آمل مساعدتي في حل مشكلتي

س

سعابيل نحلهـ

New member
إنضم
2009/12/19
المشاركات
20
بسم الله الرحمن الرحيم​

السلام عليكم ورحمه الله وبركاته​

جذبني المنتدى واسلوب من في المنتدى
وقد استفدت منه كثيراً​

ولكن اليوم وهي اول مشاركه لي​

اطرح مشكلتي بين يديكن
آمله بعـــــــد الله ان اجد حلا لها​

راح ابدا باللي صار لي علطول
<<<< ماعندي فرامل :icon31:​

اللهم فرج همي وهم كل مسلمه ومسلم​

ماادري من وين ابتدي
انا صارت بيني وبين زوجي مشكله من قبل العيد بثلاث اسابيع
وما اكلمه وما انام معه واطبخ الغدى واجلس اكل وانا ساكته واقوم وانا ساكته
ونفس الشي وقت القهوة اجلس وانا ساكته واقوم وانا ساكته والعشى مايتعشى في البيت
كان يوم الجمعه جاي يآخذني من اهلي وكان اتفاقنا انه يتأخر ما يجيني بدري لاننا طالعين في استراحه خميس وجمعه وقال اوكي منيب جاي بدري
اتفاجأ يوم الجمعه يدق علي الساعه 2 الظهر يقول لي بجي العصر آخذك
قلت تأخر شوي اوكي قال بجي العصر
قلت مابعد حطوا الغدى تأخر
المهم سكر وجلست مع اهلي شوي الا دق علي قال يالله انا عند باب الاستراحه قلت مابعد حطوا الغداء قال اقولك انا عند الباب بحتريك لين تتغدين بس بسرعه
قلت وين مابعد زان الغدا طيب خلاص بطلع​

وطلعت ودموعي في عيوني ما ابي امي تشوف دموعي وكان معنا في الاستراحه بنات عمي
وما ابي اتكلم قدام احد
والمهم رحت وركبت السياره وسلمت وبعدها ما عاد تكلمت اذا كلمني جاوبت وغيره ما قلت شي
وقال لي وين تبين تتغدين في اي مطعم قلت اروح اتغدى لحالي لاني عارفه انه متغدي مع اهله .... قلت ما ابي غدا ودني للبيت ورحت وعقبها ما عاد كلمته واصلا حطني في البيت وطلع يخلص اشغاله وجلسنا على هالحاله 3 اسابيع ما اكلمه ولا شي واذا بغيت طلبات للبيت كتبتها في ورقه وعطيته بس اذا دق علي وهو طالع ارد على مكالماته واكله وشربه ولبسه جاهز ماقصرت معه
وفجأه سمعت من امي انه رايح لاهلي مع زوج اختي علما ان زوج اختي صديقه الروح في الروح
يشتكي لي عند اخوي ولا جايب زوج اختي كمبيوتر اختي معه
يقول لاخوي شف اختك وش كاتبه لاختها في الكمبيوتر تقول لها اسرارنا
انا لما دريت انه ماخذ كمبيوتر اختي انهبلت واللي قهرني اكثر ان اختي ماعندها في المسن حفظ المحادثات بس زوجها ما ادري وشلون رجع المحادثات
حسبي الله ونعم الوكيل
ولا اهله ما يكلموني مثل اول ولا اول يكلمون امي يقولون بنتك ما تاكل زين اكليها لين جتك خليها تسمن :bigsmile:
واذا رحت عندهم كلي تقهوي اشربي
ماقصروا عني بشيء ابد
تقريباً اني ساكنه معهم بس ان مطبخي لحالي ويقول لي زوجي لازم ثلاث ايام في الاسبوع اروح لهم ولا ما انزل الا لما يدق علي ويقول لي انزلي
وما يبيني اقصر في البيت ويبي كل شي نظيف قدامه وشلون وانا يوم في البيت ويومين عندهم ​

