أحس فيك
New member
- إنضم
- 2008/02/15
- المشاركات
- 1,861
السلام عليكم ورحمة الله وبركاته ..
أشحالكم يا أميرات هذا القسم الرائع
في خاطري أفضفض وفي نفس الوقت أفيد غيري ببعض الأخطاء الشائعة اللي ترتكبها واااايد من البنات والنساء اللي يدعون الدلع والأنوثة المصطنعة.
أشحالكم يا أميرات هذا القسم الرائع
في خاطري أفضفض وفي نفس الوقت أفيد غيري ببعض الأخطاء الشائعة اللي ترتكبها واااايد من البنات والنساء اللي يدعون الدلع والأنوثة المصطنعة.
خلونا الحين نشوف وش اللي يقلل من أنوثتنا ومن طلتنا الحلو:
-إذا أتشريتي جاكيت مثلاً وكان سعره غالي أو من مكان راقي و كان عاجبج وااايد وفرحانه فيه ولبستيه وانتي واثقه من اللى حولج أنهم عاجبهم الجالكيت ماله داعي تتكلمين لين ما يبدون رايهم وإذا أبدوا رايهم أكتفي بكلمة شكراً و لا تزيدين بأنج شريتيه من المكان الفلاني او أنه غالي وبالسعر الفلاني.>>> يمكن قريتوها وااايد بس أنا راح اقولها على أنكم اول مره تقرونها و لأني أبي افضفض.
-ما أعتقد أنج يوم تعرفين معني كلمه مو زينه وتقولينها حلوه عليج مثل كلمة باي كلنا يعرف معناها واللي تقولها على أساس انها حلوه على لسانها ترى تفشل مره وخاصه إذا كانت ما تقولها من قبل >>يعني مو متعوده عليها .. بس تقولها على أساس انها حلوه على لسانها .. انزين إذا تشوفينها حلوه على لسانج ترى الحلاه مو على شكل الكلمه الحلو على لسانج.. الحلاه على الكلام اللى تحسين فيه وله معنى في دينا أو في عاداتنا وتقاليدنا.
-يوم تجيبين خدامه ((طبعاً هذي حق المتزوجات)) بعد الكرف والتعب حرام أنج ما تحسين فيها وتقطين كل الشغل عليها مثل اليهال والغسيل والطبخ و الخم.. على ما أعتقد اليهال مو حق الخدامه وإذا تحسين نفسج عاجزه عن أطفالج جيبي مربيه خاصه لهم وتخلي عن القياده.. وخاصه إذا كانت اونه الام خايفه على بيتها تجيب خدامه عجوز وتذبحها من الشغل وهي قاعده تتفرج وتبين أنها أنوثى ودلوعه بعد يعني بس تامر مثل الأميرات اللى ما تعرف عنهم شي ترى من معالم الأنوثه الرحمة إذا ما كنتي تعرفين.
((إذا كنتي في زيارة لأحد من الأهل أو الأصدقاء))
1)وجلستوا على سفرة الطعام "تذكري انج في بيت ناس مو في بيتج يعني لا تخلين ولدج أو بنتج الصغيره تخربط وتنثر الأكل وتكتكت العصير وماي >>إذا هذا كله يصير في بيتج مع انه لوعه بس مو مشكله اللى ساتر عليج :: يعني في بيت الناس خلج غير وخلج اتكيت مو مشكله في هذي تصنعي علشان مشاعر أهل البيت وبيتهم::
2)وإذا حصل مثلا سكب العصير من احد من أبناءج لا تسوين نفسج غبيه ((اونج ناعمه )) ما تقدرين تعصبين على ولدج وتحسبين من الأنوثه أنج تخلينه يكتكت لين ما تجي الخدامه أو أحد من اهل البيت وتشيله>> أنا ما أقولج قومي ضربيه أو صرخي صرخه تدوخ اللى بسمعها لا طبعا ((مثل ما قلنا نحن بنات وأنوثات من يوم طلعنا على الدنيا بفطرة ربنا يعني تقدرين تكلمينه بصوت منخفض وحاد ونظرة تنم عن غضبك لهذا الفعل الخاطئ و أنتي قايمه تعدلين اللى خربه مو وأنتي قاعده في مكانج لأنج اميرة واللي قدامج خدم يخدمونج ويخدمون عيالج((طبعاً إذا الطفل كان قاصد الفعل لأنه في يهال جي يكتكتون بعد ما يخلصون من الأكل >> مو مشكله الطفل يتعلم.))
3)إذا طبعاً جلستي على الطعام لا تنسين عمرج وتخذين السفره أو الطاوله كلها لج ولعيالج وناسيه إن وراج ناس اكبر منج ومن اعيالج يعني خلي الكبار يقعدون اول وبعدين قعدي عيالج وإذا ما فيه مكان لعيالج أكيد أهل البيت راح يضعون سفره ثانيه للأطفال ومن ضمنهم أبناءج الكرام >> يعني راح يكلون ما راح يموتون من الجوع...وإذا ما وضعوا سفره للأطفال اكيد راح يكون بعد ما تقومون منها.
