أحس بالغيرة .. :(

[دلع روح]

مرحبا حبيباتي ,,

محتاجه حد يسمعني ..

طبعا تكلمت فالموضوع وايد و إلين الحين ماحصلت الجواب اللي يقنعني ..

انا متزوجه من فتره قريبة .. و ريلي غير رومنسي بالمره .. وانا عكسه تماما .. لما أشوف الاهتمام

من اللي حولي كيف يحبون بعض و حبهم ظاهر وباين للكل ... أتضايق من حالي وأقول أنا شو سويت

عشان يكون ريلي جيه .. مب رومنسي مثلي .. يعني عمره ما طرشي لي مسج فيه كلمة أحبج ولا

مشتاقه لج ولا خاطري احضنج ولا ماصبر عنج .. أبدا .. أنا يوميا أطرش له مسجات حب ..

و شوق .. و غالبا يكون من مشاعري و خاطري .. أنا أحبه و أعشقه وايد .. قبل فتره بسيطة كنت

طالعه مع أخوي ومرته .. ماشاء الله عليهم .. طول الوقت يتبادلون النظرات و يتهامسون .. ويضحكون

مع بعض الله يحفظهم حق بعض .. كل يوم تقريبا لما احط راسي عشان ارقد اتم اصيح و اقول ليش

إلين الحين ما سمعت كلمة أحبج .. مع انه أدري أنه هو يحبني وايد .. بس حبه ابدا مب ظاهر .. يلست

واياه وايد واتكلمنا فالموضوع بس بدون فايده ما يتغير .. أغار لما ربيعاتي و بنات خالاتي يراوني

مسجات الحب و الغرام من ريايلهم .. و اقول ليش انا بس اللي مايطرش لي .. خاطري والله خاطري

يطرش لي كلمة وحده بس من خاطره .. أنا ما احسدهم بالعكس أتمنى الخير للكل و لي بعد .. شو أسوي

؟؟ أبغي ريلي يعبرني .. يطرشلي مسجات ,, أقل شي يقولي أحبج وتطلع من خاطره .. لما أناقشه يقول

ماعرف أعبر بالكلمات و مايعرف يطرش مسجات ..

 

[انسه رقه]

مرحباااااااااااااااااا دلع
لاتزعلين ولاشي فيه بعض الرجال مايعبرون عن الي بخاطرهم
عندي لك طريقه انشاء الله تفيدك
روحي اشتري كتاب رومنسيات زوجيه الازرق وغلفيه مع قطعه شوكلاته كبيره
وحاولي تسوي ليله حلووه على ضوء الشموع
وعليك بالاستغفار والله يسهلك امرك

 

[اماني النعيمي]

حاولي اتطنشينه شوي يمكن يحس انه فيه تغير ويغير من نفسه

 

[وصفة الماس]

حبيبتي انتي باادري في الكلام انتي تمي زني ع راسه بالكلام وكثر الدق يفج اللحاام واكيد بيقوولج شي والله ييسر امورج حبيبتي ~

 

[أريج الحياه]

انا مع الاخت أماني حاولي تخففين من الحنه لان بعض الرياييل مايحبون الحنه والزن وبيعاند ويمكن اذا تجاوب وياج بيكون لانج حنيتي وزنيتي فبتكون مالها طعم ...طنشيه وخلج عادي وخفي من مسجاتج والكلام الحلو بس مو يوصل للزعل بس اثقلي الثقل صنعه وشوفي شلون راح يتغير ويبدا يعبر

 

[بنت الشارجه]

عادي حبيبتي لاتزعلين ولاشي في وايد ريايل جي مايعرف يعبر بالكلام بس يكون يحب حرمته وايد صدقيني الغاليه

 

[القلب المهجور]

عندنا وعندك خير

 

[ايامي كانت حلوه]

الله يكون بعونك بس انا مع المثل اللي يقول < كثرة الدق تفك الحديد> خليك وراه بالكلام الحلوو وان شاء لله بيكون معاك

 

[معاناة الحياة]

اهلين اختي00اكثر الازواج كذا مايظهرون حبهم اهم شي انه يحبك من داخله واكيد يبين الحب من فعله معك

اما عن الازواج اللي يرسلون مسجات لزوجاتهم صدقيني ان اكثرهم يخون زوجته بشكل فظيع 0
لاكن اللي واثق من حبه لزوجته ووفاءه معها مو محتاج يثبتلها

 

[احساس يتيم]

