أريد حل لفطم ولدي عن اللهاية!

[مرحة : )]

السلام عليكم

كيف الحال؟؟؟
يعطيك العافية يا سوبر ناني وعساك عالقوة

الصراحة انا ابني عمره سنتين ونصف السنة
ولا ينام الا واللهاية (المصاصة) في فمه
وهالايام صار يصيح ويطلبها حتى في النهار

كيف افطمه عنها؟؟؟

وشكرا

 

[سوبر ناني]

يا هلا فيج اختي نووري
ولدج قلتي لي عمره سنتين ونصف يعني يفتهم
واكيد يتكلم ولو كلمات بسيطه
يعني لو قلتي له سكر الباب بسكره
ولو علمتيه دخول الحمام بيتعلم
ولو قلت له الحق ابوك طالع بالسياره على طول بتشوفينه يركض صوب الباب شايل نعاله بيده مستعد للطلعه
يعني ماشاء الله تبارك الرحمن صار كبير وايد على اللهايه

راح اعطيك طريقه حلوه لتتخلصين منها للابد
هاتي سلت المهملات وهاتي كور صغيره ولا اشياء وسخه او لعب قديمه متكسره وابدئي برميها في الزباله الله يكرم القارئين انت ترمين شيء وهو يرمي شيء مثل اللعبة تصير بعدين عطيه لهايته وقول له ارماها طبعا راح يرميها يوم بيرميها قول له اوف رميت لهايتك خلاص صارت وسخه ما تنفهع بنخلي الخدامه توديها الزباله الكبيرة برع البيت وخليه يشوف الخدامه وهي تطلع سلة المهملات للخارج وقول له خلاص الملهاه في الزباله ماعندنا غيرها
وكل ما بصيح يريدها قول له نسيت انت رميتها خلاص وممكن تشترين بدل عنها للطفل مصاصات الحلاوه كل ما بصيح يريد اللهايه عطيه مصاصه وقول له انت رميت اللهايه بس عندنا مصاصه
ومع الايام راح يتعود وراح ينساها

المصاصه ممكن الاستغناء عنها ومع الوقت طفلج راح ينسى الملهاه جربي وخلال اقل من اسبوع راح تتخلصين من الملهاه بس اهم شيء يكون قلبج جامد مهما بكى لا تعصبين ولا تضربينه بالعكس هو بكون محتاج حنانج وعضنج لحد ما ينسى اللهايه
وكونه يطلبها في النهار يمكن يكون يوعان لانه في هذا السن الاطفال ما يقعدون في مكان واحد وياكلون وقت الاكل بس في اوقات ثانيه بتشوفينهم يدورون الاكل فحاولي اول ما يصحى تريقينه والضحى تعطينه بسكويت بس خفيف ويكون قبل الغداء بساعه ونص على الاقل بعدين الغداذء والعصر ممكن حلويات بس لازم تكون قبل العشاء بساعتين
واهم شيء في حياة الطفل الروتين
وممكن بعد تاخذين الملهاه وتقولين لطفلج بس ماعاد اعطيك حتى لو صاح بس هذي صعبه لانه فيها نواح كثير وبكاء وعويل
وممكن يظن الطفل انج ما تحبينه
فانتي ظلي قول له انك تحبينه وانه كبير واثني عليه وقول له فلان صار ما يحب الملهاه شاطر صار كبير وممكن تشترين له لعبة هديه لانه ترك الملهاه

 

[مرحة : )]

رد : أريد حل لفطم ولدي عن اللهاية!

شكرا حبيبتي سوبر ناني
والله يرزقني الارادة والصبر وابدأ بأول خطوة
صحيح ان التربية متعبة عسى ربي يقدرنا عليها يارب

شكرا حبوبة فعلا نصايحك روعة وانا من متابعين حميع مواضيعك
:blush-anim-cl:

 

[حبيبه]

طيب والي عمر ولدها سنه ونص وودها تفطمه من اللهايه وش تسوي هل يفهم بها الطريقه ولا يبي له اسلوب ثاني

 

[مثل الورد]

عن نفسي عطيت ولدي اللهايه من الاربعين بس ماطاع تقبلها..

وشوي شوي اتقبلها بس عشان يسكت بالليل ولافي فايده...

ومن عمر 4 و 5 شهووور خذيته عنه لانه بعده مايفهم شو هي..

صاح شوي وبعدين عادي كنت ارضعه...

هالمعلومه قريتها في كتاب للاطفال .. لان بعد عمر الست شهور

يبتدي الياهل يتعوود عليها وبعدين اتخرب شكل اسنانه

 

[some1]

حبيبتي حاولي بالهدوء و كمان خلليه يكرهها من نفسه ، يعني مرة حطي له قهوة مرة ومرة حطي له دواء مر يعني خلليه يكره اللهاية و ينفر منها بهدوء ،،

 

[غراشيب]

أنا فطمت بنتي عن اللهاية و عمرها سنة و نصف ..

الطريقة ..
كانت قاعده تلعب وياي و أخوها الصغير عمل كاكا..
و طلعت الفكرة ببال خالتها ..
قامت .. و قالت لها .. عطيني اللهاية .. و خذتها منها ..
و غمستها بالكاكا .. و البنت تمت تصيح .. و تولول ...
نشت خالتها و قالت لها .. تعال نرمي اليع ( الوساخة ) بالزبالة ..
حطت اللهاية بالبامبرز و لفتها زين و عطتها بنتي تشلها تفرها بالزبالة ..
و رجعت بنتي تضحك و فرحانة .. ماما.. لهاية يع ..
و بعدها بنص ساعه ..
سألتها أغايضها .. حبيبتي وين اللهاية ..
ردت علي .. ماما.. يع .. و صاحت شوي و سكتت ..
أنا وايد كنت خايفة من الليل .. لأنها بحلقها طول الليل ..
و خفت من الصياح .. و ماعندي لهاية زيادة ..
و تخيلووو ..
و لا نشت و لا صاحت .. و لا طرتها من هذاك اليوم ..

ماكنت أظن الموضوع بها السهولة ..

 

[مرحة : )]

السلام عليكم
انا صاحبة الموضوع
حبيت ابشركم ان الحمدلله فطمت ابني عن اللهاية!!!!
باركوووولي
والفال للبامبرز ان شالله