ولا بعد كل اربعاء وخميس مايجلس في البيت يطلع ولا يجي الا الفجر واحيانا 7 الصبح
ومايبيني اجلس في البيت يا اكون عند اهله ولا في جمعه مع اهل امه تكون في استراحه
ولا عند اهلي ولا وحده من اخواتي
بس مو على كل حال من الاحوال اطلع من البيت ودي اجلس في بيتي معه واسهر معه
يقول انا كل الاسبوع في الدوام واربعاء وخميس لاتناقشيني بطلع مع ربعي
المشكله صار لنا سنه وتسعه شهور بس ربي مارزقنا بعيال
وطول الاسابيع الثلاثه مااكلمه ولا جابني عند اهلي
وماجابني الا ثاني العيد
ولا سووا اهله فيني حركه بايخه
تخيلوا ما قالوا لي ان يوم العيد بيروحون لاهلهم ولا زوجي قال لي
ويوم جاء يوم العيد المغرب قام من النوم الا اني مجهزه القهوة قال لي ماتجهزتي قلت مو تقول انك ماراح توديني لاهلي
قال بتروحين مع اهلي قلت محد قال لي ليش ماقلتوا لي من بدري عشان اتجهز
واروح اتحمم واستشور شعري واتزين وان شاء الله رحنا ويوم جينا نطلع تخيلوا زوجي ما دق علي وقال تراني بجي لا دق على اخته وقال لها تراني جاي في الطريق وشوي يدق عليها ويقول انا قريب تجهزوا وشوي يدق عليها يقول انا عند الباب اطلعوا
معليش استحمل هالنقطه
بس اللي قهرني انهم يقولون مع السلامه ويطلعون مايقولون لي يالله ترى زوجك جاء
المهم سحبت عليهم وماكانهم طلعوا جلست اكمل سالفتي مع اللي جمبي ولطعتهم شوي وماجوا ونادوني ولا شي تخيلوا
وبعدين رحت ولبست عبايتي وطلعت وركبت وساكته طول الطريق
بس حسبي الله ونعم الوكيل
ليش يسوون فيني هالشي
وش سويت لهم؟؟؟ حرام طيب مشكلتي مع زوجي وش دخلهم يزعلون علي
ولا مصروفي الشهري 300 ريال واذا احتجت لو مبلغ بسيط مايزيده لي
وكسوة عيد رمضان كانت 1000 ريال واحتجت زياده وطلبته قال احمدي ربك اني شريت لك عبايه واحمدي ربك اني شريت لك مكياج واحمدي ربك اني وديتك تصبغين شعرك
يعني هي مسألت مذله ولا وشلون؟؟
اهلي ماقصروا عني في شي
وجوالي يجلس اربع ولا خمس شهور مايسدده وماقلت شي ساكته
وماعندي ثابت في البيت يعني اذا بغيت اهلي يا يدقون علي ولا يشتري لي شحن ب 10 ريال
ما ادري ليش يسوي فيني كذا
ومصروف عيد الاضحى عطاني 1500
والحمدلله ربي بارك لي فيها وكفت اغراضي
واحتجت زياده اشتري لي ملابس عاديه للبيت عشان الشتاء قال لي ياتشترين لك شنطه يا الملابس الشتويه علما اني مانويت اشتري كثير بس اشياء اساسيه احتاجها ايام العيد
وعقب حركاته لي هذي​

يوم وداني لاهلي ثاني العيد جلست عندهم ولا دق علي الا مرتين ثالث العيد ولا رديت عليه
وعقبها ماعاد دق علي وانا جوالي استقبال وما معي فلوس ما عطاني شي ​

هذي بعض من مشكلتي وعارفه اني طولت عليك بس استحملوني وابي اشوف ردودكم واراكم​

وان شاء الله راح اكمل لكم المشكله فيما بعد​

استحملوني
املي بالله كبير انه يفرج همي وهم كل مسلمه ومسلم​
 
اسال الله ان يفرج همك حاولي تعرفين شخصيتك وشخصية زوجك هذي اول خطوة وبعدين نتكلم
 
اول شي اشكرك على ردك على الموضوع

واقول لك انا انسانه حساسه جداً
وهو شخص عنيــــــد جدا
ويحب يفرض رايه سوا مقتنع او مو مقتنع
وكم مره يجبرني على شي واذا جاء بعدين قال ليش ماعارضتيني وانا اعراضه يقول تمشين على رايي
 