- الدلوعه ما تقول عن نفسها دلوعه حتى لو في خاطرها تقولها وإذا قالتها ترى بكون شكلها مضحك أمام الناس وفشله في حقها لأن اللى قدامج تعرف أنج دلوعه أولا من حركاتج الحلوه مو المايعه اللى تلوع .. وبعدين ترى الناس ما ترحم يمكن توقلينها على نياتج بس اللى بسمعها اشراح يقول>> أنتوا تعرفون.
- أمس كنت مع أخوي في محل وكان في رجال مع زوجته بصراحه ما عرف اشلون اعبر عن اللى شفته من قوة الصدمه المهم راح أقولكم دخلت المحل وشفت الرجال مع زوجته اللى تبي تنقي لها عباية وشيله وتكلم العامل عادي الموقف كان في البدايه لكن اشوي واشوف الرجال واقف على زاويه وهي صدرها في صدر العامل ((أسمحولي على هذا الكلام لكن هي الحقيقه)) الزوجه كانت طويله والعامل طوله زين يعني كان في تنافس في الطول>>خخخ المهم تتفاهم معاه وهي قريبه منه حيل بصراح هنيه تخرعت بس سكت لحد الحين ما كمل الفلم راحوا عند المحاسب وهي اللى وقفت جهة العامل والرجال في الجهة الثانيه اللى محد بكون جنبه المهم الرجال كنت طول الوقف يحاول يشوفني لحد الحين ما لمح من معاه في الحل غير أخوي لأني كنت أنخش وراه علشان كلنا كنا واقفين نبي نحاسب ومخليه أخوي قدامي وانا وراه وهو يلف يمين ويسار يبي يلمحني المهم تدارك الأخ موقفه وحس أن شكله عرضه للكلام تحرك وراح بين زوجته والعامل >>وأخيراً ..لأن شاف معاه في المحل رجل (أخوي) يعرف يتفاهم مع الرجال اللى مثله مو أنا اللى اتكلم.
-وبعدها نحن خلصنا مع بعض وكنا نحن تونا بنسبقه إلا أخوي قدمه علينا ومر وفتح لنا الباب بحترام واشكره اخوي وراح هو المحل اللى على اليسار ونحن رحنا المحل اللى على اليمين المهم خلصنا المحل وركبنا السياره إلا وأشوف الزوجه طلعه من المحل قبل الزوج وتسابقه شكلها>>خخخ وبعد مده يعني اختفت هي عن عيني إلا وهو توه طلع من المحل يبي يلحق على زوجته اللى راحت محل ثاني المهم كسر خاطري شكل الزوج اللى مغلوب على أمره وناظرني نظره فيها حياء يمكن على اللى قاعده اشوفه والله مادري .
-المهم نحن ناخذ من ذي الموقف أنه البنت أو الزوجه لازم تحسس زوجها بمعني انوثتها خارج البيت أيضاَ يعني هو اللى يتعامل مع الرجال وإلا وش فايدته جاي معاج .. نعم يمكن تحتاجين تتكلمني مع الرجال بحضرة زوجج إذا كان يتطلب الموضوع مثل انج تبين تفهمينه اللى تبينه وزوجج ما يعرف لأنها شغلات حريم.. وبعد في شي ثاني هو انج ما تسبقين زوجج بالخروج من المحل إلى محل ثاني إلا إذا كانت المحل مزدحم مثلا وتبين تروحين السياره هذي عادي أنج بتروحين السيارة مو محل ثاني في عامل رجل.
-وبعدي لازم تحسسين زوجج برجولته واهمية وجوده في الطلعه معاج يعني ما تتكلمين مع إي رجال إلا هو قال لج.
((اللى أستفدناه هو انج تدخلين المحل بعد زوجج يعني هو اللى يتقدمج ويستقبله راعي المحل وزوجج هو اللى يسلم ..وإذا بتطلعون من المحل انتي اللى تطلعين قبله وهو اللى وراء >> كأنه بحميج >>هه >>حسسيه بأنوثتج))
-اللي تسوي نفسها كلش ما فوقها فوق وتدخل المجلس وتسلم على الناس بطرف أصابعها تحسب شكلها بكون حلو ما تدري ان التكبر يدل على النقص.. ترى عيب تسلمين بنفسيه مو حلوه يكون شكلج مقرف مره ولا يدل على أنوثه ولا على غيره.
-اللى تسوي نفسها انظف البشر واللى حولها غذاره في غذاره وخاصة مع الأطفال يعني لو قرب ينبها طفل على وجه شوكلت أو غيره تصرخ وعععع>> عيييييييييييييب والله عييييب يعني ندري انه شكله منفر بس مو جي وخاصه إذا امه موجوده يعني مو عيب تحرجين امه قدام العرب أو حتى تجرحين الطفل اللى ماراح ينسى لج هاي الشي.. طبعاً الأسلوب الامثل أنج تخذين منديل وتقولين له برقه ونعومه تعال حبيبي نظف وجهك وتعطينه أيه اما إكان صغير ولايعه جبدج منه ولا يقدر ينظف حق نفسه تقدرين تنظفين له بالمنديل ولا راح تتوسخين يعني ما في داعي للخوف او حتى تقومين بهدوء وتودينه للخدامه وتنظف وجه هي علشان ما ترجعين من الوعه>>خخخ..
وأخيراً لكم مني كل الأحترام والتقدير والحب
محبتكم:
أحـس فـيـك
