشان نفهم ونقدر نساعدك
يمكن هو مو غلطان
يمكن انت الغلطانه
عشان كذا ماتكلم
حبيبتي وضحي اكثر عشان نساعدك
كلامك مبهم محنا عارفين سبب المشكله ومين الغلطان

 

[*ملكة الحب*]

حبيبتي ايش هي المشكله عشان نفهم ونقدر نساعدك
يمكن هو مو غلطان
يمكن انت الغلطانه
عشان كذا ماتكلم
حبيبتي وضحي اكثر عشان نساعدك
كلامك مبهم محنا عارفين سبب المشكله ومين الغلطان

نفس رايي

اذا انت الغلطانه بادري بالرجوع وخلي الكبرياء عنك​

 

[ومض]

السلام عليكم
شوفي حبيبتي
اذا انت من الامارات بكلمج بحل ينفع
انت يالغالية وايد صبرتي وست شهور والله مب اشوي مش بس عليج علية هو الغريب شو الي مسكتنه يعني الريال حده اسبوع وبعد ايموت ... وانت الله يهديج سكتي كل هالمده وابوج وين؟؟ والريايل الي في عيلتج اخوانج مثلا اهلج ..شو مافي احساس؟؟؟
ليش ما تكلموا اصلا هالحركة بعد عيب في حقهم كرجال ليش ساكتين ؟؟
بقولج حل يناسب اذا انت من الامارات او قوانينكم مثل قوانينا
ارفعي عليه قضيه ...واطلبي الطلاق حركات يعني وهو اذا يباج ما بيطلق واذا طلق يعني ما ينفعج خلاص واصلا قبل القضية بيمسكونها جماعه علشان ايصلحون بينكم ...ويمكن تصطلح
لا لا تخافين الموضوع مب مخيف وبصراحه اذا الجماعه ما تحركوا يستاهلون مثل جذيه حركه سوء اهلج او اهله
يستحي؟؟
وين المستحى راح يوم اتزوجج وياب من بنت ؟؟

لااااااااااا
الغلط منج اتحركي
والله ما فيها شي
ولا تحرقين نفسج​

 

[أجمل أحساس 22]

نصيحه ياقلبي لاتتنازلين انتي خليه هو يتكلم خليه يبادر موانتي
وبنتك لها رب ماينسها

الله ييسرلك امورك

 

[نورماد]

اسال الله العظيم رب العرش الكريم ان يرد لك زوجك ردا جميلا وان يصلح حالكم ويسخره لك

 

[الهيزعة]

النوع الخجول


انتي قالت من النوع الخجووووووول

يعني حركيه ولا خلي ابوكي يكلامه

 

[صدق العطاء]

ابنتي الحبيبة

إذا كنت تحبين زوجك وتبغينه

لا تسوي شيء تندمين عليه

نصيحة ما بين الازواج كرامة

ارسلي له رسالة وقوليله انك تحبيه وانك باقية عليه

وما بتندمين لانه زوجك ستر وغطى عليك

الله يسهل طريقك ويريح بالك ويجمعك مع زوجك على خير

دمتي بحفظ الرحمن

لاتنسي ذكر الله​

 

[سماء المحبة]

حبيبتي لاتتركي للشيطان مجال أن يتركك تطلبين الطلاق والله الطلاق صعب ومر وعلقم وكل الصفات الشينه فيه خصوصا إذا كان زوجك محافظ على الصلاة ولايشرب خمر وش تبغين حياة أفضل من كذا تذكري حالاتك غيرك وتهون مصيبتك .. ولاتنسين الدعاااااااااااء​

 

[نـاريمان]

آختي وحبيبتي زوجك حب يأدبك وآلآ ينتظر منك آنتي آلمبآدره بآلصلح ..

حيآتي خليه درس لا عمرك تطلعين من بيتك لأي سبب وآلمفروض آن آهلك وآهله مآ يدرون عن مشآكلكم

وهذآ يبي يوصله لك بعد .. بعدين تعالي قوليلي انتي متضايقه عشان بنتك بس يعني زوجك وعشرة عمرك معاه

ما يسوى شي .. اسمحي لي آقولك آنتي آمآ تكآبرين آو ........... مآ ودي آجرحك ..

يا قلبي آنآ عآرفه آنه ممكن يكون غلطآن بس آنتي افهميه .. افهمييييييييييه تكفين ..

آلرجال اعتبريه كآئن حي ثاني غير المرأة آذآ زعلان ومعصب لا تسالينه عن زعله حتى هو يقولك ليش

ضايق خلقه .. آذآ عصب منك وقام يرمي كلام آنتي خلك صآمته حتى يخلص .. جربي ما راح يضرك بس لا تقعدين

تستعملين نظراتك بقوة وانتي ساكته وبعدين تقولين انه ما نفع ..

يلا الحين قومي استخيري وكلميه .. صدقيني ربي راح يكتب لك اللي فيه الخير..

يلا لا تقولين انهان وكرامتي اجل وش نقول عن الرجال وكرامته .. بعدين مسكين حرام عليك تقولين هو خجول

ودايم يجي يسلم ع ابوك وبنته وما تساعدينه ليش قاسي قلبك كذا لييش يعني بجد عاره انه خجول وساكته..

يلا حبيبتي سوي اللي قلتلك عليه وما يصير خاطرك الا طيب ..

 

[تحكمني ظروفي]

الله يفرجك كربتك اختي,,, لكن ست شهووور كثيره وش السبب علشااااان نقدر نفيدك,,,, الله يكون بعونك,,,,,,

 

[وقفه]

الله يصلح الحال ويرده لك ردا جميلا

 

[مآمه آحلى قمرين]

يا قلبي اتمسكي في بيتك بيدك واسنانك دام عندك اطفال حتى لو بنت صدقيني انتي خساره وبنتك اما هو راح يتزوج تاني ولا عليه من احد انتي بادري قولي لابوك يكلمه او قولي له ابي ارجع بيتي وان شاء الله اذا رجعتي بيتك حطي في بالك ودائم خليها ع بالك الطلااااااااااااااااااااق موبحل كلمهحطيها في اذنك ( ظل راقل ولاظل حيطه) انا غير موييده اذا الحرمه تهاوشت تروح بيت اهلي انا ياما انضربت وضرب واهلي للحييييييين ما يدرون والحمد لله لينا الجنه باذنه ..
تقبلي مروري وودي ..}