ياختي الله يهديك انت غلطان لما زعلتي عشان الغداء هو محب يردك البيت عرض عليك المطعم وفي داك الوقت يمكن يكون زوجك محتاجك اوتعبان واهله حاولي تكسبيهم عشان تكسبي حب زوجك وطنشي تصرفاتهم الي ماتعجبك والله يكون في عونك
 
الله يعينك ويفرج همك
حاولي تتكلمين معاه وتفهمين منه وش السالفة !

وياليت توضحين اكثر .. هل انتي الحين في بيت اهلك ؟؟
 
انتى غلطانه وكبرتي الموضوع يوم جا وخذك من الاستراحة وقالك من اي مطعم اجيبلك غداء هذا دلليل انه بيعتذرلك
عاملي زوجك وكانه طفل دلليه وشكل زوجك شمالي اقري عن نمطه وعرفي كيف تتعاملين معه

وبخصوص اهله اكسبيهم
 
طيب احنا يالحريم طماعات كان يوم عوضك بطلعه للمطعم سكتي سراحه انتي اللي كبرتي الموضوع ؟؟
 
الله يفرج همك ويزيح غمك ويسخر لك زوجك ويسخرك لزوجك


أعذريني أشعر أنك عنيده مثله


معليش عزيزتي بادري وأعزميه في مطعم وإعملي له مفاجأة


هدية صغيرة وأكتبي فيها هدية تجديد المحبة ونسيان

الماضي والبدء في صفحة جديدة ..وحاولي تغير من طريقتك

أجذبيه لك بالمحبة والمدح والدعاء (الله لايحرمني منك الله يطول

عمرك الله يسعد أيامك ) إجعليها نوع من العلاج وأحتسبي عملك


عند الله سبحانه وتعالى ولن تندمي وبأذن الله ستزول المشكلة ..
 
انتي غلطانه صحيح انه شي يقهر وقعدت البنات والجمعه حلوه

بس صدقيني لو انك ما عانتي وزعلتي ولاكبرتي الموضوع احسن لك محد بنفعك الا زوجك معليش هو بعوضك بلمطعم ليش ضليتي زعلانه

تر الرجال بس يحس ان المرء زعلانه تر ياذيها اكثر الرجال يحب المراه المطيعه البشوشه الضحوكه

طريقتك غلط ياعمري ونتي لس باول المشوار مع الوقت راح تفهمينه اكثر صدقيني ياعمري طاوعي زوجك ولا عليك من اهله ولا عليكي من احد ارضيه خليه يشم فيكي الريحه الحلوه لا تزعلينه تعيشين سعيده

انه احس انه الغلط منك مو منه الله يسعدك
 
معليش اختي انت غلطانه كان المفروض تروحي معاه مطعم وتستانسي وتنبسطي حاولي الان انك تتقربين له وتنسيه الي حصل واهلك ماعليك منهم مايهمونك اهم شيء هو اعملي اي حركة عشات تقدري تتكلمي معاه بدون مايحس انك تنازلتي مثلا تعبانه او اخترعي اي قصة وتكلمي معاه وبعدين تقربي اليه وتدلعي عنده ودلعيه وحافظي على زوجك لانه يحبك كثير بس ما يبغى يبين لك,الله يسعدك يااختي معاه
 
