حلمي اصبح سيدة اعمال معروفة

[باقة ورد احمر]

السلام عليكم ورحمة الله وبركاته

امنيتى اصبح سيدة اعمال معروفة ....... ولكن هل في امل

وممكن يتحقق حلمى


ولكم تحياتى

 

[غلى روحي mm]

ان شاء الله بيتحقق حلمج بالاصرار والتحدي والاستمراريه والصبر والابداع وعيشي بالامل عيشي بالتفاؤل وأحسني الظن بالله كذلك الصلاة تزيد وتبارك بالرزق الحلال وكثرة الاستغفار تزيد من المال و التصدق للفقراء ان شاء الله الاخت دلوعة مملكتنا مابتقصر لانها لها خيره بهالمجال واخواتي البلقيسات مابيقصرون معج الله يحقق لج مبتغاج..

 

[b7r]

السلام عليكم

ان شاء الله تصيرين سيدة اعمال وناجحه باذن الله ..

هالشي بايدكِ انتي لازم تبدئي وتثابري وماتوقفي طموحاتكِ ..

تحتاج منكِ لعلم ومعرفة ودراسة وخبره ..

وقبل كل شي تحدي واصرار وطموح ..

تحتاج لتعب وارهاق .. بس دام انكِ نويتي على هالشي لاتوقفي ابداً ..

ابدئي بشي بسيط بس حطي هدفكِ قدام عيونكِ ..

وقرري انو خلال سنه وحده لازم تسوين شي واكتبي قرارتكِ بورقه ..

واكتبي الاشياء الي لازم تنجزيها برضو ..

واكتبي انجازاتكِ الي حققتيها ولو كانت بسيطه ..

1+1 = 2

البسيط بيكبر والسلم يبدا بدرجه .. والقمة اوله خطووه


والله يوفقكِ ياارب وتنجحين وتصيرين من اكبر سيدات الاعمال ..

 

[دلوعة مملكتنا]

غلا روحي
شكرا غاليتي على ترشيحك لي بالرد والخبرة مع انه خبرتي بسيطة جدا ولكن لي اطلاعات على المشاريع وما احب ابخل باللي اعرفه لان ممكن ما اكون انا طبقت فغيري ممكن يطبق وينجح ...
واتمنى نسمع عن مشروعج غاليتي ..


باقة ورد حمراء

من اسمج مبين عليج رومانسية( جد اموت على الرومانسية انا ) .. وحاطة رجل على رجل ومسترخية تحلمين .. وكتبتي لنا هالموضوع ..

ههههههه

نجي للجد ..

انا من رايي الشخصي المتواضع .. اذا تبين تكونين سيدة اعمال

اولا :
حددي المجال اللي تبين تكونين فيه سيدة اعمال ؟؟
ثانيا :
اقراي وتثقفي وقابلي من هم في نفس المجال وقصص النجاح اللي اشتهرت في نفس مجالك وحبذا لو كانو من مجتمعنا الخليجي ..؟وما يمنع نقرأ للكبار العالميين ..
ثالثا :
ضعي لج مثل اعلى .. معين مثلا سيدة الاعمال الفلانية اللي نجحت بمجالك .. واتبعي كل مقابلاتها وخبراتها بنفس المجال
رابعا :
تاكدي من انك تمتلكين راس المال الكافي لهالمجال مع وضع مال اضافي للازمات او الظروف الطارئة ليستمر المشروع ولا يتوقف عند اول عقبة ..او خسارة ..
خامسا :
اختاري لك مشروع ومكان مميزززز لاقامة المشروع ..
سادسا:
تابعي مشروعك بادق تفاصيله ومتابعة الجودة بنفسك
سابعا :
اختاري لي لك موظفات او موظفين خبرة حتى لو رواتبهم اكثر يبنون لك اسم مميز
ثامنا :
وسعي دائرة نشاطاتج وتسويقج بافتتاح الافرع وسهولة التواصل مع زبائنك الدائمين
تاسعا:
اختاري طريقة لعرض نفسك اقصد مشروعك في كل مناسبة حتى لو كان بدون مقابل مادي لك كتقديم الهدايا والملابس الخ لمذيعات او برامج التلفزيون ..
عاشرا :
تصدقي من مالك وزكي عنه .. بذمة وضمير .. تنطرح فيه البركة باذن الله .. وابتعدي عن المشاريع الحرام او المشتبه بها محرمة
احد عشر :
احضري دورات لكيفية التعامل مع الجمهور ووورش سيدات الاعمال للتعرف على عالمهم لتصبحي مثلهم .. وافضل منهم بعد ..

 

[*مشاعر مكتومة*]

اهلا وسهلا بك عزيزتي .
ليش حبيبتي مافي امل مدام عندك طموح اكيد في امل
بس انتي حددي اهدافك وابدئي من الصفر فأغلب سيدات ورجال الاعمال بدئوا من الصفر حتى ماتضغطي على نفسك بالمشروع وتتوسعين فيه شوي شوي ويكون عندك خبره في مجالك وتطورينه وربنا يوفقك .
دمتِ بخير .
​