أخطاء خمس في التعامل مع أمراض الأطفال

[راجيه الرضا]

الخطايا الخمس للتعامل مع أولادنا!

١.أول ما إبنك يسخن بتترعبى وبتبقى عاوزه تنزلى الحرارة فى أسرع وقت وأحيانًا بتجيبي مضاد من نفسك من الصيدلية.

الصح: خافض حرارة مناسب لسنه، تهوية المكان، كمادات أو دش ماء فاتر مهمين لكن أقل أهمية من الخافض، الكشف للاطمئنان، معظم الحالات بتخف فى ٧-١٤ يوم وحدها.

٢.أول ما الطفل يجيله وجع بطن أو إسهال بتديه فلاجيل أو أنتينال.

الصح: وجع البطن لوحده ليه أسباب كتير مش من علاجها المضادات دى، الإسهال فيروسي فى معظم الحالات بيخف لوحده ومحتاج الأهم ؛ محلول جفاف.

٣.لما الطفل يجيله برد ويرجّع مع الدور بنضغط عليه عشان ياكل.

الصح: شئ طبيعي جدًا مع التهاب المعده يكون مش مستحمل الأكل فكل ما تضغطى أكتر هيرجّع أكتر ، فنهتم بالسوايل والشوربة والأكل الخفيف المسلوق، بالعكس لو نفسه فى حاجة هيرضى ياكلها ومش هيتقيأها وكنتى مانعاها منه لأسباب تانية ( حلويات، بيتزا،غيرها) مفيش مشكلة مؤقتًا ياكلها طالما هتقعد في بطنه.

٤.لما الدكتور يقولك إبنك محتاج جلسة أو بخاخ صدر عشان عنده حساسية بتخافى وتطلعى على دكتور يقولك اللى يريحك.

الصح: الأصل إنك بتختارى الطبيب الثقة قبل ما تروحى، والأصل فى علاج الحساسية( وده ضيق صدر وكحة متكررة بتتحسن بموسعات الشعب) إنه يمشى على علاج وقائى وأحدث وأأمن شئ فى العالم الجلسات والبخاخات؛ بالعكس أدوية الشرب المزمنة تأثيرها على أجهزة الجسم أشد وأخطر.

٥.تدويرك على أدوية وفيتامينات لرفع المناعة للأطفال اللى تعبهم متكرر

الصح: إن دى غلطة مجتمع وثقافة نظام طبى بوصم الطفل كثير التعب بإن "مناعته ضعيفة" والحقيقة إن فى معظم الحالات العكس هو الصح، بيكون عندهم حساسية( فرط مناعة) ضد الجراثيم وتقلبات الجو فالجسم يتفاعل بأعراض البرد العنيفة أو الحرارة المتكررة، ده غير متلازمات الحرارة الدورية الى بتخفى عن كثير زى حمى المتوسط ومارشال.

#كبسولات_خطيب
الخطيب كلينيك ​