يااااااااااااحياتي أنا زيك تمام..:bye1:
غرقته حب وشوق ولهفة فوق ماتتخيلي..وكان جامد:smoke1:..........وكنت اذوب قدامة لما اسمع كلمات الحب في التلفزيون.وكنت اقول هالخليجيين ماعندهم سالفة ليتي متزوجه لبناني.....وكنت قاعدة لة خنجر بالبلعووووووووم:icon28: ومالقيت نتيجة................
مليت ومرت الايام وخفيت عليه...حتى صار يتغزل ويقول كلام بحياتي ماكنت اتخيلة,لكن فيني عيب اقولة تكذب وهذا اللي راح يضيعني................الهي عنه اكتمي مشاعرك خليها بقلبك:shutup: ولا تعطيه اهتمام زايد وشوفي النتيجة الفتاكة:icon31:

 

[دينـــا]

المشكلة في اللي يقول احبك بالليل ويطقك الصبح

حبيبتي ...
انتي في تعمة البنات يحسدونك عليها يا قلبي
دام انه يحبك بقلبه مو كلام بلسانه بس ويطير بالعجة
ويحترمك ويقدرك ... فهذا هو الزواج... ومطلب كل علاقه

الرومنسيات مكملا حلوة تضفي نكهة
فقدانها ليس قضية
ومشكلتها محلولة انشاء الله

مجرد انتي دوري طريقه ينطق لك اول كلمة ويول احبك
كذا يكون كسر الحاجز ويجيك الخير ان شاء الله


لا تستعجلين على رزقك



{ولئن شكرتم لأزيدنكم}
اشكري ربك واحمدية على هالنعمة .... وربي يرزقك بالباقي

والله يديم بينكم المحبة والرحمة يااااارب.

 

[عنقود عنب]

حبيبتي دلع

الله يهنيكم و يسعدكم

والله ما الومك اذا حسيتي بقهر

لكن اول شي خليني اقول لك ...سوي اختبار بوصلة الشخصيات

وانا واثقة 100% ان زوجك شمالي وانت جنوبية

اذاَ ما تمرين به طبيعي ...يعني زوجك ما يعبر عن مشاعرة و زوجة تحترق عشان تسمع كلمة

انا اقول ...اذا لك قلب كبير وبال طويل استمري على اسلوبك معاه ..لكن بدون ما تتوقعين نتيجة حتمية ...او ان زوجك ينقلب لك روميو ...يعني لا تنتظري مقابل

او


انك تخفي عنه شوي ...يعني لا ترسلي مسجات حب ولا تسمعينه الكلمات الرقيقة الا في مناسبات معينه

انا مثلك لي 24 سنه اعاني من جفاف زوجي العاطفي

وياما وياما تكلمت معاه و زعلت ..يقول لي ما اعرف اقول كلام ...انا حبي بالتصرفات

الى ان سلمت امري لله .. ولكن ....انا ايضا بطلت اقول له كلام مثل الاول

بطل احضنة اذا رجع من الشغل ...بطلت ابوسة او اتقرب منه اثاء النهار ... تبغينه حس .... تمثاااااااااااااااال

لكني اترحت ...لاني كنت اعطي في السابق وانتظر مقابل ثم انصدم من ردة فعله

الان اذا هو عطاني مرة انا اعطية عشر

لكن اذا ما عطاني ...اريح نفسي وما اعطية

صحيح شي يقهر ...ودك الرومنسية تظل بين الزوجين لانها هي من تخلي الحب يشتعل ...لكن وش تسوين مع بعض انماط من الرجال اللي هذا هو طبعهم

ادري عزيزتي طولت علين ...لكن سبحان الله احس انك فتحي الجرح

راح اقول لك موقف ...انا اول ما اخذت لي جوال ..اتذكر ارسلت له اول رسالة حب

كتبت له كلمة واحده فقط (( احبك ))

تدرين وش رد علي ؟؟؟

قال لي ((لا والله))

يعني هذا وش تسوين له ..مع اني ادري اني اساوي روحة ...لكن هذا هو طبعة ..اذا لحقتي وراه تغلى عليك

قبل يومين ..كنا نشاهد فلم اجنبي ..وكان الزوج اذا رجع من العمل اخر الليل يبوس زوجته بووووسة طويله وفيها وله وشوق ..مع انهم عندهم اطفال

قال ابو الشباب ..وش ذا...كل هذه بوسة ..توك تاركها الصبح ..والله انه ما عنده سالفة

قلت له ..وانا اذا جيب ابوسك وانت راجع من الشغل ..تقول لي خليني انا تعبان مالي خلق

يعني انت رجال وهو مو رجال ؟؟؟

قام يضحك ..ويقول لي والله انا واحد ما افهم في هذه

 

[القلب النابض]

