حقيقة مخاطر الميكروويف

[راجيه الرضا]

حقيقة مخاطر الميكروويف

هل إستخدام الميكروويف لتسخين الطعام آمن ؟

الإجابة قولاً واحداً .. آمن بشروط !!

يعني إيه ???

يعني فيه محاذير للإستعمال ونصائح هنقولها دلوقتي لو إلتزمت بيها مفيش أي خوف من إستعمال الميكروويف ويكون آمن وصحي

أول نصيحة :

لما تفكر تشتري ميكروويف لازم يكون ماركة محترمة ومعروفة .. وده ليه ؟ علشان نضمن مراعاة تطبيق معايير وشروط الأمن والسلامة عند التصنيع .

ممنوع إستعمال الأواني المعدنية بشتى أنواعها في الميكروويف ، و ممنوع إستعمال كل أنواع البلاستيك بشتى أنواعها بإستثناء المخصص للإستعمال في الميكروويف وبيكون عليه علامة الاستعمال في الميكرويف ونشتريه من مكان مضمون علشان اضمن ان العلامة دي سليمة .

لما تشتري أي أكل معبأ ، يجب الإلتزام بتعليمات الطهي والتسخين و فترة الوقت المناسب اللي بتبقى مكتوبة على العبوة من الخارج .

كتالوج الميكروويف مش بيترمي ولا يتركن لما أشتريه زي ما أغلب الناس بتعمل ، لازم يتم قراءته بعناية والتأكد من معرفتك بكل شروط الأمن والسلامة والمحاذير .

لازم دايماً يكون الميكروويف نظيف جداً ، ومفيش أي جزء منه مكسور أو مشروخ ، يعني تبقى حالته دايماً كإنك لسة مشترياه .

لو في أي مشكلة أو عيب في الميكروويف أو حتى زجاج الباب مشروخ أو مكسور ، محدش يصلحه غير توكيل الشركة المُصنعة فقط ، ودي نقطة مهمة

مينفعش أقف اتفرج على الأكل وهو بيلف جوه الميكروويف تلافيا لامتصاص الجسم لأي اشعاعات ... بتتفرج على ايه حرررررتك ده مجرد طبق بيلف ولما يخلص هيزمر لك تيجي تاخده ???

الأكل بيفقد قيمته الغذائية عند طهيه أو تسخينه في الميكروويف ؟؟

طول فترة التسخين وإرتفاع درجة الحرارة اللي بيتعرض ليها الأكل سواء في الميكروويف أو أي طريقة أخرى للطهي زي القلي أو الغليان أو الشوي أو التحمير أو في الفرن العادي بتؤدي إلى فقدان أو تقليل بعض من القيمة الغذائية للأكل اللي بنعمله ، لذلك ....
النصيحة الذهبية عند الطهي أو التسخين سواء في الميكروويف أو غيره ( أقل درجة حرارة لأقل فترة ممكنة )
وده كان رأي منظمة الصحة العالمية بشكل واضح وصريح .

الأكل بعد ما يطلع من الميكروويف بيبقى فيه إشعاع ومسرطن ؟

كلام ولا ليه أي أساس من الصحة و علشان نبسط الأمور اعتبر أشعة وموجات الميكروويف زي الضؤ اللي طالع من اللمبة ، بمجرد ما بتطفي اللمبة الضؤ بيختفي .


تأكد من إن الأكل اللي بتسخنه في الميكروويف درجة الحرارة وصلت لكل جزء منه ، يعني ميبقاش سخن من بره ومن جوه بارد ، لإن ده بيبقى مُضر ويسمح بوجود بعض الأنواع من البكتيريا داخل الأكل نفسه لأن الحرارة لم تقتل كافة الميكروبات الموجودة في عمق الطعام .

وعموماً فكرة التسخين في الميكروويف بتعتمد في الأساس على نسبة المياه اللي موجودة في الأكل ، بمعنى إن كل ما نسبة المياه تبقى كتير في الأكل كل ما يسخن بسرعة ، وكمان سطح الأكل اللي بتسخنه في الميكروويف كل ما كان في مسافات كبيرة بين جزيئاته هيسخن أسرع .
مثال للتوضيح لو حبيت تسخن قطعة مكرونة بالبشاميل في الميكروويف ... لو حطيتها سليمة مش هتسخن كويس من جوه لإن كميه السوائل فيها قليلة وكمان المسافات على سطحها شبه مُغلقة ،،،،
لكن لو قطعتها لقطع صغيرة هتسخن أحسن وأسرع لإن الموجات هتقدر توصل بسهولة لكل جزء فيها

في حاجات ممنوع نسخنها أو نطهيها في الميكروويف زي البيض مثلاً أو الهوت دوج ( لحوم مُصنعة مُسرطنة ) لأن سطحها شبه مُغلق ولا يسمح بإمتصاص موجات الميكروويف .

تعريض الثوم لأشعة الميكروويف لمدة 60 ثانيةً كافيةٌ لإبطال عمل العناصر المضادّة لمرض السرطان ، لذلك يُنصح بتجنب طهي أو تسخين الأكلات التي تحتوي على الثوم في الميكرويف لضمان الحفاظ على قيمته الغذائية .

تسخين الحليب لمدة 6 دقائق في الميكروويف يؤدي إلى تحويل 30%-40% من فيتامين ب12 إلى وضع الخمول .

الأكلات اللي أحياناً بعد تسخينها في الميكروويف بتلاقيها زي ما تكون جًلدت وخصوصاً سطحها ، ده بيبقى نتيجة إنها فقدت جزء كبير من السوائل المكونة لها لذلك كل ما تقل مدة تسخين الطعام كل ما كان جووووسسي ومحتفظ بفوائده .

مفيش أي أبحاث علمية أثبتت خطورة الميكرويف على المرأة الحامل بشررررط عدم كسره أو كسر الزجاج واجراء الصيانة الدائمة له لضمان عدم تسرب الأشعة .

بالنسبة لفك المجمدات في الميكرويف :

قد نجد أحيانا عند فك المجمدات في الميكرويف جزء غير مجمد والجزء الآخر يتم طهوه لتعرضه لحرارة زائدة، وبالتالي تجد الأجزاء الخارجية من اللحم تحول لونها للبني بينما من الداخل يظل اللحم مجمدا، وكذلك عند زيادة درجة حرارة اللحم بصورة سريعة يؤدي ذلك إلى نمو البكتريا وتكاثرها، وإذا لم يتم طهي اللحم في الحال يصبح ملوث وغير صحي والمنظر ده بنشوفه كتير في الكبدة المجمدة عند فكها في الميكرويف لذلك لا انصح بفك تجميدها فيه ... وباقي المجمدات يتم وضعها لأقل فترة ممكنة تضمن عدم تغير لون اللحم .


د.شيرين محمد زكي