الله يهديك يا اختي اسمحي لي اقولك انك غلطانه في تصرفاتك اولا قال اي مطعم وكان ردك سي بالنسبه له وهذا اعتذار وان مهم رضاك عنده بس لنتي رديته وجرحتيه وهنا ضيعتي على نفسك فرصه للتسامح وماراح يكرر لك الاعتذار وانتي حساسه والمصرو ف ما قصر مدام موفره كل شهر وقدرتي تعودينه على هذا الشي فهذا نجح منك وتقدير من ومصاريف العيد معقوله مدري كم راتب الزوج والله زوجك ذوق بس لاتخسرينه بزعك وحساسيتك والله غير ما يشوف ولاريال واذا اخذته منه بعد طلعه الروح
بالنسبه لاهل الزوج شكلهم يحبون زوجك ويخافون تاخذينه منهم عشان كذا يحاولون يكون عندهم لا يهمونك
وزوجك يحب اهله ايتغلي هالنقطه عشان تكسبينه وامدحيهم امامه وكرميهم وخليه قويه ولا تخلينهم يهينونك وتغاظي عن الامور التافه منهم وانصحك بالجوء لله والدعاء وقرات قصه خالد وندى وموضوع طوق الماس سر الاعجاب للاخت كاندي رائع وراح ينفعك والله يوفقك وخبرينا عن اخبارك
 
يا أختي الله يهديك ليش كبرتي الموضوع الحين الكلام حق المطعم انتهى وما تنفع كلمة ياليتني سويت كذا إبي اقعدي معاه اعرفي وش السالفة لاتصيرين عنيدة وإلا حياتك ماراح تمشي أما السالفة حق المحادثات اللي بينك وبين أختك أنا مافهمت وش السالفة بس إذا كنت تقولين لأي أحد أسرارك اللي بينك وبين زوجك بالنهاية ما راح تلومين إلا نفسك لأن المشكلة إذا طلعت راح تكبر
أما عن تعامل أهله معاكي فهذا شي طبيعي أكيد زوجك شكالهم أو شافوا زوجك زعلان منك ما يكلمك فقالوا زعلت ولدنا وأنت تعرفين طبع الأهل حاولي تكسبين زوجك وتكسبين أهله
والله يوفقك
 
اولا اشكر كل من ردت على موضوعي

وثانياً يمكن انا غلطت

وبعدين يوديني المطعم واكل لحالي وهو متغدي مع اهله


و سالفت الكمبيوتر ان زوج اختي يفتش في محادثاث اختي ويقول تراها تسولف على اختها عنك اوكي كل وحده تشكي لاختها تبي حل لمشكلتها بس انا ماشكيت لها اشياء خاصه
يعني اشياء بسيطه بس مهما كانت ثقتك فيني ماتجلس تنبش في الكمبيوتر وتدور من ورانا اشياء تتصيدها علينا

بس تخيلوا من حطني عند اهلي ثاني العيد مادق علي الا مرتين وماكنت عند الجوال وجوالي استقبال
ومامعي فلوس اشحن وحاط في ذمتي اني ما اطلب من اهلي فلوس

وكيف اكلمه ؟؟؟؟
وكيف اعزمه وانا ما معي فلوس ولا وشلون اجيب له هديه اتسلف من اخواني مثلا حاطها في ذمتي ما اطلب من احد ريال


ولا في عيد رمضان كنت قايله من اول ايام رمضان العيد هالسنه عند اهلي وكل وحده من اخواتي بتجيب لها شي وانا ابي اخذ معي حلاو
قال اوكي
ويوم جاء قبل العيد بيومين وقلت ما شريت الحلاو قبل الزحمه
قال من قالك اني بشتري
اشتري من مصروفك 1000 قلت مصروفي مابقى فيه شي
قال انا مالي دخل منيب شاري دقيت على اختي وقلت لها ماقدرت اشتري حلاو
اشتري لي وانا بعدين اعطيك الفلوس

يوم درى اني وصيتها حطها في ذمتي اني ما اطلب من اخواني لو ريال
وقلت له ودي اشتري لامي هديه للعيد قال انا منيب ولدها اشتري لها

وموقف صار لي قبل عيد الاضحى باسبوع
كنت عند امه وكانت اختها جايه والمهم بعد العشى جالسه تسولف مع اختها وانا سرحت وماسكه خصله من شعري العب فيها
قالت لي امه انتي شكل فيك حاله نفسيه قلت ليش قالت دايم تلعبين في شعرك
قلت عادي قالت لا فلانه تآكل شعرها من الحاله النفسيه وانتي تلعبين فيه
قلت لها انا كثر التفكير اتعب راسي