هلا اختي
انت تحتاجين لدورة ( حوار الكناري )
حيث ستفهمين كيف يعبر الرجل عن حبه بلغته الخاصة
ولا تقارنين زوجك بأي أحد... حيث ان المقارنة تقتلك ولا تفيدك
فزوجك ليس مثل زوج فلانة ... كل شخصية لها طريقتها واسلوبها
وفقك الله

 

[رحيق]

حبيبتي ...
كوني على يقين أن أغلب الرجال الخليجين كزوجك...
ولكن ليس كل الخليجيات مثلك .؟؟
أنتي اللتي بإمكانها تغير الوضع ..
ستسألين كيف .
كلام والجواب هو ....
أولا عليك تقبل الوضع فإذا حصل التقبل سيسهل الحل بعدها
عوديه على الجميل ...
عملت طبخه اسأليه اش رايك ..
حسيتي انها عجبته اسأليه بدلع ماأستاهل بوسه وأعطيه خدك ..
أرسليله رسائل كل كم يوم ولا تكثرين ..
ولا تنتظرين مقابل
بعد فترة أخبريه بأنك ستكونين سعيده حتى لو كتب كلة شكرا في الرساله وأرسلها لك ..

أخبريه في لحظات الصفاء والهدوء أنك تحبين أن يحضنك يقبلك
لمجرد القبلة وحاولي أن تخبريه بأن المرأة تحتاج لشحن البطاريه
لأنها لديها استنزاف شهريا وهي ايام الدورة وأن المرأة تحتاج الإهتمام في هذه الأيام
أطلبي منه أن يهتم بك فقط في هذه الأيام ..
حتى يتدرب ولا تطلبي منه الكثير فالناس أجناس
وليس كل الرجال يستطيعون امساك يد زوجاتهم في الأماكن العامه والنظر لأعينهن بهيام ...
وحتى في محيط العائله ...

احرصي على مدحة على أقل حركه يصدرها ولا تقولي (بس هذا
اللي قدرت عليه)

وفي النهايه انتي الرابحه
بإذن الله

كلمة أخيرة .
الحياة ياغالية ليست كلها شموع وورود وكلمات حلوة
غدا ستملأحياتك بالأطفال وستنشغلين
ولن يكون هناك مكان لهذه الأمور
لكن الأهم أن نحافظ على المودة والرحمة في علاقتنا الزوجية
ونحرص على تغير الروتين بين فترة وأخرى
فتح الله عليك واسعدك

تقبلي حبي
رحيق

​

 

[قمر الحجاز]

اتمنى من كل الاخوات محاوله الكتابة بالفصحى لغة القرآن لانه بعض الكلمات غير مفهومة

 

[قمر الحجاز]

اخيتي ليس كل الازواج يعبرون عن الحب بالكلام المعسول اذا رغبتي بذلك اخبريه اتمنى ان تغازلني وتغرقني بالكلام الحلو لانك ما شاء الله رائع ولا ينقصك الا التعبير وانا امرأة أحب اسمع الكلام المعسول

 

[شجرة الطيب]

إنت أعطي ياغاليتي دون أن تنتظري مقابل وتقبلي الأمر لأن طريقة تعبيره بالحب ليست كفلان أو غيره

هو له أسلوب خاص وتعابير خاصة لو دققت فيها لعرفتيها بنفسك.

فديتك ياعمري مافي إنسان كامل .. ومثل ماقالت وحدة من الأخوات أغلب الرومانسيين ينخاف منهم لأن لديهم قابلية للخيانة.. اشكري ربك ياحبيبتي ولاتقارنين لأنه أزواج ربعك إذا كانوا رومانسيين لازم يكون فيهم عيب ماموجود في زوجك .. وفي زوجك ميزة ماموجودة فيهم هم..

وادعي ربك وادخلي دورة حوار الكناري أعتقد أنها رااائعة بالنسبة لك.


الله يحفظك يارب ويملأ قلب زوجك رومنسية وحنية عليك ويغدق عليك بالحب بالوسيلة التي ترغبين فيها.

 

[محبة النبي محمد]

البنات ماقصرو قالو كل اللي بخاطري

 

[محبة النبي محمد]

شجرة الطيب كلامها سليم وفيه حكمه

 

[سمر الحلوه]

حبيبتى صدقينى مو كل الازواج دلع وغزل وانتى بنفسج تقولى انه يحبك
اقري الشخصيات انا زوجى لا يرسل رسائل حب ولاشي وانا في المقابل
ماارسل عطيه بس على قد ما تقدري ولا تتنتظري رد تراه اذا طلعكم ولا
حتى جاب اغراض للبيت يعتبره حب وعطاء لكل انسان تفكيره