عزيزتي انا صارت لي نفس مشكلتك ايام ما كنت اشتغل قبل الزواج .. كان في موظف في قسم تاني كنت اتعامل معاهم كتير ومعاملتي لهم دايما عادية وفي حدود الاحترام ,, لكن كنت الاحظ ان هذا الموظف بالذات نظراته وحركاته وحتى صوته معايا غير عن البنات التانيين ,, في يوم صارت مضاربة مع مديرته الفلبينية واتضاربنا انا وهيا لانها اللئيمة واقفتلي في شغلى ,, المهم انهيت الموضوع معاها وخلص الدوام ورجعت البيت ,,, في المغرب وصلني مسج من رقم ما اعرفه يقوللي لاتزعلي منها وهيا لئيمة وانا كلمتها وقلتلها لا تضايقي فلانة (انا) مرة تانية ,, ارسلت مسج قلت مين انت .. رد عليا وعرفت انه هو .. تاني يوم على طول رحتله في قسمه وقلتله ممكن اتكلم معاك برة شوية؟؟ وقفنا في الممر وقلتله اول شي من فين جبت رقمي ؟؟ قعد يستخف ويقول لي اللي يسال مايتوه وكده يبغاني اضحك معاه ,, لكن انا وجهي كان منتهى الجدية وقلتله شوف ,,انا علاقتي بيك كويسة في حدود الشغل وبس ..انا ما احب احد ما اعطيته رقمي يتصل عليا ويرسل لي مسجات لو سمحت لا عاد ترسلي اي شي ... مرررررة انحرج وقال لي اسف وما ابغاكي تزعلي مني ... المهم فهمته انه في حدود واني حتى لما اتعامل معاك هادا شغل وبس مافي اي شي تاني .. ومضارباتي انا اعرف احلها ما ابغاك تدافع عني ولا تواسيني ..وبس بعدها الحمدلله احترم نفسه وسار يعاملني بروفيشنال ...
معليش طوووولت عليكي بس ابغى اقولك ان مو شرط المسج يكون فيه غزل صريح او كلام وقح عشان تشرشحيه .. مجرد ارساله المسج ماله داعي وعلى طول اوقفي في حلقه .. لانك لو سكتي ممكن يفكر انه عاجبها مسجاتي او كده ,, هما هادي النوعية كده تفكر ,, فهميه بشويش ومن غير احراج ولا اهانات انكم هنا للشغل مو للغزل وبس ,, حطي في بالك انه واحد ماياثر عليكي زعله ولا رضاه لكن في نفس الوقت في علاقة عمل ولا تسمحي لاحد يتكلم عليكي في بيئة عملك .. يعني لا تخربيها معاه مرة ,, خليكي انتي المحترمة وطلعيه هوا التافه الفاضي ,, انا منتاكدة انك ماشاء الله ذكية ورح تعرفي تمشي الموقف
بالنسبة لزوجك .. انصحك تمسحي كل المسجات اللي عندك لانه مالها داعي في جوالك وومكن تاثيرها يكون عكسي عليكي ... لا تقوليله مهما كان متفهم لان هادا شغلك ومشاكلك حليها بنفسك ,, ممكن يتضايق وممكن توصل انه يمنعك من الشغل كله بسبب واحد فاضي .. زوجك لاتدخليه الا في المواضيع الكبيرة لا سمح الله .. غير كده هادي اشياء ومواقف دايما تصير في اماكن العمل ,, ولو رح تدخلي زوجك في كل صغيرة وكبيرة هوا رح يتضايق ويفكر انك ماتعرفي تتصرفي بنفسك .. خليكي قوية وحازمة وحلي امور شغلك بنفسك ,,
يا الله معليش سامحيني على الاطالة بس مشكلتك ( وان شاء الله ماتكون مشكلة ) مرررة شدتني ,, الله يوفقك عزيزتي في حياتك وفي شغلك ويعلي مراتبك يارب ..تقبلي مروري ورايي
