اختي الغاليه احيي فيكي روح الطموح الي ما اوقفته مسؤوليات الحياه وادعو الله ان يوفقك بدراستك ويسهللك امورك ,,
الحياة باذن الله بتكون سهله وانتي ابدا لا تستصعبينها عشان ماتصعب ,,
راح احاول اساعدك لان ضروفي تقريبا تشابه ظروفك بس انا موظفه واكمل دراستي وعندي بيت واسره ,,
كل شي بالبدايه بيكون صعب بس هذا ما يعني اننا نستسلم ونرجع لورا ,,
أول شي ,,
في نهاية الاسبوع قرري الاكلات الي راح تطبخينها بالاسبوع , وقومي بتجهيز جزء منها مثلا قطعي البطاطس وحطيه بالفريز , الثوم افرميه وبالفريزر , الدجاج قطعيه وقسميه باكياس وبالفريزير ,,
اختاري اكلات سريعه وسهله يعني رز مع ايدام مثلا , او صينيه دجاج ورز ابيض وسلطه او مكرونه بالدجاج يعني الاكلات الي ما تاخذ وقت كثير ,,,
وعندك اختيارين ,,
يا انك تطبخينها بالليل وتحطينها بالثلاجه وثاني يوم تحمينها , او تسوين نص بالليل ونص بالنهار "" وعن نفسي اتبع الطريقه الاولى لانها اسهل وتريح وخصوصا اني ارجع تعبانه ..
اطفالك الله يحفضهم حاولي انهم ما ياخذون قيلوله بالنهار ابدا عشان مايجي المغرب او العشا الا وهم نايمين , عشان تتفظين لنفسك ولدراستك ,,
ترتيب البيت , نهاية الاسبوع يوم لغسيل الملابس وغسل الحمامات اعزكم الله ومسح البيت ويوم للكوي وتجهيز باقي ايام الاسبوع ,,
وباقي الايام يصير عندك تنظيف يومي الي هو غسل الصحون والمسح وغسل الحمام الي تستهلكونه يوميا ,,
دام اولادك يروحون للتحفيظ وقت العصريه فهذا وقت مناسب انك تاخذين قسط من الراحه لمده ساعه عشان تقدرين بالليل تكملين باقي اليوم ..
اتمنى اختي انك تكملين دراستك فهي سلاحك وسلاح لابنائك , ولا تتخلين عنها ابدا , وحاولي تكملين مشوارك الى النهاية وماراح تحسين بلذة النجاح الا اذا حققتيه , ولا تتاثرين بالكلمات السلبيه الاقي وظيفه ولا ما الاقي
الدنيا ارزاق موزعه ان كان لكي رزق بتاخذينه باذن الله بس انتي اسعي وتفائلي لان التفاؤل يجذبلك باذن الله كل خير ,,,
الله يوفقك عزيزتي ويسهلك امرك يارب , واتمنى اني اكون ساعدتك نوعا ما ..