بس مهما كان انا مرة ولدك واعزك وتعزيني وماقصرت عنك بشي
ماتقولين هالكلام قدام اختك والله طاح وجهي طيحه بس الحمدلله سكت ومارديت وعادي وضعي وكملت جلستي معهم وانا اضحك واسولف ما كأن شي صار
والله ماتتخيلون وش كثر اعز اهله واكرمهم وهم مثل يعزوني بس مدري وش اللي قلبهم علي فجأه
وانا كل كلامي له الله يخليك سم ابشر
واذا جاب شي الله يعافيك ماقصرت
واذا وداني مطعم الله يغنيك
بس ما ادري كيف تغير

طلعاتنا مع بعض مو مثل اول جلستنا مو مثل اول على اني ماقصرت معه بشي
كشخه واكشخ عطور واتعطر مكياج واحط بس يقول لي لاتحطين قلت اوكي ماراح احط
وقلت مهما كان الرجال بين فتره والثانيه يحب الحرمه تتمكيج واحط ويستانس اذا حطيت بس نفس الوقت لا تقربين عندي ولما تمسحينه وانا اسأله ليش طيب يقول ما ابي يجي ملابسي شي وتدخل اختي ولا احد من الصغار

ومره من المرات كنت عند اهله وتقهويت وسولفت معهم وشبعوا مني
قلت عن اذنكم بنزل عندي شغل

وقلت قبل مايجي استغل الفرصه واغير لبسي واسوي جو في الغرفه
واحط الشموع والبالونات المهم اني غيرت الوضع ولما جاء قال ليش تنزلين من عند اهلي
من قال لك تسوين كذا كان جلستي عندهم قلت سولفت وتقهويت واختك عندها شغل وامك بتجلس مع ابوك قلت بنزل اخلص اشغالي
قال اقولك طفي الشموع
والله اني انقهررررررررررت قهر محد يتخيله وراح وتحمم ونام وخلاني
انا اتغاضى كثير بس هو الله يهديه

​
 
معليش نسيت نقطه مررررررررره مهمه طيب انا شكيت لاختي سالفه بسيطه

احياناً اختي تدري اني رحت للسوق ولا لمطعم ولا اذا كنت بروح لاهلي مو مني من زوجها يقول له زوجي قبل مايقول لي انا يازوجته
بس المشكله هو مايخبي عن زوج اختي اي شي لو بنروح مطعم دق عليه قال بنروح للمطعم الفلاني واذا طلعنا من المطعم دق عليه وقال طلبنا كذا وكذا وفاتورتنا كذا واكلهم زين ولا لا وكل شي
حتى لو بروح للسوق دق عليه وقال له وقال انها شرت من المحل الفلاني والسوق الفلاني رحنا ولا اعجبها شي
تخيلوا تقريباً يكلمه في اليوم 8 الى 15 مره نفسي اعرف وش يقولون لبعض شي يقهر
لو اروح لاهلي مايدق علي كثر مايد عليه ولو كلمته وهو عنده قال انا مع ربعي اكلمك بعدين
يعني كل سر بيني وبينه يروح يقوله لزوج اختي
وليش يسوي كذا؟

ويقول لي اذا سافرنا بسافر معه واخته ولا مافيه سفر لحالنا ماتوصل لكذا والله
ولا ثالث ايام الزواج كنا في مكه ومادريت الا جواله يدق صار زوج اختي ويقول له ان زوجتي تعبت ووديتها للمستشفى وصارت حامل وتصدقون ان زوج اختي مابعد قال لامه وابوه ولا حتى لاهلي وتوه مابعد طلع من المستشفى وش تسمون هذا؟

