مشكورة اختي العمر الجديد على هالموضوع اللي يجدد لنا حنا زوجات الشمالي الشرقي المعلومات عن طبعه وكيف نتعامل وياه,ويجدد معاه الجرح اللي بعده ما طاب بسببه -اسفة وحدة عانت وايدمن الشمالي-والله يجعل ما بذلتيه من جهد بميزان حسناتج -امين-واريد مساعدتج باشياء وايدة لو وقتج يسمح يالغلا
اختي -زهور قصري- أحييج على تفهمج للشمالي اللي عندج-وتقبلج لطبعه وحركاته وغيرته -بالطريقة الحلوة اللي انت وصفتيها, باين عليج شمالية ولهالسبب فهمتيه وتقبلتيه بسرعة ومعاناتج وياه كانت اقل من معاناتنا احنا الجنوبيات الغربيات تحديدا ,
-زوجي فيه صفات وايدة من زوجج مثل الغيرة لدرجة انه يا ويلي لو بين شي مني بالغلط خاصة السنين الاولى كل طلعه بهواش ولين الحين فارض علي البس القفازات مع انه صار لنا 15 سنة زواج-خبروني كيف اتقبل هالشي وهو مفروض علي بالقوة ياليت باسلوب
-من ناحية المصرف ما يطلع الفلوس الا في شي ضروري ويسوا وأخذ من وقتي سنين لين ما عودته يطلعنا انا والعيال الثلاث- اللي جببتهم ورا بعض غصبا عني طبعا لأنه منعني اسوي مانع- يمشينا بالسيارة بس, ممنوع جمعية ولا مولات, وسنين ثانية لين ما تقبل يشتريلنا فاست فوود يوم يمشينا لانه برايه مضيعة فلوس عالفاضي
- والادهى والأمر من هذا كله انه طول هالفترة مسكني بغرفتين بدون حتى مطبخ تحضيري ببيت اهله برغم وجود غرفة صغيرة عشان المطبخ بس ناقصها الدواليب ما طاع ابدا يسويها وخاصة اني كنت محتاجة للمطبخ صج يوم عيالي كانوا صغار ,ويوم كبروا كنت اطالبه يستاجر بيت بس كان دايم يرفض حتى بعد ما جبت الرابع وينام عنا لين عمره 5 سنين - اقتنع بفكرة شراء بيت عشان فلوسه ما تروح لحد غريب-يعني اخيرا اشترالنا بيت تونا ساكنينه من 5 شهور تقريبا والبيت يبعد عن مكان شغله واهله واهلي ساعة ونص ,وكل هذا عشان اسعار البيوت في هالمنطقه ارخص شوي من اسعارها بالعاصمة -يعني كل يوم رايح ساعة ونص وجاي ساعة ونص
قلنا انه الشمالي مجتهد في شغله وفهمنا انه ما يحب يضيع فلوسه على اي شي عشان يأمن لعياله حياة مستقرة
بس هل يسوا عليه هالتعب والنكد لهالدرجة يعذب نفسه وعياله-مهما كان الرزق بايد الله
غير المعاملة الجافة والهواش والسب -عالصغيرة والكبيرة وحرماني من الطلعة ويا اي حد لين الحين حتى لو كان ابوي ,اخوي الا نادر جدا حىت-ى روحاتي لاهلي اللي هم اهله -امي خالته-وهذا اللي قاهرني وجارحني وايد-
يحسبها علي مستحيل يوديني عندهم متى ما بغيت-وطعبا يكره شي اسمه زيارات وعزايم حتى عند اخوانه بالغصب
يعني مسكرها علي من كل الجهات
الحمدلله على كل حال _تمنيت لو انه هالمنتدى كان موجود ببداية زواجي لكنت اختصرت على نفسي سنين من العذاب والمعاناة والصبر السلبي بحجة ما عليه راح يتغير ,هو جنتي وناري
الصراحة انا استفدت وايد من مواضيع الشمالي الشرقي اول شي في اني عرفت طبيعة هالشخصية-فخف حقدي عليه -وعرفت ولو بشكل بسيط كيف اتعامل وياه صحيح ما قدرت اغيره وايد لكن انا تغيرت عالأقل وخفت مشاكلنا نوعا ما -وصرت اطنش خاصة بعد ما انتقلت بيت بروحي
بس في شي متعبني وايد وبغيت مساعدتكم
كيف انس الماضي الاليم,ارجوكم خبروني احس انه مهما يسويلنا ويشتريلنا ما اقدر اكون راضية عنه ولا اقدر امدحه بسبب معاملته القاسية لي خاصة بالسنوات الثمان الاولى اللي كانت اتعس يام حياتي,صحيح هو تغير شوي ,وكل ما بغيت اطبق اللي قريته عن التعامل ويا الشمالي بالمدح والتقدير احس ما اقدر لان قلبي مليان جروح منه,حاولت افتح صفحة جديدة بعد ما انتقلنا بس كل ما اتقدم خطوة جدام يرجعني عشر لورا بسبة دفاشته وطول لسانه
كيف اقدر اقنعه يعطيني مصروف شهري خاص فيني,والاهم عندي كيف اقنعه يخليني اطلع بروحي اقل شي ويا ولدي الكبير للعيادة او الجمعية لانه لين الحين مو مقتنع وهاذا اللي ذابحني الحبسة برغم انه عندنا دريول-يعني عادي عنده عياله يتمون مرضى الين ما يفضى حضرته يوديهم بالويكند بس مستحيل يقولي ودي العيال العيادة او موعد-وطلعاتنا بس بالجمعة والسبت حتى لو العيال باجازة,وعلى حسب مزاجه
سامحوني خواتي عالاطالة والله ما كتبت موضوعي الا لثقتي بمن في هذا المنتدى من اخوات
ومشكورة مرة ثانية العمر الجديد-اتمنى تساعديني انت والاخوات عسى الله ييسر كل اموركم ويسخر لكم ازواجكم