انا اعتبره تخلف صراحه صبرت لين نرجع وبعدين علمه
بتقولون لي تناقشي معه باسلوب حلو وهداوه تناقشت معه وقال شوفي هذا صديقي من 8 سنوات وعشرة عمر قلت اوكي عشرة عمر
ماقلت لك لا تجلس معه بس مو كل شي يصير بيني وبينك تروح وتقوله له فيه اسرار ماتنقال
قال لي بس مهما كان هذا صديقي
والله فيه مشاوير اروح لها لما الان اهلي مايدرون عنها وهو يدري عنها ولا يفضحون انفسهم زوج اختي يروح يقول لاختي اختك راحت كذ ما قالت لك

حركاتهم بايخه
على العموم انا حالياً عند اهلي وطالبه منه الطلاق
وبخيل لو ندخل مطعم وشاف اسعاره غاليه يطلعني منه
لو اعجبني شي في السوق وصار غالي قال لا غالي

وكم مره عزمته في مطعم راقي وغالي يقول لي لا مانبي نجلس بنطلع قلت انا اللي عازمتك انا بدفع مايهمني المبلغ واجلس
والحمدلله ربي يفرج همي وهم كل مسلمه ومسلم يارب
ادعي ربي يفرج لي ويكتب لي الخير وهو ارحم الراحمين
ادعوا لي يا أخوات
معليش طولت عليكم واعذروني
​
 
لاتعليق
بس الي احسه كلكم عنيدين:icon30:
وبصراحه
كل واحد ماخذ حقه من الثاني:icon30:
ولكن بطريقته
نصيحه لك يا الغاليه:questionmark:
لاتحطين راسك براسه ترا انتي في الاخير الخسرانه:busted_red:
وخصوصآ ماعندك منه عيال
حسني العلاقه واعملي بطيب اصلك وما يرضي رب العباد
واكسبي اهله وعامليهم مثل ماتبين مرت اخوك تعامل اهلك:shiny:
 
اشكرك اختي ودي بقلب قوي على ردك

بس والله ماتدرين وشلون اعاملهم
والله اني اعامل امه مثل امي واخواته مثل اخواتي ويمكن احسن

بس امممممممممممممم صدقتي كلنا عنيدين بس انا زياده على عنادي اني حساسه

وانا الحين عند اهلي و يمكن تحسفت اني طلعت بس وش اسوي غصب عني

وما اقول الا الله يكتب لنا الخير ومافيه
 
تأكدي تعاملك هذا ماراح يروح خساره بتلقينه:bigsmile:
يكفي انهم بيذكرونك بالخير
ماتأذو منك
انا ابقولك شي؟؟؟
انا متزوجه وكنت اعامل اهله مثل ما قلتلك وكنت توني عروس وجو وسكنو عندي وكنت حاطتهم فوق راسي وطبعا ماكتب ربي نستمر وانفصلت وجبت منه بنت:sad_1:
والله يشهد علي لي منفصله 5سنوات وانا متزوجه من 3سنوات
تدرين الين الحين يذكروني بالخير
ودايم تصير صدف ناس يعرفوني :shiny:
يعرفونهم يقولون وش مسويه لهم انه امه مرره تدعيلك
والحياه دروس وعبر:icon30:
ومالك الا زوجك مادام يخاف الله ولا يسوي معاصي
ارجعي وابدي حياه جديده
لوتطلقتي لا سمح الله بترضين تعيشين مع واحد متزوج
شخصيتك لا تسمح
اسألي مجربه وشوفي قصتي اقريها
والله اني ندمانه اني تطلقت من ابو بنتي وياليت جلست معه ولا المرمطه الي عايشتها الحين:sadwalk:
 
الله يفرج همك ويرد لك زوجك ردا جميلا
لكن سؤال هو يوم جا اخذك من عند اهلك وانتي مابعد تغديتي شووق والا زعل؟؟
اذا كان زعل شوفي الاسباب وتنازلي شوي ويمكن في باله شي ماقالك عليه والا ايش اللي مزعل اهله كمان عليك؟؟
ومادام كذا طبعه كل ما صار شي يطلعه برى فمابيتغير لكن حاولي ماتقولين اي سر اما الاشياء العاديه رحنا وجينا والسوق والمستشفى بالطقاق..
ما اقول الا الله يفرج همك
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل